一開門見到藍天仲見到海, 哈利路亞! 天父爸爸早晨 ^^
有個小朋友都醒左仲打機添! 全家應該得佢一個昏迷到, 天塌下來都唔知, 是福氣!
呢位小朋友尋晚鼻塞得咁勁應該都瞓得唔好, 都唔忍心叫醒佢..... 由細到大都鍾意托住個頭瞓, 仲吱埋個肚腩仔出黎, 超可愛! 太犯規了 ^^
追尋咩咩聲既來源, 原來就係我地營舍後面山上!! 記得職員尋日話佢地 8:30 am - 2:30 pm 會見人, 未夠鐘出閘呀, 一陣再同你地玩下!
佢地堅持話我未玩過鞦韆要推我, 你睇下個小朋友推我推到出龜波氣功, 你阿媽我係標準身型黎架, 太大力會飛出海 :DDDDDD
租營舍除左包毛巾拖鞋, 仲包一個 DIY 手作早餐, 究竟係咩呢? 問下職員先
仲有叮叮點心, 小慈小明第一次用微波爐
爸爸食飽飽周圍行, 小慈叫我影爸爸個背影, 話佢似係度思考人生...... 點解我會整親隻手
呢張相幾靚!! 可以做出年既年曆咭仔
腳印呀! 羊仔出黎喇!
買左兩支草, $10 支, 職員再送多支, 呢隻為食羊一見到我地手上有草就衝埋黎搶食, 爸爸即刻叫舉高手, 佢食草既速度真係好快!
弟弟手仔唔夠長, 羊羊又不斷進攻, 差少少招架不住
三條草點可以淨係餵一隻羊? 點解其他羊唔見晒既? 搵下先! 羊仔尾隨住, 弟弟好似牧羊人呀!
牧羊人與羊
呢度 D 羊可以非常近距離接觸, 我地起勢咁摸佢, 不過佢 D 毛係唔滑既
搵到喇! 羊仔去左其他營舍通山跑, 3 條草餵淨支莖, 淨係得爸爸羊夠力咬
羊仔既另一頭家! 有咁大座山環境好好呀!
羊仔天堂
弟弟好開心! 可以餵羊令佢非常驚喜
係印弟安營區發生打鬥事件!! 兩隻爸爸羊發現人類食物有麵包又有薯片, 唔客氣狂食之餘仲因為爭食而打交撞角添呀!
全營舍最貴既觀星圓拱屋! 半個 camp site 透明方便睇星星, 但都可能俾人睇到你瞓覺 :DDD
繞場一周發現有遊樂設施
係咁依玩左兩下! 下次黎等弟弟夠高夠歲, 我地報名玩攀爬設施刺激 D 啦!
呢度環境真係好靚好舒服
$10 仲可以做 D 咩? 呢度係魚菜共生湖, 我地買左兩盒魚糧去餵魚
$10 好抵, 餵左超過半個鐘!
佢地而家就識慳住少少少少咁餵, 細時不知幾豪爽, 4 下就倒晒全盒
D 魚好餓, 爭魚糧爭到飛出水面!
水車開動為魚塘打氣
問左職員, 原來羊媽媽第一次做媽媽怕佢唔識湊 BB專登困住佢等佢餵奶
羊媽媽你要食多 D 先有奶餵 BB 架, 要乖乖地呀!
揸番架車出去, 今次弟弟話要挑戰極限, 車爸爸再加行李! 踩踩下當然就腳軟啦, 竟然俾佢地諗到爸爸係後面出腳!! 冇錯, 爸爸整親手姐, 對腳係有力既! 完美組合 :DDDD
乖女車我, 叻到識企係度踩車
個早餐仲好飽, 兜左個圈掃多兩串魚蛋, 咁岩又有船, 我地就出番去市區了, 因為有非常重要既野做! 弟弟自己揀左份生日禮物做埋手信, 佢話個貝殼超靚, 好似斑海豹呀!
心急, 因為我地要趕番出去投票呀!
對於今次長洲之行, 壽星仔表示極度滿意!! 又踩單車又玩沙灘又 BBQ 又餵魚餵羊仲唔返屋企瞓, 滿足晒佢所有願望呀!!
沒有留言:
張貼留言