爸爸晨咁早就西裝畢挺咁出門口, 小慈問爸爸係唔係返工? 我話爸爸去街, 一陣媽媽同埋姐姐一齊同小慈去旅行, 諗住小慈實話好野啦, 估唔到小慈扁晒嘴話唔去, 換校服準備出門口時小慈仲扭計添 !?!
行去搭火車又拉我返轉頭話: "旅行唔係去呢度呀!" 於是我意識到小慈誤會左, 佢以為我送佢返學跟住會走賣甩佢呀! Oh No~~~ 即刻抱起佢解釋返學校搵陳老師然後一齊去旅行呀! 點知講完小慈都係唔想, 扁晒嘴嬲爆爆! 我再講清楚 d 話: "媽媽今日唔返工喎! 姐姐都唔去 market, 我地一齊去旅行呀!" 小慈先開始明明地, 路途上我要強調好多次媽媽唔返工 @.@
入到課室, 小慈唔肯自己坐, 一定要坐我大脾之餘仲要我攬住佢成個人依偎住我嗲到飛起, 老師同佢打招呼都唔睬慌死我會消失咁, 一直到大家集合好離開學校出發上旅遊巴士, 小慈即刻好似如釋重負咁終於都明白我真係同佢一齊去旅行, 唔係返學先開始笑, 蹦蹦跳咁上車, 係架車度肯自己坐, 又同老師打招呼, 又介紹 d 同學俾我識, 好興奮咁睇風景, 同剛才既態度簡直天淵之別! 小慈真係好傻呀!!
上到旅遊巴先開始識笑
親子同樂猜情尋 @ 元朗保良局賽馬會大棠渡假村
小慈既同學仔由左起: 賴俊邦, 吳紀乎, 馬杰城, 曾芷蔚, 小慈, 溫希倫
大家睇下我既巨肚! 老師們唔俾我坐地下, 係都要俾張櫈我
開幕禮跳大會主題舞 : 開心世界, 小慈跳得太開心走到過左對面海咁滯, 真係俾佢笑死
參加由社工負責既工作坊教導小朋友認識各種情緒
小慈畫緊佢今日既心情
突然間識自己羅水樽飲水, 仲冇倒瀉呀! 嚇左我一跳, 好驚喜呀!!
上完工作坊已經 12:10pm, 小慈開始扭眼訓, 食左幾啖飯就問我羅枕頭抱住佢仲即刻訓著, 好在呢度有個休息室攬住佢係梳化訓左一個鐘頭, 叉足電又出去玩喇~~
呢個大棠渡假村都好大, 有 playroom, 又有室外遊樂場, 小慈好開心
仲有沙池添, 小慈玩到除晒鞋唔捨得走
好大風
同學仔賴俊邦
呢位就係鼎鼎大名, 最錫小慈既班主任陳老師 ^^
陳老師讚小慈食野叻左會添食, 次次都會添雪梨, 粥, 最鍾意飲湯, 飯餸反而少可能佢食得慢! 多謝陳老師咁小心又細心留意照顧小慈 ^8^
何校長非常親民
開心的一天, 識多左好多小慈同學仔!
沒有留言:
張貼留言