升班

每年 6 月既最後一個星期六都係詩班既重要日子 -- 聖樂部就職禮 ^^

兒童詩班及初級詩班一齊獻詩

I just keep trusting my Load :)

初詩大合照

小慈由 4 歲開始在兒童詩班唱歌事奉, 二年級升初級詩班, 而家升中二, 小慈由初詩再升一級到少年詩班了!  5 年前既一幅相何其珍貴 ^^

初詩升少詩名單

多謝 Queenie 姨姨、敬慧姨姨及家蕊姨姨多年既教導及照顧

5 年前小慈升初級詩班既相, 好得意呀!  可惜今日李樂柔同蕭美慈都不在

典禮後, 我地又搭教會安排既城巴去晚宴場地

食 buffet 最開心

今年仲有雪糕食!!!  多年來向主席爭取要有飯後甜品, 終於得償所願, YEAH!!!

淨係詩班都 11 圍, 勁呀!

初詩自己都包一枱

乖仔落力幫我攞野食, 知我鍾意食芝士焗蠔同埋焦糖燉蛋, 起勢咁攞俾我, 呢個背影非常孝順

教會裡的好姐妹

影張家庭照留念先

初詩夜晚人多過下午, 二年級去到中一其實都幾難兼顧, 但有音樂將大家連在一起 :)

嘩~~  經典呀!!  我地希幔詩班終於有張聚餐大合照, 人數仲係雙位數添呀!!  太感動!!

開心的一晚, 用聲音讚美主!!  Sing Hallelujah to Our Lord!!!

16 年的藍寶石

不經不覺結婚 16 年了, 是謂藍寶石婚!  藍寶石是一種奢侈的裝飾品, 藍寶石象徵忠誠、堅貞、慈愛和誠實!  Very good!  I like blue ^^  一早, 面書同仁已經造左條片恭賀我, 好 sweet 啊!

今年既結婚週年真係好開心, 首先係秋秋可以連放兩日星期六日陪住我, 另外就係, 我終於成功申請調遷可以轉部門返工了!!!  一收到好消息, 我就決定買禮物獎勵自己同埋我最愛既家人, 呢 4 位就係我地屋企既新成員了!!  未返到屋企已經改晒名: 爸爸 Whale, 叉臍, 大頭, 仲有我既 Kissy

有個小朋友對佢地愛不釋手 :D

6月22日星期六, 今日好開心亦好忙碌, 首先要帶呢位坐第一行都開始睇唔到黑板既小妹妹去攞眼鏡, 由 4 月訂造到 5 月尾先起貨但今日先有時間攞, 真係等到頸都長!  四眼小慈出世喇!!

姿姿既生日飯本來約左 6.12 但因修例既緣故要押後, 一押就好難約, 終於今日連埋 Wendy 既生日飯一齊食, 黎到先知呢間餐廳係 Cherrie 既舊生做揸 fit 人, 世界好細啊!  揸 fit 人好識做咁送甜品俾我地慶祝 ^^

馬不停蹄, 同我班好姊妹食完個 lunch 就約我既心肝寶貝去玩慶祝結婚週年紀念了!  秋秋放假, 唔想淨係食餐飯咁單調, 於是我提議去做 D 未做過既野, 住左沙田咁耐真係第一次幫襯呢間保齡球場!

各自入自己個名, 你睇大家幾簡潔

梗係由爸爸媽媽開波先啦!

小慈話戴番眼鏡睇得清楚 D, 眼鏡姐弟更加似樣 :D

呢條並非免落坑球道, 但小明有打不死精神, 0 支都冇所謂, 叻仔!

小慈就隻手伸得唔夠直, 次次都打斜就直接落坑, 好沮喪

第一次算唔錯啦!

第二局明顯大家都冇力了.... $95 玩 2 局包小食飲品, ok 啦!

樓上打完保齡球, 意猶未盡, 去埋樓下唱卡拉 OK!

非常有進步呀, 分類直頭有埋福音歌曲, 實在太開心了!!

開金口喇喂~~~

兩姐弟基本上係霸住支咪唔俾我唱既, 連一人一段都唔制.....

最好笑係小明, 連唱 3 次 Alan Walker 既 On my way

唱到 10:30 pm 冇電了

好 High!  我既小寶貝簡直盡得我既珍傳, 完全係一對咪霸!

多謝你地帶俾我同秋秋咁多歡樂, 令我地既二人世界添上無限色彩!

秋秋, I love you!

二百萬人的父親節

今日係父親節, 小慈小明一早已經預備禮物送俾爸爸, 為佢頒獎 ^^

馬不停蹄, 除左同自己爸爸慶祝, 亦都要同其他爸爸仲有在天上的爸爸慶祝, 返教會父親節獻詩!  幾難先令到小慈著裙, 即刻影張相

今次係小慈最後一次同小明一齊獻詩, 小慈要升級了

獻唱別具意義的 Give me Wings, 小明仲被訪問添, 好有趣啊!

PowerPoint present 既相就係佢地三父子女去長州一齊玩鋼架時影的, 竟然佢地三個都唔記得 @.@

Good job 初級詩班!

小慈家姐考試中, 獻完詩就要走, 經過小溪發現大量魚仔, 閃令令的眼神哀求我俾佢地捉幾條返屋企陪孤單的銀魚

一家大細都俾佢地撈晒返黎, 大佬改名黃針尾

為左佢地, 小明成身多左十幾塊蚊爛, 犧牲真係好大!  不過望住佢地溫書做功課特別醒神, 被咬都值得喎

等埋爸爸收工就去一間好耐冇去既酒樓食父親節餐, 又平又抵食的, 最重要係唔分時段啊

望海中的小明

一家人齊齊整整是一件不容易的事

等 20 分鐘巴士又如何

 這夜的香港特別美, 人們由早到晚上街為反暴亂和平遊行爭取自由

可能嗎? 問自己的良心

同心的香港, 200 萬裡有多少的爸爸!  在這特別的日子祝你們父親節快樂!

我愛香港!

甩繩馬騮

考完喇!  考完喇!!  為期4日每日考兩科既第一次呈分試終於考完喇 ^^

弟弟成績普遍有進步, 中文、常識由 B grade 升 A grade, 超過 90 分真係好叻仔!!  Science、聖經、普通話 keep 住 A; 英文 keep 住 B; 最厲害係音樂, 份卷終於合格, 唱歌吹牧童笛仲有 41/50 分, 加埋總分升 B grade 啊!!!  媽媽超感動!!  可惜, 數學唔知佢攪咩肥左..... 希望其他科升 grade 既分數, 拉上補下 keep 到 Band 1 既成績啦... 成日都驚嚇我呀衰仔!!

考完試就一身輕鬆, 日日都玩唔同花臣真係俾佢笑死!  首先捉住小慈家姐玩桌球, 收埋左係枱底封晒塵既佢終於重見天日

誤打誤撞, 本來想整啫哩不過搵唔到膠杯, 反而搵到雪條模, 弟弟就話不如照整雪條, 發現啫哩粉整雪條原來係好好味噃, 雪條會因為外層先溶變成啫哩皮, 真係好好味, 又平, 一包 $4 既啫哩粉可以整半打雪條, 超抵!

話自己係正在登基既國王 :DDDDD

極度鍾意我張床成日係上面碌黎碌去又呢埋

自己打機, 坐到成個 L 咁

捉住爸爸打機

爸爸好有阿仔心 download 左好多小明喜歡的歌入手機, enjoy 到即刻連機都唔駛打

派晒卷, 按分論賞, 小明好多份卷超過 90 分, 老師有送學業成績獎勵券俾佢, 其中一科英文小明有顯著進步, 老師仲親筆寫左「進步」兩隻字鼓勵弟弟, 開心到不得了!!!

獎勵券係咁用既, 30 張可以換一張細證書, 90 張換中證書, 180 張就換校長親筆簽名大證書一張.  舊年弟弟 4 年級已經儲夠 180 張爆機換左張大野, 呢堆係淨番既, 點知弟弟話攞 3 疊 (10張一疊) 去換張細既, 跟住再繼續儲到 90, 咁就大中細證書各有一張, 集齊一套 :D  希望佢畢業前可以誠心所願啦!

成隻甩繩馬騮全日扎扎跳, 同之前叫佢溫書成隻樹懶既反應真係截然不同

弟弟宣告暑假已經開始, 不過媽媽未有假放, 小慈家姐又未考完試, 自己係屋企玩住先, 遲 D 先出街玩下, 乖!

小五呈分試

殺到埋身喇!  話咁快就到弟弟小五下學期第一次呈分!!  真係巧剪漿......

我地由復活節假已經開始溫書, 但都要等學校出左考試範圍先可以出盡力溫習, 點知老師既心態同我地一樣, 一出考試範圍就出盡力俾功課, 要趕番晒所有課程!  最好笑有本 workbook 平時好生面口, 竟然要佢地一晚做晒 6 個 exercise 真係人都癲 @.@

小明都洩氣架, 平時係學校已經做晒功課返屋企可以嘆世界, 而家功課多到晚晚八九十點都攪唔掂, 仲未計溫默書呢?!  真係想抽時間溫書都難.... 老師下次可唔可以有 D planning, 唔好炒埋一碟, 會 C 人架!

未到考試週都已經有好多隨堂考試, 口試作文普通話音樂都要溫, 閒科攞 A 咁成績表會靚仔 D 麻, 話晒音樂都 x 2, 聖經又 x 2, 視藝 x 3, 常識 + Science x 6, 不過最重要都係中英數 x 9 架!  唯有星期六日爭取時間溫書, 間場真係只可以休息 10 分鐘, 我都肉赤不過冇辦法, 忍下啦, 辛苦一個月放暑假玩兩個月, 抵啦!

苦中作樂, 小明既答案係我心目中真係 100 分架!  不過可惜老師既標準答案係唔一樣.....

其實個個小朋友都係獨特既, 強弱既地方都唔同, 整麵包都唔係個個一樣啦!  以小明為例, 佢音樂方面真係好吃力, 又要佢唱歌、又要吹牧童笛、拍拍子仲要考埋樂理, 真係攞佢命 @.@  我已經要佢將勤補絀唱多 D 吹多 D, 值 10 分既音樂會報告又非常有心機做, 希望佢今次生生性性合格啦, 音樂都乘大兩倍架麻!

Try your best and God will do the rest!  祝小明考呈分試旗開得勝, 掂過碌蔗!!

加油!!!