弟弟, 你既到黎真係令到媽媽手忙腳亂啊! 今日係我悠長產假既第 2 日咋! 一早扮同爸爸一齊返工咁送小慈家姐返學之後, 樓下商場萬寧新開張, 買滿 $111 有禮物, 媽媽即時走去血拼! 計都冇咁準, 我真係買左 $111 好攪笑! 跟住返屋企本來 plan 左好多野做, 下晝仲要去健康院覆診! 換衫時發覺內褲有少少血!! 咩事呢? 有少少驚, 唔通我扯親自己唔知? 睇定 d 先....
11:30am 開工執下 d 衫仔, 問朋友攞左好多衫都未得閒執, 仲要吩咐工人洗添架, 手腳太慢勒我! 突然 feel 到下面漏水, 我以為自己賴尿 @.@! 即刻企起身仲 be li ba la 流到一地都係, 濕左 4 格大階磚.... Oh No.... 原來我穿水啊!! 衝入廁所坐低, 我怕再漏水整污漕間房, 跟住打俾秋秋, 佢 9 秒 9 揸車返屋企!! 而我就把握時間去沖個涼, 大脾滑潺潺咁好唔舒服! 沖完涼先醒起要用產婦衛生巾又未穿圈圈, 走佬袋又未執, 攞住張入院用品清單望左 3 次都唔知自己執緊咩..... 唉~~ 好呢 hai ~
11:45am 秋回來了! 即刻拖實佢! 俾張身分證佢袋住, 其他咩都唔重要, 一定要有身分證, 唔係入院收我 4 萬元! 做左納稅人咁多年, 我一定要享盡我係香港人既福利, 其中一樣就係唔駛錢生 BB!
12:00pm 出發去醫院, 秋堅持今次搭的士 (內裡原因請睇 2006年 4月20日既 "小慈出世了" ^^) 點知樓下的士越叫越走, 要行到出街尾先有的士!? 車~~ 我行得去街尾我就行埋去醫院啦, 都係差 2 條街之麻! 況且我而家又冇穿水又冇陣痛, 我自己行! 點知行唔夠 2 步就開始陣痛, 好在痛得 3 次, 今次叻左, 15 分鐘去到醫院, 係條街度停左 3 次咋 :p
上到病房等姑娘羅排板時我又穿水!! Oh No~~~ 咩咁多水流架呢?!! 我香噴噴既 body 又報銷左 @.@ 姑娘見我咁即刻俾醫院衫我換, 驗小便及磅重, 我有 58.4kg, 即 128.5磅. 依? 上星期係私家仲磅到 134磅格? 睇黎我 d 羊水漏得 7788 所以輕左 6 磅! 檢查宮頸, 姑娘話我厚, 阿 B 個頭好後, 好入, 未生得! 死啦, 穿左水但未生得咪要痛好耐??
未生得就要係病房待產, 姑娘同我駁機 check BB 心跳及宮縮, 12:45pm 我開始有不規則既陣痛, 6分鐘 / 8分鐘 / 3分鐘咁.... 跟住又穿水!! 真係暈~~~ 不過今次穿水弟弟就勁踢我! 撥手撐腳再加陣痛, 真係羅命! 見到秋秋係門口但佢又唔可以入黎因為唔係探病時間, 我好可憐啊.....
1:30pm 開始痛到入心入肺, 典床典蓆! 有時痛既時間長達 4 分鐘! 條褲都俾我渣到縐晒!! 又成身汗.... 姑娘話我痛得唔規律又唔係好密既大痛, 未生得住! 唔係掛? 我痛到想講粗口架勒播!
3:00pm 有個姑娘埋黎話我阿 B 心跳慢左!!!? Check 我子宮仲話我已經開左 4 度!!!! 手術室有位仲即刻推我落去.... 好戲劇性呀! 由入院時話我 1 度都冇, 2 個幾鐘開到 4 度都好快, 唔怪得我痛到癲左啦! 頭先仲有姑娘話我咩未有規律痛未生得住, 哼! 我都知弟弟唔會要我痛咁耐架勒!
秋陪我等 lift 落產房, 同姑娘表示會陪產, 但姑娘話今日好多人未必安排到, 嗚~~~ 又係要我一個人孤單作戰, 我要老公呀~~~~ 唯有不停祈禱啦! 秋同我講 "加油!" 弟弟我地一齊加油! 一大堆姑娘問我好多野, 我痛到都唔識答佢地, 俾笑氣我聞左 2 下就有姑娘同我講: "BB 心跳慢左, 而家要生佢出黎勒! 叫唔到你先生入黎, 叫咪冇人應, BB 危急呀, 生左佢出黎先, 陪產唔重要!"
3:06pm 就要我 push! 死火! 我真係冇力 push ! 今朝食完早餐到而家 3:00pm, 未食 lunch 不特止仲要水都冇飲過!!! 我 push 左好多下都 push 唔到弟弟出黎, 媽媽好唔叻呀今次! 姑娘又一直嚇我話停心跳就大件事, 要我一條氣唔好停! 得先得架!? 我冇力到 feel 到一個姑娘係肚皮度幫我推, 一個擘大我係下面拉, 一個幫手剪會陰...... 亂成一遍....... 最後我要依起棚牙好大聲咁 "E ~~~~~~~~~~~ BB 呀~~~~~~~" 先 push 到阿仔出黎, 真係聲嘶力竭......
同上一次好唔同, 我 push 完冇輕鬆散晒既感覺, 反而唔肯定自己生左未?! 只見到姑娘好忙咁唔知攪咩, 成個產房靜晒! 我問 BB 呢? 冇人應我!! 唔係有事呀? 頭先話佢心跳慢, 唔通死左??!! 想起身睇下, 不過全身冇晒力...... 就係呢個時候聽到弟弟既喊聲了!!!! 哈利路亞! 嚇死我勒!!
郭恩明先生出世了~~~ 重 3.22 kg (我生日日期呀!!)
叻仔呀! 37周出世仲重過 39周出世既小慈家姐! 而家都有 7.1 磅, 如果遲多 2 星期出世 8 磅都有!! 不過早咁多真係完全唔係我預計之內, 我都預左弟弟會早出世, 因為陀佢條腰真係痛得好緊要, 個肚又勁巨大, 遲出世我真係負荷唔到架勒, 不過就冇心理準備弟弟早咁多! 又太老定, 屋企咩都未執, 完全冇準備! 我仲買左戲飛今晚 7:30pm 睇美麗人生添架, 真係人算不如天算! 冇人會知明天發生既事, 一切都靠主既安排預備!
姑娘檢查完弟弟就包住俾我, 我摸左佢面仔一下! 弟弟同小慈好唔同樣, 眼耳口鼻闊好多, 好男仔樣! 仲好多頭髮添, 好 man 呀 ^^ 姑娘話弟弟出黎時, 面向天咁出世, 眼仔碌碌唔喊, 要拍佢背脊先肯喊! 個個 bb 都係 dup 低頭屈埋身咁出, 而佢同人唔同所以生得咁辛苦! 今次縫傷口仲要係咁標血, 要 call 醫生黎幫手, 都要攪幾耐, 好心既姑娘俾我打電話同老公報喜, 不過我擘頭第一句就問秋秋去左邊?! 點解姑娘話叫咪冇人應?! 秋竟然答我佢去左廁所!!! 諗住我得 4 度仲有排開, 於是去左爆石!!!!! 真係激死人勒!!! 不過當時咁危急又亂成一遍, 阿仔又話心跳慢咁驚嚇, 成 6 個姑娘圍住我相信情況都真係好驚險, 秋秋見唔到都係好既
4:00pm 推左我上 9 樓, 竟然係雙人房? 有冇攪錯左? 姑娘話 8 樓爆滿 upgrade 左我喎! 下? 咁都得?! 姑娘見我精神 ok 又問我餵唔餵 BB? 梗係餵! 4:15pm 餵到 4:35pm, 阿仔有啜, 不過食 2 啖又 fing 頭又含住瞓
4:48pm 終於都見到秋秋! 佢都驚訝點解我可以住私家病房, 隔離仲要冇人?!! 包房呀!! 秋秋錫左我一啖, 話我好叻! 哼~~ 竟然走左去爆石!!! 太低估阿仔! 12:15pm 入院到 3:20pm 阿仔出世, 3 個鐘頭咋!! 仲快過小慈家姐 4 個半鐘! 叻叻! 一切都發生得太突然, 太快勒, 今次生 bb, 我冇打止痛針, 笑氣都係聞左 2 下, 真係 all by myself 架今次! 一諗起個種痛到入心入肺既感覺即刻打冷震! 弟弟, 你要好錫好錫媽媽, 知唔知道呀?
沒有留言:
張貼留言