行山及歷奇日營

今日教會舉辦行山及歷奇日營, 落左成個星期雨, 大家密密禱告求天父賜予適合既天氣!
雨, 係冇落既, 不過寒流襲港, 氣溫驟降! 可以出既標誌已經出晒!  係我既記憶中, 最凍都只係 7 度, 真係未出現過 5.3 度既畫面

因為係野外訓練營, 只適合小四以上既小朋友參加, 我同爸爸唯有兵分兩路, 一個陪小慈, 一個陪弟弟

目的地 -- 荃灣香港航空青年團下花山訓練營

浩浩蕩蕩 8 個小朋友參加

多謝連姑娘籌備是次訓練營, 藉此培育小朋友的解難及合作精神

真係好凍, 呢入營舍玩遊戲先

一班小朋友非常留心聽遊戲規則

4 人一小隊, 利用三塊木磚運送所有隊員到目的地

隱藏迷宮, 要記住出路既位置

休息時間最好梗係食 D 野補充體力, 同埋影張相咁啦

大合照

休息過後就見真章喇!!  營地尋路記 -- 要搵晒紙上所有圖片既實物

仲要答問題

開始落雨, 大家都包到蒙面超人咁

爸爸 & 小慈小隊, 出發!!!

搵到特別既菌類

紅色既楓葉呀

仲有看圖估成語

知唔知答案?

好難得既一次體驗!  唔好話小慈, 連爸爸咁大個人都未試過咁低溫度又大風又密雨咁係山上面跑!  難得既係弱不禁風既小慈 (真係被風吹到企唔穩)  都堅持住冇放棄過!  其中有個戶外遊戲要全組小朋友合作, 一 D 要做踏板, 一 D 要用手托上托咁升高隊員去搬郁橫樑上既車呔, 佢地連續試 4 次先成功, 凍到手都薑晒!  真係唔好睇少小朋友, 鬥志驚人!

第一次體驗極端天氣, 難忘~~~~~~

第52屆學校舞蹈節

升上四年級既小慈實在太鍾意跳舞, 更加鍾意係學校同好同學一齊跳舞, 於是無懼由低小做主角, 但升上高小要做最細既一個都要繼續跳!

今日代表學校參加學校舞蹈節比賽, 舞蹈老師余 Sir 同佢地一齊出賽

比賽時間 12:00 位置係屯門大會堂 10:30 am 就要出車, 所以一返到學校即刻換衫、set 頭、化妝、綵排, 最驚喜既係余 sir 幫大家畫眉!!

小慈出晒佢閃令令既大眼睛望住我, 極度渴望媽媽黎睇佢比賽, 於是, 我排除萬難同公司請假, 一早同佢一齊返學做埋家長義工, 完全生手既我要幫 18 位妹妹搽粉底眼影, 身體力行支持我個乖女!  小慈當然士氣大增, 開心到成日傻笑  :)

化好妝喇!  今日既道具係每人一張櫈仔

最後綵排, 余 sir 教路:「圍個圓圈要圓 D!」

準時到達比賽場地, 舞蹈名稱「夏日的滴滴調」(彝族舞)

個個都咁靚, 梗係要影張大合照啦 ^^

家長都有得上鏡  :)

天氣實在太凍, 一影完相個個即刻著褸!  高小淨係得佢地 3 個四年級, 自自然然就做左好朋友, 蘇老師鼓勵佢地要跳到 6 年級呀 ^^

第一次聽埋評語先走, 5 位評判話佢地開場設計生活化, 舞蹈層次分明、結構清晰、畫面豐富優美, 風格突出有變化, 跳躍風趣有特色, 小朋友天真歡樂的氣氛表露無遺, 表現投入開心, 合作一流!  小櫈子道具能充分利用, 整體表現不錯, 如表演再誇張再放一些, 笑容再多一些, 停頓位再加強, 走位再精準效果會更加好!  俾左個「甲級獎」佢地 ^^

余 sir 話樣樣都差 D D, 出年再努力啦!

踢足球

上次柴娃娃即慶去踢足球太開心, 今日大家考晒試又去踢過 ^^

 有備而戰!  早前大家一齊整有名波衫, 而家岩岩好可以用黎分隊踢比賽!  因為時間既關係我地個件收埋入衣櫃底未拎到出黎, 好在隊友帶多件借用  :)

等我快 D 搵番件衫出黎下次影隊相就仲有型

踢左成個鐘中場冇休息, 呢班小朋友餓到飛起!  自成一閣仲識自己點餸食添

人多好辦事 :)

小二小四家長日

派成績表喇~

一家人齊齊整整返學校見老師, 一年先見得一次, 梗係要成家一齊出動啦!

小慈預約 10:30 am, 我地早到但門口冇人, 即刻攝位 :)

繆老師連續兩年成為小慈班主任, 仲係數學輔導組既導師, 對小慈非常了解, 盛讚小慈今年用心左, 睇得出佢好俾心機好努力, 上堂專心、主動, 唔識會舉手問問題, 落堂亦會追問老師, 老師非常欣賞!  但始終都係多唔小心、大意, 學習與應用未能融會貫通, 要努力追學業成績, 因為已經 4 年班真係要俾多 D 心機, 數學成績差少少, 反而今年俾左個驚喜我地, 普通話 & 視覺藝術攞 A+  真係估佢唔到  ^^

至於郭小明, 今年轉左新班主任蔡老師, 坐低第一句就話小明最出色既地方就係佢既說話能力, 講故仔講得好好, 有膽量有能力能夠聲情表達故事內容, 係班裡面少數能夠說話攞滿分既同學, 令老師印象深刻!  上堂乖, 守規矩, 主動積極, 情緒穩定, 只係少少坐唔定, 但整體表現唔錯, 老師對佢好滿意....... 點解?  點解老師心中既小明同我屋企個個差咁遠既?  係咪同一個人黎架?!!  不過都慶幸蔡老師欣賞小明 ^^  成績就退步左啦, 尤其係數學, 求其做點會有好成績先得架?  一個好大既教訓!  驚喜既地方就係普通話 A+ 音樂攞 A-, 終於唱歌冇再高 8 度   >.<

小明仲帶我地去睇佢既貼堂, 貼係樓梯係人經過都見到, 好威水!

知道自己既不足, 努力改善!  老師欣賞既地方, 繼續保持!

小慈小明加油!!!

一日不見

只係兩公婆夜晚出街, 返到屋企就見到小慈放低 D 野係我枱面

好 sweet!  寫紙仔仲簽埋名添 ^^

打電話返屋企, 小慈會話：「如果而家呢個電話可以伸隻手出黎, 我好想媽媽摸我塊面!  又或者可以伸到個嘴出黎錫一啖就好喇!  我好鍾意俾媽媽錫同埋摸我架!」 呢個女由細到大都好嗲 ^^

如果夜晚見唔到面, 第二日就會多左隻黐身既豬仔!  一定要我陪佢坐梳化, 坐到埋一埋, 坐坐下仲瞓埋係大脾

我塗緊潤唇膏, 小明對住我豬嘴我就幫佢塗埋, 塗完潤唇膏, 小明話：「我唔係要呢 D.....」原來佢嘟起個嘴要我錫佢   ^3^

問佢, 爸爸媽媽唔係屋企, 你尋晚做左 D 咩呀?

小明：「唉呀!  你唔好問我呢 D 野啦!!」 @.@

後來先知, 佢成晚玩 iPad 唔想我知, 唔想答, 原來面皮厚厚既郭小明都會覺得唔好意思  :)

我其實係好霖好霖佢地咁黐我架!  每日放工返屋企, 懶用鎖匙開門既我會按門鐘, 兩姐弟就會大叫「YEAH!!  媽媽!!」跟住爭開門俾我, 一開門就又攬又錫又抱, 擾攘一輪先關到門, 好窩心, 好貼心, 好直接咁表達對媽媽既思念, 一日不見如隔三秋一樣 ^^

感謝天父賜給我這樣的寶貝!  令我想起早前網上有篇文章「我的愛不如孩子多」, 共勉之~~~~~~~~~

~我的愛不如孩子多~

1)  我心情唔好既時候，我會對她發脾氣，甚至會避開她。而她心情唔好既時候，我卻阻止她發脾氣，我會批評她，而她從不討厭我，還要想方法討好我。

2)  當我很累的時候，想自己一個人待著，不允許她來打擾我，甚至會鬧她。而當她累的時候，我卻希望她不喊苦不喊累，而她即使不情願，也會盡力去做。

3)  我會對她指手畫腳，她做不到就大聲喝她，說她的不是，而她不但不敢對我作任何辯駁，還會剋製自己的恐懼來討好我。

4)  我會用氹騙、恐嚇的手段來讓她做一些事情，而她依然對我絕對信任。

5)  多少次對她說：「我唔理你了。」而她的心從沒離開過你，連視線也沒脫離過。多少次你把她推開，而她依然抱著你的大腿大喊。

孩子更愛我們，是我們不懂得珍惜這份愛，是我們在慢慢地把孩子從我們身邊推開。

當你要對孩子生氣的時候，請你想想，

或許，我們的愛，真的不如孩子多。

香港歷史博物館

小慈要做常識科專題研集, 研究香港今昔, 早前已經跟學校去參觀香港歷史博物館, 柴娃娃走馬看花, 老師又要佢地專心聽講解, 完左返去先填寫資料. 傻豬小慈參觀完咩都唔記得晒, 份 project 漏空既頁數比填滿既還要多, 但其他同學仔又全部交晒喎!  咁點算呀?  唯有死死氣星期六同佢出去再參觀多次羅, D 問題唔參觀唔識填, 冇計啦!

為配合「欣賞香港」運動, 康樂及文化事務署轄下所有博物館 1 月免費開放一個月!!  嘩~~  岩岩遇著剛剛, 我地賺左免費入場 ^^

初期既香港主要係水上人、福佬人、客家人及本地人為主

戰後, 大量移民湧入香港, 居住在山下的寮屋, 衛生及設備均不理想, 一場石峽尾大火更燒左我婆婆間屋, 半夜匆忙間只係拉住我媽隻腳仔就走, 走遲 D 就燒死, 死左就唔會有我出世, 亦唔會有小慈

政府安置我婆婆入住 7 層徙置大廈, 婆婆、公公、太白、我媽媽、阿姨，6 個舅父, 總共 11 個人就係住係 2 間示範中既 11 平方尺單位.  後來我媽媽結婚, 婆婆俾左一間媽媽做新房, 所以我都住過 7 層大廈架, 記憶中沖涼去廁所都要行好遠去公共浴室, 洗衫就要去公用水龍頭, 媽媽要係走廊炒菜, 今晚食咩餸隔離屋一定知!  後來遷拆重建搬去公屋居住環境先有改善

經濟開始蓬勃發展, 咩店舖都有

雜貨舖以前用報紙包紮食物, 不衛生但環保

努力做功課的小慈

見到 D 咩?  呢個紅白膠波、呼拉圈, 我細個都有 ^^

花占餅、手指餅、椰子糖、水泡餅、山渣餅、牛奶糖、眼鏡朱古力.... 我細個全部都有食過  ;p

英文字母擦膠、劍仔、竹籤、拍紙簿、藍紅黑原子筆..... 我全部都玩過用過呀!

呢間士多實在睇到我好興奮!  小慈都感染左我既快樂 ^^

叮叮呀!  呢架去灣仔教堂

飛髮舖

以前排隊等剪頭髮時會睇書仔, 而家應該係全部玩緊手機, 十幾廿年後又唔知玩咩打發時間

70-80 年代, 差不多所有婦女都識車衫, 小慈既嫲嫲都係靠車衫供小慈爸爸同姑媽大學畢業

終於參觀完, 小慈亦都完成 project , 同佢去 tea 一 tea ~

Dazzling 經典可可、熔岩焦糖蜜糖吐司、烤布蕾栗子拿鐵

吐司沾雪糕, 好味!

小慈近期至愛 -- 蛋黃哥