小慈 5-6 年級時去健康院, 我同醫生講過小慈有姆趾外翻問題, 明明隻腳板係直既, 就係凸出左腳趾公舊骨! 健康院醫生好好, 寫轉介信去醫院排期, 一排排兩年到 2019, 小慈已經升左上中學, 我真係排到唔記得左!! 到我搵番張預約紙已經過左期 @.@
到上次轉去醫院睇脊柱側彎, 醫生又係問開小慈既病歷, 都係骨既問題我就順便問埋醫生腳趾骨凸出點處理? 小慈確實係嚴重左, 有時都會投訴著鞋整到舊骨會痛, 醫生又好好, 又寫紙我去排期, 今次好 D, 排一年半, 即刻記實個新症時間!
兒童骨科超級多人!! 無錯, 小慈未夠 16 歲仲係兒童, 候診大堂人山人海, 我地去到仲見到有人話等左三個鐘都未叫名嬲到走左 @.@ 下? 唔好啦, 等左年半先有得睇, 3 個鐘唔係唔等呀? 不過天父都對小慈好好, 等左一個鐘就到我地, 不過只係見左醫生 5 分鐘!!! 真係除鞋望一望, 輕輕掂下腳趾, 叫小慈郁兩下話佢唔嚴重就想 close file @.@ 我梗係即刻問問題 hold 住佢啦! 要唔要做手術? 配合運動? 姿勢? 買過 D 鞋? 工具? 醫生先至答我可以轉介去矯形外科做個腳架, 影埋 X 光睇清楚結構
又排期, 好在今次係排 3 個月, 小慈見到個部門名叫 "義肢及矯形外科" 好似好得人驚咁 XDDD 今日終於可以見到矯形師喇!
就係咁樣既姆指外翻, 實在唔明白點解小慈 D 骨好似好多問題咁? 脊柱又彎, 姆指又翻, 牙仔又唔夠位生......
15 度就係姆趾外翻, 小慈而家 20 度唔算好嚴重, 真係嚴重既腳趾公係會疊住其他腳趾架! 小慈而家唔需要做手術, 可以試用溫和既方法, 例如戴呢個腳架, 係屋企既時間就戴, 更加要戴住瞓, 日頭出街就用腳趾膠, 之前係鞋店都有買過, 今次睇醫生診金 $135 包晒咁多野
希望呢個架對小慈有幫助啦
一放學就衝去醫院, 攪掂晒先有得食飯, 其實已經係下午茶了! 餓到扁左食得超快, 成個餐自己食晒!!
小慈話我個餐咁有愛要我影相
2019不是升中二嗎？
回覆刪除