遠近慈明: 11慶生@長洲 part 1

年年生日我都盡量安排, 務求令到我既心肝寶貝開心^^ 最多主意的小明竟然同我講今年要驚喜?!? 真係考起媽媽, 望下個日子, 今次生日在星期一, 即是得星期日返完教會去慶祝啦, 咁半日去得邊呢? 嘉道理農場? Bouncy? 密室逃脫? 真係唔知弟弟鍾意邊樣, 探聽下佢口風, 弟弟就叫我將 D 諗法同佢分享, 佢怕我安排左到時佢真係唔鍾意, 佢要扮開心喎 @.@ 世事都被你看透了...... 咁我講勒噃, 果然, 我三個生日好去處佢都係唔滿意既! 佢解釋話唔係唔鍾意, 三個地方都好好玩, 但平時/隨時都去到麻! 咁, 邊度平時去唔到? 原來弟弟想去離島!!! E~ 依! 即係我又要再度過! 咁岩朋友介紹長洲有新開既營舍, 自己帶露營工具去又得, 兩手 fing fing 租佢地既營舍又得! 有得諗喎! 有幸有不幸, 爸爸整親隻手冇工開日日都賦閒在家, 社會氣氛又唔好, 不如借小明生日一家大小去離島散散心啦!!

弟弟知道生日會去離島, 但唔知道會過夜, 我地忍到星期五放左學要預備背囊執衫褲佢先知! 超級驚喜!!

少少塞車先黎到碼頭, 天氣超級好, 終於記得戴太陽眼鏡 :DDDD

爸爸單手都陪你地去玩, 不過今次肯定爬唔到張保仔洞了.....

長秋, 你孕育左珊珊 :D 話咁快就到左!

唔係好逼人咋喎

Lunch time, 佢地選擇去掃街都唔坐低食海鮮

長洲靚左好多呀!

好舒服

長洲連儂牆

好認真咁睇內容

呢張好直接

因為營舍比較遠, 我地決定揸架車入去! 租車租足兩日承惠 $160, 架車租到第二日 1:00 pm

唔講真係唔知呢度係一個好大既露營地方!

今次我地揀住蒙古包, 一晚 $3280 真係巧貴架......

主人家準備開門

好大好靚呀!!! 仲有冷氣同獨立洗手間, 拖鞋浴室工具齊, 弟弟話有酒店 feel! 佢初時擔心住一晚係渡假屋張床有味個隻, 而家超級充滿驚喜! 好開心, 係咁多謝媽媽 :) 至緊要你喜歡啦!

有位小朋友偷運人蛇.....

你睇我唔到? 唔係, 小慈小明竟然係玩新娘揭頭紗, 笑死我了!

營地好大, 高架鞦韆超級好玩, 雙腳唔掂地要靠人推, 盪既幅度好大, 弟弟話同海盜船一樣有急尿既感覺 :DDD

欣賞風景

西園既地圖, 我地住 402

頭先個轉車理想地係小慈小明一車, 我車受傷既老公, 點知我一起步就撞牆, 腳一用力就轉方向, 完全唔識踩控制唔到架單車 @.@ 攪到秋秋要單手揸車身水身汗 v__v 就係呢個時候, 英雄出現了!!! 小明話佢想試下車我, 小慈家姐車爸爸, 真係得呀!! 我好感動, 小慈架車已經去左前面了

望住弟弟個背影有 D 想喊.... 養佢 11 年終於有 D 用....

11月尾都可以著短袖去沙灘玩, 水一 D 都唔凍仲有人游水添!

好靚好靚既畫面

非常多謝天父小慈小明一直相親相愛, 同聲同氣

你睇呢位壽星仔幾開心 ^^

呢個叫哈哈笑開心城堡, 一定要我影相

望仔石一磚

舊大石忍唔住起身行下喇~~

日落呀!!!!

追住個太陽! 我地要趕去下一場

冇錯! 我地係去郊野公園享用免費既燒烤爐! 營舍一個爐 $120, 爐具 $150, 食物又另計, 爸爸唔憤氣樣樣要錢我地又唔係食得多好唔抵, 於是搜尋到營舍附近既張保仔路有地方, 超級市場又咩都有得賣, 最緊要有炭, 山腳又有士多, 我地又有車運食物, 環境雖然有點陰森但光線充足設施齊備, 廁所洗手盆垃圾筒咩都有!