今日已經係醫院第 3 日架喇! 今次好彩住到私家病房既額外好處就係原來姑娘服務非常殷勤, 第 1日我未落得床, 姑娘就睇住弟弟 3-4 個鐘先推佢去我床度俾我餵人奶, 我真係好得閒呀~~
第 2 日朝早姑娘同弟弟洗完白白就正式俾番我照顧, 姑娘話弟弟 d 頭髮攣攣地好 cute! 自己生既, 咩樣都覺得至靚架啦~~ 幾靚仔 ^8^
得個幾日人仔已經表情多多
唯一令我洩氣既係郭恩明個櫻桃小嘴!! 一俾佢飲人奶啜少少就訓覺, 吱都唔醒又唔喊肚餓, 質又質唔到佢食, 食又唔知佢食左幾多! 又玩 fing 頭, 明明擺好位佢又 fing 番出黎, 除左生佢時係產房聽過佢喊左 2 聲, 呢 2 日佢都冇喊過啦! 懶訓豬!!
姑娘話早出世既 BB 係眼訓 d 架, 唔駛緊張喎. 磅埋重先出院, 縮水呀~~~ 弟弟今日得番 3.005kg 咋! 弟弟你要努力 d 飲奶奶先得架!
1:30pm 秋秋黎接我出院喇! 呢幾日佢都好辛苦, 我既午餐晚餐都係佢定時定候專登羅俾我食架, 私家病房又鬆好多, 佢成日自出自入都冇人理佢, 又唔會有人趕佢走, 係我唔想小慈放左學咁耐都冇人陪佢先快 d 叫秋秋返屋企陪佢玩. 秋話小慈好生性呀, 好乖! 同佢講咩都話 "知道~~" "好~~"
秋係手機度影左弟弟 d 相俾小慈睇, 小慈知道自己做左家姐好開心, 仲將自己杯水遞俾手機入面既弟弟飲! 咁快肯同弟弟分享我好開心呀!! 返學經過 lobby 又不停同看更姨姨講:
"弟弟出世喇~~~ 小慈做家姐喇~~~" (意思係咁不過 BB 話講唔正!)
5pm 小慈放學返黎喇! 見到我開心到想喊! 我又何嘗唔係呢? 即刻俾個肉緊既擁吻我個乖女! 掛死媽媽喇~~~ 小慈叫弟弟做 BB, 見到弟弟好高興, 不停話要抱 BB
要相親相愛啊~
沒有留言:
張貼留言