遠近慈明

2017年11月24日星期五

小四家長會

學校出通告話開小四家長會傾小五精英班安排並認識教與學重點, 時間係星期五晚 6:30 pm, 時間非常之趕, 又加上我其實已經知道個遊戲點玩, 本來唔想去, 但諗諗下, 學校好少攪呢 D 晚間活動都應該支持下

要 OT, 放工飛的士去都已經完左上半場, 聽唔到教與學重點 :p 好在都有得去弟弟班房參觀 ^^

弟弟坐門口第二個位, 因為佢係「門口長」負責開門關門

一人一職服務自己班

呢個職位都有, 老師真係好有創意 :D 弟弟解釋話因為佢係領袖生成日要當值先唔可以留係班房服務同學, 唯有做門口長

班主任李老師, 佢新黎架, 負責教 Science 同數學, 佢話呢班好純, 好乖, 但輪盡, 成日欠功課又掉亂晒 D 野, 多改正多摺角欠認真, 但同學之間友愛又會關心老師, 會重點教育小朋友秩序、禮貌、責任

睇壁報板都知老師教育既方向

弟弟欣賞同學十分乖

同學仔欣賞小明十分幽默 ^^

祝學校 27 歲生日快樂

高級合唱團小慈小明齊齊獻詩

中文擬人句分享

弟弟呢句作得好都有得貼堂 ^^

好可愛的一班, 喜見弟弟都有快樂的校園生活

2017年11月19日星期日

The Hope of Glory

初級詩班每兩個月獻詩一次, 每次獻詩都會同佢地影相, 每次影相, 都總會覺得佢地唔同左樣 ^^

難得正經的小明, 影相前竟然要除眼鏡, 話靚仔 D 喎~~

今日獻唱 The Hope of Glory

好好聽, 係指揮 Queenie 姨姨既飲歌

長大了! 有 D 已經高過媽媽!

Glory to the Lord!

2017年11月10日星期五

小明 3 歲半時自己舉手決志信耶穌, 原來有跟進架! 除左每個星期返主日學同兒童崇拜, 教會既姨姨仲會同小朋友栽培, 都係講清講楚咩係基督徒, 甚麼是救恩, 重新得救等等....

今年返暑期聖經班, 好愛主耶穌既小明原來又舉手決意跟隨耶穌! 我都唔知, 直到教會既姨姨打電話俾我約時間同小明做栽培, 我覺得奇怪, 咪栽培左羅? 原來小明 3 歲時既栽培係初小, 而家小明係高小級, 係時候栽培多次, 之前佢細個可能都知 D 唔知 D..... 嘩! 教會真係好好呀! 咁細微既野都兼顧到不特止, 栽培完仲有得領獎 ^^

一年一度栽培員家會, 一齊飯前祈禱先~

小慈家姐今晚要補習, 小明與媽媽「獨處」, 鬆毛鬆翼

小明極度欣賞呢粒迷你金莎, 仲有呢位小朋友非常似爸爸鍾意嘆教會沖既茶, 飲左三杯

家會要開始了

頒獎時間, 好多禮物呀!

完成兒童栽培課程 (高小) 得獎者, 郭小明! 由文牧師頒獎

麗芝姨姨係小明既栽培導師, 佢分享話栽培過程中, 小明係佢咁多年來, 第一位主動舉手要求做結束祈禱既羊仔, 通常大家都會好怕開聲祈禱, 估唔到小明咁細個唔怕之餘仲咁主動, 令佢印像深刻 :D

多謝麗芝姨姨呢位羊媽媽既愛心教導 ^8^

天父, 我得左喇!

遊戲時間!

Keynes 叔叔同健英姨姨今日帶領大家玩「尋出路」遊戲, 非常好玩

呢個就係路線圖答案, 行岩可以繼續向前行, 行錯就要派另一位組員由頭再行過之前岩既路

教會係天父既家, 每次我地回家都真係好開心架!

2017年11月7日星期二

最後一次學童牙科保健

原來, 學童牙科保健睇到小學畢業就冇得再睇, 中學要自己出去搵牙醫! 點解呀? 學童保健都包到中學點解唔包括埋牙科呀? 小六都未換晒恆齒......

約左個期 4:15pm 但 4:30pm 先醒起今日要睇牙醫, 小慈仲補緊習添 @.@ 即刻帶佢走跑去牙科診所, 好在仲有得睇, 撞到幾個同班同學仔. 我問小慈點解同學仔去牙保你都唔醒起自己要去? 佢話唔知大家同一日喎

等下等下已經冇晒人

唔怕, 媽媽陪你

有電話可以打下機消磨時間, 小慈用左豆豆同大佬做 Profile picture, 不停話張相好靚, 仲有 Grace 豬

爭取時間做功課添! 小慈真係好乖架! 媽媽錫晒 ^8^

話咁快洗乾淨棚牙

牙醫治療師同我講小慈天生上顎少左一隻牙 (15 號), mark 住 U 既係未出既牙, 都仲有 9 隻, 睇怕出晒都要箍牙了.......

我地有私家牙醫 3 歲開始跟進, 冇有怕!

2017年11月5日星期日

成為孩子們的摩西，帶領他們出「為奴之地」

寫得實在太好, 不得不分享!

【考驗家長的香港教育制度】

我覺得香港的教育制度，其實不是考孩子，而是考父母的！

由準備孩子入讀幼稚園那一刻，家長已經開始要好似做 Report 一般，不停資料蒐集。之後就要想盡方法幫孩子入到心儀的學校：搬屋，造假地址；想入基督教學校，讓孩子洗禮，或搵（未必好熟嘅）教會牧師寫推薦信；砌份 portfolio 俾心機過自己份 CV；上堂學幼稚園 interview 技巧，想盡辦法希望兩歲的小朋友能回答故意叼難的面試問題。只要能入到學，付幾千至過萬學費都制，可能已經是最無所謂的考慮因素。

到要升小學的時候，報考直資小學又再來多一次，今次更要攪到孩子十八般武藝！報校直頭好似打機一樣，要上網搵攻略！當孩子升上小學，教育制度對家長的要求同樣升級，成為每天的靈性考驗。

作為父母的，每天已經工作得筋疲力竭，回到家與孩子花最多的時間，不是親子同樂，卻是功課和溫習上的角力。見著他們仍在做功課，心裏替他們辛苦；見他們在休息看電視，又緊張他們幾時把所有功課做完。跟他們溫習，錯的地方只會不停重複地繼續錯，明明之前「溫到嘔血」的，轉過頭又忘記得一乾二淨！

我真不明白，為何同一個範疇，作業要做，補充又做，但孩子仍是掌握不到？而令我更不明白的是：既然這方法不見成效，為何仍要繼續採用？不停面對挫敗，孩子和家長一樣沮喪！

還有每天手冊寫著「欠這缺那」.... 孩子還年輕，未明白和完全掌握盡責任這課題，有甩漏是在所難免的；但當「可以理解」的小問題不斷出現，其實在考驗家長的耐性和脾氣的底線！

未為人父母之前還大言不慚地說自己能抵抗制度，不讓孩子成為做功課機器，但事實是自己成為了整個系統的奴隸.... 所著緊的，其實不是孩子能否名列前茅，而是擔心孩子能否適應到「教育制度」這遊戲的玩法。

要孩子鍾意坐定定溫書多過去玩，
要孩子記得標準答案，而不是得到知識，
要孩子劃一而非發掘他們的特性，
要削弱他們的創意，加強他們的記憶力，
要孩子接受自己永遠都唔足夠，似乎是香港教育的目標。

香港教育制度用分數去斷定學生優劣成敗，分數足可影響或摧毀他們的一生。而令家長最痛苦的，是不能不接受這個反智的教育制度。

願上帝給為人父母的，有勇氣和能力，成為孩子們的摩西，帶領他們出「為奴之地」。

2017年11月3日星期五

小六最後一次旅行

每年旅行, 小慈都好想有部相機可以同同學影相, 但屋企部大相機咁重, 點放心俾佢帶去? 仲要係戶外地方又跑又跳咁, 部相機好容易衫長褲短 @.@ 學校又唔俾用手機影相, 我又唔會因為呢個原因而買部傻瓜機........... 小六, 最後一年小學旅行, 好快就同同學仔各散東西, 我都想小慈對佢既小學同學有所懷念, 於是我膽粗粗問朋友借傻瓜機, 真係有好心人呀!!! 小慈非常高興有相機用, 多謝惠清姨姨慷慨解囊 (^8^)

小慈高小旅行, 以下就係佢既相片紀錄 ^^