星期一, 第一個星期打完兩場攰到行樓梯都冇力, 第二個星期落雨怕扭親腳冇去, 第三個星期梗係要出現啦, 仲漸漸回復狀態, 一起手就入波添! 點知就係呢個時候出事, 被人撞一撞失平衡, 反應唔切本想用手撐地變左手腕跌落地, 腫晒.....
星期二, 敷左成晚冰, 手依然腫脹仲開始瘀黑, 究竟應該睇醫生定睇跌打呢? 都係睇醫生啦, 可以寫定 referral 遲下去睇物理治療麻, 點知醫生一睇到秋秋跌傷既位置, 就建議去照 X-ray, 開左止痛藥止痛膏同護腕載住先, 唔好郁到傷肢, 千叮萬囑即刻去照 X-ray, 不過我地攪得黎照完都 5:30 pm, 未有報告
星期三, 醫生一早打電話來話張 X-ray 見到有少許骨裂同關節移位, 要即刻去睇骨專科, 仲要直接去番 Lab 取 X-ray 片及報告俾骨科參考!!! 臨急臨忙去邊度睇骨科醫生呢? 打去問網絡醫生, 全部最快都要一個星期先有位, 點算呀? 感恩我有非常相熟既醫生朋友, 介紹我去仁安分科診所, 馬鞍山即日有位呀!
腫晒呀陰公..... 骨科謝醫生建議入院照 MRI 因為 X-ray 都唔係睇得咁清楚怕誤診! 睇完都 5:00 pm, 秋秋約左謝醫生聽日先入院, 因為我地今晚約左朋友食飯啦!
宴請美麗一家, 好多年冇咁齊人食飯喇, 今晚好開心, Peter 仲為秋秋入院治療祈禱添
泰式鮮胡椒蟹大家讚口不絕! 秋秋今日冇力炒蟹, 全程遙控姐姐幫手 :DDDD
星期四, 一早入院等照 MRI
我收工趕去醫院岩岩見到謝醫生, 仲可以陪住秋秋打石膏添
真係瘀黑色呀! 謝醫生話手臂主骨撞裂手指公對落波子骨其中一粒, 所以係兩條骨裂左
打石膏 5 星期, 希望骨裂地方會癒合, 一個星期後覆診! 而家呢種紗布石膏已經係最輕的了
要等石膏乾左再睇埋位置岩唔岩先可以出院, 有手託輔助減輕石膏重量
唔可以濕水, 仲有個防水手袋包住沖涼, 而家醫學真係倡明, 時代進步!
成件事好似係悲劇咁, 好日唔打波一打波就跌親, 仲要咁傷!! 但悲劇中我地又遇到好多天使, 先係強烈建議我地照 x-ray, 又遇到天使介紹我地睇謝醫生英名決定照 MRI, 如果一個唔為意決定去睇趺打, 骨裂既情況應該會加劇! 仲要醫院肯收我地張 medical card, 全程碌卡一毫子都唔駛俾!
5 個星期冇得開工, 秋秋之前被變成替更次次開工都非常唔方便, 但亦好在而家係替更, 話請假就請假唔駛蝕租! 手停口停我真係好擔心, 我一份糧頂唔到成頭家啦, 但又非常感恩我身邊出現好多好多天使, 眾籌俾我地渡過難關!!!
明天怎麼你還是不知道, 但我相信每個難關挑戰臨到, 一定有天父既美意在裡邊, 天父亦會將所有咒咀化為祝福! 凡事謝恩吧!!
早日康復
回覆刪除