實體崇拜

繼上次助道主日之後, 疫情又再一次隔絕我地, 足足要等 3 個月先可以返教會實體崇拜!!  主日學今日仍然網上授課, 為免教會網絡大塞車, 我地決定係屋企上埋先, 你睇我兩個寶貝幾自在

跟住即刻飛的士返教會, 勁呀!  8 分鐘就出到九龍塘

好掛住呢個禮堂!!  小慈小明既少年崇拜未恢復要參與大人崇拜, 不過唔可以同我地坐要另外上去 2 樓!  弟弟第一次以少崇身份參加問佢感覺如何?  佢話現場震撼好多, 一奏殿樂張櫈都震震地, 牧師對住會友打招呼唔係對住空氣都風趣好多 :D

好開心團契 zoom 左幾個月終於變番實體, 我地決定同團友仔一齊熱下身, 鬆下繃緊既筋骨

雙手向後伸直夾住雞翼, 呢個動作對舒緩肩頸痛好有幫助架!

向上提腿, 伸直腳, 空中踩單車.... 收肚腩功效一流!

疫情令大家隔絕幾個月攪到生日會都延遲左, 唔怕, 我地一次過慶祝半年!!

10 月之星既爸爸要開工, 攞住個蛋糕盒當慶祝左啦!

7-12月之星有 23 粒咁多, 呢 10 位係代表 ^^

難得既大合照!  見到大家都健健康康, 精精神神好好呀!

K1 既培 B 終於將最細既 B 位傳俾翊廷 

好耐冇抱過咁細個 B, 難得佢又俾我抱梗係攬住唔放 :)

好兄弟智賢冇見一排又高大左,真係有大哥賢風範!

黎啦!  翊廷, 一二一二行啦!

呢幾個六年級至 Form 3 既青少年係我地團契時間走均成間教會玩捉依因, 跑到成身濕晒開心到不得了!  

難得的相聚, 大家都好好珍惜!

進度理想

差不多已經復課一個月, Form 1 仔小明進度理想, 有小慈家姐呢個熟人係度, 所有問題都迎刃而解啦!

學校社工都非常關心佢地適應得好唔好, 為佢地打氣

兩個班主任都好好人, 上堂仲同佢地自拍添!

暫時跟學號坐, 女仔先, 跟住到男仔, 小明雖然坐第二個位但有大大隻既柏苗坐前面, 抄黑板都有 D 阻礙 :DD

終於影晒全班

學習上都跟得上, 不過係忙 D, 日日都有測驗默書, 好在範圍少溫一陣就攪掂

第一次默書就有 100 分!!

英文 unseen dictation 都係錯 2 隻字, very good!!

上堂積極回答問題老師非常欣賞, 開學冇幾耐就收到第一張天使咭, 開心到放學即刻影俾我睇!  小明舉手答問題到一個程度, 老師話要俾機會其他同學試下先下 :DDDDD

帶 PE 衫返學校換混亂左一堂之後, 有要求著住返學咁就唔會多人聚集更衣室, 又除又戴口罩咁危險!  疫情唯一帶來既好處估唔到就係可以著住 PE 衫返學!  梗係開心啦, 佢地話套衫型好多

今晚又自己同自己剝牙, 隻牙鬆少少整到佢食飯唔暢快於是就徒手一野剝左佢 @.@  而家仲有 2 隻上犬齒, 4 隻大牙就甩晒所有 BB 牙了

做做下功課發現天花板有野

係個心呀~~  鑽左入我地屋企 ^^

除左多測驗, 弟弟逢星期六都要返學校上增潤課程以提高英文水平!  星期六冇小慈家姐就要自己一個返學, 問佢去到邊就影張咁既相俾我, 點估呀大哥?!

見你咁辛苦一星期返足 6 日學, 獎勵你食個豐富午餐啦!  而家去餐廳食飯都好與世隔絕下架

古靈精怪, 大個仔大個女唔駛同我 share 一個餐自己可以食晒!  肉是這樣練成的!

恩恩愛愛!  弟弟而家肉厚真係幾好攬架 :DDD

努力做個好學生!   一分耕耘自有一分收穫, 加油!!

中秋四日長假

萬眾期待連續四日假期, 好少中秋會係10月1日, 補假再連埋星期六日, 名副其實 long weekend, 正呀!

瞓到自然醒, 鞭策小慈小明做晒所有功課, 我地就可以輕鬆出下街, 話晒中秋正日一家人團團圓圓, 放寬 4 人限聚岩晒我地, 今晚決定食好東西!

問佢地想食咩, 第一時間就話要食牛肉, 秋天要 BBQ 喎!

食啦食啦!  問得你地都預左會獅子開大口, 食多 D 肉谷你地肥 D 先

小慈最喜歡食煙肉, 成個爐都係佢既至愛開心到要影相

小明子每次食飯都一定要有湯

一睇就知 D 湯新鮮滾熱辣

而家大個會自己襯衫出街, 呢位充滿童心既小朋友仍然喜歡恐龍, 自己襯晒一 set 衫褲, 唔行佢後面都睇唔到, 好可愛啊~

趕住返屋企放火

朋友仔送左兩個電子燈籠俾我地, 小慈自己砌, 俾面地玩左一陣

最開心都係一年一度玩蠟燭

今晚好大風, 兩姐弟要同 D 風搏鬥, 點完又被吹熄, 樂此不疲

難得地一次過點著咁多支, 點知影完呢張相就全部熄晒, 即刻慘叫~~

玩到變左 camp fire, 集中 D 冇咁易吹熄

多雲但大風, 天空吹到千變萬化好好睇, 呢張好似一條龍仔有明亮既眼睛

Moon 姐姐出來了

小明子要返學校補英文, 我捉左害怕病毒拒絕出街既宅女小慈去食早餐, 係沙嗲牛麵先引到佢出去

買左兩盆怕怕羞羞返屋企

又俾我買到好耐冇食既薄殼, 原來自己用沙茶醬炒非常好味

呢位睇住燒雞翼食雞翼既小朋友非常豪邁奔放

砌埋圖案俾我影相又點話

豪邁奔放例證二

家庭遊戲時間, 今晚小慈終於成為大富翁!

4 日假期飲飲食食玩下瞓下就完左..... 絕對有後遺症, 個個患上星期一綜合症

回歸現實, 又期待下一次長假期!  人生先會充滿希望架麻!

中秋節快樂!