2010 年12月6日 (MON) Day 4 自己上堂
小明要自己上堂, 我真係好緊張好緊張 >.< 尋日仲要去迪士尼咁開心
今朝同小明講: "弟弟返學喇, Bye Bye 媽媽喊唔喊呀?"
小明又識答我: "唔喊, 媽媽返工, 工人姐姐 stay home!"
我一手拖一個咁返學, 換完鞋仔先帶小明入課室放書包掛名牌, 再出黎拖埋小慈一齊吱消毒噴霧清潔手仔準備入課室, 我仲盤算緊點同小明分手之際, 屠老師一見小明埋黎吱手就要佢 bye bye 媽媽跟手抱左佢入課室!!!! 弟弟反應都好快, 即刻坐落地大喊但未喊出聲就俾人抱走左 @.@ 我同小慈面面相覷, 大家都好愕然!! 既然係咁, 我唯有扯罷啦, 希望弟弟冇事.......
今日返 1.5 小時 10:30 am 放學, 工人姐姐接小明, 話小明對眼喊到腫晒但見到佢時冇喊, 冇著校服換左自己衫, 班主任連老師話佢喊左 1 個鐘, 詳情會打電話同我講 @.@
喊 1 個鐘 ???!!! 好似等左兩個世紀先聽到班主任連老師既電話!! 連老師第一句就話希望工人姐姐聽朝黎幫手照顧小明到 9:00 am, 等全部老師返齊學校就有足夠人手一對一照顧小明, 好希望小明由頭到尾都係由一個老師照顧等佢有安全感, 因為朝早既當值老師日日唔同, 今朝係屠老師但聽朝未必係佢咁小明適應就冇咁好
連老師係話小明脾氣大, 一般小朋友喊有老師抱住都會安靜, 但小明係抱住都會勁掙扎個隻!!! 喊足一個鐘頭, 唔肯入自己課室, 唔肯埋位, 屠老師成朝拖住佢行來行去, 去搵小慈時有安靜, 小慈又好乖有幫手安慰弟弟, 但小慈要上堂要行開, 小明就即刻喊, 脾氣大到自己除左隻鞋掉落地 >.< 真係經典呀!!
弟弟又要揹書包話走, 要放學返屋企, 要搵媽媽, 要搵工人姐姐, 知道佢鍾意食生果都有引佢, 同佢講條件, 話食完生果揹書包返屋企都肯, 有安靜, 飲水時論盡整濕校服所以幫佢換左自己衫, 一換衫小明就笑, 知道有得返屋企開始合作, 所以之後既半個鐘都冇喊 @.@ 死火, 咁聽朝可能唔肯換校服喎!!
連老師明白小明好困惑, 由 3 個月大開始小明已經日日黎學校接小慈家姐放學, 對學校好熟悉, 明明次次黎學校都可以去玩車仔玩滑梯, 點解而家著左校服就唔俾玩又要排隊? 要小明守規矩係辛苦既, 要俾時間佢適應, 所以希望聽朝工人姐姐幫幫手, 陪小明到 9:00 am 先交俾老師, 一來唔會所有親人突然冇晒, 二來俾佢跟定一個老師有依賴, 而家咩方法都試下, 再睇情況
1 個鐘呀!!!! 阿仔你點可以喊 1 個鐘架!?!? 真係聽到都肉赤 >.< 小慈個時都爛喊, 喊左大半年, 但每日喊既時間都好短, 只係 bye bye 媽媽個時喊, 最長個次就係第一日自己上堂喊左 20 分鐘, 第二日都只係喊 5 分鐘咋!! 小明一野已經破晒小慈紀錄, 真係一山還有一山高!! 校長唔知有冇後悔收左我呢兩隻小鬼呢....
2010年12月7日 (TUE) Day 5 返學 1.5 小時
感謝神! 感謝神!
小明今朝換衫揹書包出門口返學都冇問題, 只係唔肯同我講 bye bye 大喊 @.@ 工人姐姐陪住佢玩玩具, 小慈入課室交完功課都即刻出黎陪小明玩, 係一個好幫手非常乖 ^^
連老師話工人姐姐幫手照顧到 9:00 am 非常有用, 雖然之後同工人姐姐分開都有喊, 但今日肯拖住連老師, 仲有幫手派早餐俾其他小朋友, 不過佢唔肯食話要搵小慈, 連老師都有氹佢帶佢去小慈課室, 弟弟二話不說, 老實不客氣就坐係小慈隔離, 要小慈餵佢食早餐 (牛肉上海湯麵)! 小慈班主任都好幫手樂意俾小明留係度, 於是連老師同弟弟講 10 分鐘後返黎接佢, 之後要去番自己課室 ok 唔 ok? 弟弟有應承
連老師話今日既主要任務係唔再俾小明係學校走來走去, 要學習留係自己課室同小朋友一齊, 離開小慈時都有喊, 但應承一陣返黎搵小慈玩佢又肯, 都受氹, 有進步!
今日玩大肌肉活動, 小明玩住車車又醒起要搵小慈, 連老師諗計氹佢去壁報板搵小慈既相, 又受氹, 上次俾小明打左一巴既馬老師都有氹佢, 本來小明唔肯跟馬老師, 不過馬老師出絕招話幫佢換鞋仔返屋企就即刻跟到實!! 今日早點食香蕉完全開正佢個範, 小明竟然肯坐低食埋先走, 仲添食添, 添食就食剩少少, 連老師驚訝佢竟然識講:
"唔要喇唔該, 夠喇~~"
梗係啦, 我教架麻! 佢之前 NO 得咁過癮, 我話左佢好多次要講 "唔該" 唔可以冇禮貌, 教識左佢架喇! 連老師好欣賞小明今日好大進步, 開始知道返學既程序, 知道要留低係學校, 雖然掛住屋企人, 但受氹, 抱住佢冇勁掙扎, 肯俾人抹眼淚, 喊少左, 明白事理又講道理, 話左好就好, 叻叻 ^^
聽日返 2 小時, 預計佢都會再喊, 平時食埋水果就走得, 聽日要逗留耐 d 又會再喊 d d, 不過連老師有信心佢得
我打電話訪問小明~
我: "弟弟今日係咪叻叻呀? 返學唔喊喇, 係咪呀?"
弟弟: "I'm a good boy! 郭恩慈呢?"
我: "郭恩慈返學囉! 弟弟放學喇係咪呀?"
弟弟: "我食 banana 呀! 食好多好多 banana 呀!"
我: "叻仔囉! 係學校食 banana 叻仔呀! 有冇食晒呀?"
弟弟: "有呀! 仲有少少!"
我: "食剩少少係咪呀? 你有冇話俾老師聽你叫咩名呀?"
弟弟: "有呀! N1 郭恩明, 我冇 "唔知喎" 咁呀!"
尋日係俾佢笑鬼死, 有人問佢叫咩名, 佢同人講 "唔知喎!" 人地笑佢你姓 "吳" 架?! 真係俾呢個兩歲既人仔吹漲, 講就講唔睬你就唔睬你, 未聽過有人仔答得咁寸 @.@
我: "返學好開心架! 一陣你又去接小慈放學呀!"
弟弟: "搵馬老師囉!"
我: "係囉! 放學又去探馬老師囉, 仲有邊個呀?"
弟弟: "唔知喎! I don't know!"
我: "仲有見到連老師呀!" (衰仔! 又唔知喎)
加油呀, 弟弟!! 你做得到架! 你做得好好喇!!
2010年12月8日 (WED) 小明 Day 6 返學 2 小時
返左學 6 日, 班主任連老師已經好肯定同我講小明好硬頸, 有好厲害既自主權, 識打蛇隨棍上, 要大家就佢, 都幾野蠻, 娓娓道來弟弟幾宗罪 @.@
事源今日星期三學校有早會, N1-K3 大聚集, 人多加上小明有幾聲咳, 連老師要小明戴口罩, 小明堅決唔肯, 又要扭坐小慈隔離!! 小慈真係超級生性聽話, 佢為左氹弟弟戴口罩自己提出一齊戴!! 果然小明見小慈家姐戴佢就肯跟, 冇幾耐小明又扭指住門口要走, 小慈怕佢嘈住其他同學仔上早會, 弟弟一想喊 / 嘈出聲, 小慈就會拖實佢, 拍佢膊頭同弟弟講:
"唔駛驚, 小慈家姐係度!"
超級超級乖呀, 小慈!!! 咁錫弟弟咁有同理心既家姐真係世間少有!! 感謝天父 ^8^
早會之後入課室食水果, 今日食橙, 連老師知道小明咳就唔俾佢食, 弟弟即刻發脾四大喊!! 扭計話要搵小慈!! 老師要佢收聲先, 點知收左聲就扭要搵工人姐姐, 又話揹書包要走, 扭唔到呢樣就扭第二樣!! 今日加鐘放 11:00 am 老師話未走得住又發脾氣! 知佢喊到口乾請佢飲啖水, 弟弟唔肯飲, 老師已經氹佢用匙不水都唔肯, 超級硬頸 @.@ 氹到夠鐘放學真係一啖水都唔飲!
連老師唯有話: "今日唔飲水聽日再飲過!" 唔可以咁輕易放過佢, 唔可以俾佢野蠻!! 連老師都開始捉摸到小明, 今日雖然喊多左, 但佢有靜過既, 轉移話題係 work 既因為小明語言能力唔錯, 明白大人講既野, 不過要 1 對 1 先得!
小明而家都肯跟老師, 見佢每日都有進步, 第一日自己返學跟屠老師走均全校, 第二日跟連老師肯入課室, 第三日肯跟馬老師出去換鞋, 到今日兩個老師都跟! 不過真係唔欣賞佢既硬頸, 初初一兩日會就佢對佢鬆, 而家開始會慢慢收緊只會體諒佢, 同佢講多 d!
知佢掛住媽媽, 但唔可以發脾氣 連老師都有質疑我地係唔係好縱佢? 明顯睇得出小慈係就晒佢好錫佢, 都要教小慈, 弟弟做錯事唔岩要鬧, 唔可以人人都就慣佢, 老師明白到為人父母第一個 BB 會有多 d 時間, 多 d 耐性教, 第二個 BB 冇時間教就會傾向氹, 所以第二個 B 普遍都會惡死 d 硬頸 d, 希望我地會用平常心教小明! 先解決佢唔開心既情緒, 其他再慢慢教! 至於返學時間就改為成個 12 月同埋 1月 (即聖誕假期後) 既第一個星期都係返半日, 放 12:30 pm, 係學校食埋飯先走但唔瞓晏覺, 瞓覺對細 B 黎講又係一個大挑戰小明未得住....
聽連老師呢個電話真係聽到我面紅耳赤 @.@ 我最尾原來係聽到佢話改返學時間, 我以為佢勸我退學!! 以為佢話弟弟太細未聽教, 3 歲先好返黎啦~ 好在唔係 >.<
我承認我係對小明好容忍, 好寬鬆, 因為佢同小慈差太遠!! 連老師覺得小明硬頸, 以 1-100 黎計, 小明係 60, 小慈係 90 呢!!! 只係我唔想再用教小慈個套去教小明, 因為小明唔需要!! 好幾次小明發脾四, 我離開佢 1 分鐘再返去重覆要求, 小明已經就範! 當年既小慈, 我係用 1 個半鐘佢先低頭就範! 當年如果唔係用呢 d 咁高壓, 一步都唔讓, 鬥硬既手段教小慈, 同樣 2 歲時會爛喊 / 發脾氣 / 甚至打自己既小慈, 根本冇可能好似而家咁乖!!!
我自問自己亦都長大左, 好多野睇開左, 聰明左, 做媽媽既經驗多左麻! 咁你都可以話我 "縱" 小明既, 十隻手指有長短, 我自己知道同一套方法唔可以應用係小明身上, 方法一唔得咪試方法二囉! 不過小明返左學之後係惡死既! 成日想借勢發脾四! 應對語氣好倔兼帶有挑戰性, 好似想試我底線咁! 唔知佢係因為夜晚咳瞓得唔好, 定係返學唔習慣成日俾人管住唔高興, 所以心情好差?!
今晚係屋企佢都發左 3 次脾氣!!!
第 1 次係我放工返屋企問佢返學開唔開心, 有冇拖住連老師之麻, 弟弟無啦啦就大喊唔停, 我都冇理佢行開左, 一陣返去問佢收聲安靜未佢又冇野
第 2 次係工人姐姐同佢玩夾左隻夾係佢頭頂, 我見佢好 cute 同佢影左幾張相請佢望下鏡頭, 弟弟好大聲 "NO 呀!" 就大喊
第 3 次仲離譜, 晚晚都 say good night 先瞓覺架啦, 弟弟今晚同我講:
"唔 good night 媽媽!"
問佢兩次仲擰歪面推我走 @.@ 火都黎埋!! 衰仔你同我玩野?!
於是成個抱番佢落床, 出廳問佢咩事發脾氣冇禮貌? 佢又大喊!!! 我就真係刀槍不入架其實, 就望住你喊睇你喊得幾耐, 我只係重覆講:
"安靜, good night 媽媽, 瞓覺"
果然只係需要 5 分鐘 (我估, 冇睇鐘, 不過以弟弟 level 黎講已經係好耐) 自己突然收聲同我講:
" Good night 媽媽, 我要紙巾抹眼淚!"
我讚佢乖仔, 講 good night 有禮貌, 唔講媽媽唔開心, 喊喊冇人睬你呀, 發脾氣唔岩呀云云云云.....
我真係唔想重覆使用教小慈個套 "大傷元氣" 既方法, 不過小明似乎踏入 Trouble Two 魔咒, 都係要用呢 d 絕招破左佢架喇 >.< >.<
2010年12月10日 (FRI) 小明 Day 7 & 8 返學 ABS
都知返學會病, 只係估唔到一個星期就見效 @.@
小明有幾聲咳夜晚瞓得差已經知, 拿拿聲帶佢睇醫生, 醫生仲話我地太緊張!! 小明肺好清喉嚨冇紅, 乾咳多數係敏感, 點知到夜晚就乞嚏鼻水一齊黎, 仲發燒添!! 整定佢唔駛返學 >_<
不過唔等於佢係屋企會好乖, 繼尋晚無端端唔肯講 good night 後又一新傑作 -- 抗奶!!! 之前係飲剩少少唔飲, 之後係問左佢飲唔飲先開奶, 再之後係佢話要開奶都可以開左話唔飲就唔飲!! 而家連早餐見到支奶都即刻大喊打人罷飲!! 太過份喇!! 逼到我連工都唔返使出 Cry it Loud 絕招狠狠地整治修理郭恩明!!
我既 Cry it Loud 方法係先同佢講清楚, 定立明確目標要點做:
我罰佢企係櫈度, 同佢講 "安靜, 媽媽抱, 飲奶奶"
小明一定大喊話唔飲, 於是我行開, 1 分鐘後返去重覆我既要求, 佢唔肯我又行開, 2 分鐘後再返去, 跟住係 5 分鐘, 10 分鐘......
衰仔真係好聰明, 由初初大喊到聽唔到我講野, 到我之後每次入去佢都會轉移我視線, 我叫佢飲奶奶, 佢可以有以下藉口:
我要媽媽抱 / 我要落地 / 我要去街街 / 我要媽媽抱, 唔該 / 我要 go market / 我要返工 / 我要瞓覺 / 我要紙巾抹眼淚 / 我要食粥粥 / 我要菠蘿包 / 我要工人姐姐 / 我要食 medicine / 我要朱古力 / 我要睇 cartoon network / 我要揹書包 / 我想要被被
我不為所動, 重覆地講 "安靜, 媽媽抱, 飲奶奶", 非常忍心見佢淚流滿面涕泗縱橫, 我連紙巾都唔俾佢!!
呢場係硬仗, 我要攞番自主權, 唔應該亦唔可以再縱佢!! 老師已經話佢係學校話唔飲水就唔飲水, 發脾氣會除鞋掉落地, 而家係屋企又係咁?!! 咁細個人仔, 係我地要佢點做, 唔係佢要我地點做!
終於, 喊足 1 個鐘頭 10 分鐘 (小慈係 1 個半鐘) 小明投降, 2 分鐘飲晒支奶!!!!!
絕招只係用一次, 呢次唔成功我以後就俾佢食住唔駛教
非常攪笑地, 第二朝小明又係唔肯飲奶!! 佢入房搵我話唔飲奶奶, 我非常驚訝?!!! 我即刻好大反應咁話:
"咩事唔飲奶呀? 你係唔係想媽媽又唔睬你呀?!! 即刻出去飲晒佢!!!!"
弟弟唔出聲, 於是我拖佢出去, 2 分鐘又飲晒支奶! 你話佢係咪玩野丫? 反覆求證試我底線, 我唔狠心就玩完!
小慈又係咁, 小明又係咁 @.@ 完全由一隻天使變做魔鬼! Trouble Two 我唔鍾意你呀, 過主!!!!
