打兩針

之前都係諗住預約定, 可打可唔打, 點知成個暑假都收到學校既通告, 平時都冇咁緊密連繫, 而家問同學仔幾時打針就不停出通知!  學校好想有 7 成接種率咁就可以全面復課.....  遲早都要打架喇, 我同爸爸都已經前後腳打左!   於是, 開學前同佢地打一針, 開學後再睇情況!  點知小慈返黎話, 如果唔打齊兩針, 學校所有課外活動都唔可以參加  @.@  小慈今年被推舉為基督徒團契副團長, 仲有跳繩隊, 籃球隊.... 咁, 咪打埋第二針囉~

我已經好醒目 book 星期五放學打針, 預佢地就算發燒都可以星期六日係屋企休息!  沙田區打復必泰得好少疫苗中心選擇, 我地揀左去中大, 估唔到呢間大學醫院係新架!!

新到仲有裝修既氣味

打完!  痛到戴住口罩都 feel 到佢地冇晒表情

小慈有 1 日微燒 37 度, 弟弟就越燒越勁, keep 住 39 度, 燒到冇晒心機, 自動自覺一日沖幾次涼為自己降溫, 我仲逼佢貼退熱貼添

成個火球仔咁不過嗲到不得了, 係都要瞓廳, 又係都要瞓係我同爸爸之間!  除左燒都一直精精靈靈, 燒左兩日就冇事, 星期一仲已經可以返學

爺爺都打左兩針, 我地唔放心佢自己一個係屋企, 於是接左佢黎我地屋企住, 梳化變梳化床都幾好瞓架!  爺爺除左打針當日好攰同有微燒 37.2 之外, 一切正常, 住左三日就返自己屋企, 好叻仔!

小慈小明打完兩針都冇一個星期, 衛生署就話 12 - 17 歲青年打復必泰有患上心肌炎或心包炎風險 @.@  男仔有 32 個個案, 女仔有 5 個!!  仲要係打完針後 2-3 個星期先會出現心口痛, 即刻煞停, 暫時青少年打一針就夠 @.@  喂呀!  點架你地!!  我收到呢單新聞真係嬲架!!  成個暑假不停勸籲打針, 又話唔打唔俾返學, 又唔准玩課外活動, 而家打完先至話煞停 @.@  我已經好保守觀望, 開左學先打第二針都避無可避, 非常有白老鼠 feel, 決策部門冇溝通我地呢 D 星斗市民真係好無奈

仲要等 2-3 個星期先知道小慈小明有冇不幸地患上心肌炎心包炎 @.@  唔好呀!  求天父保守!!