遠近慈明: Transfer

我要講一個見證 (長文慎入)

年初四開工, 在團拜聚會中見到一位姊妹, 正是自己在工作上做得最不快樂的時間, 管理層的不同管治方式令我頭昏腦脹, 工作壓力非常大, 經常惡夢、半夜扎醒、心跳過快、手震等..... 與姊妹分享近況時佢鼓勵我轉工, 為我祈禱! 之後仲幫我睇埋招聘廣告、鼓勵我申請、替我模擬面試等, 令我呢個廿幾年冇轉過工既人個心踏實 D, 對自己有番 D 信心, 有把握

申請第二份工先有得面試, 係行政部門請秘書因原來的秘書要退休, 這份工的工作性質非常岩我, 仲係升職位令我非常期待! 面試時間係下午, 地點就在附近, 我認為行開半小時問題應該不大, 誰知老闆突然約我下午開會! 於是, 擔心的我就 send WhatsApp 去群組求大家為我禱告, 讓老闆長話短說等我可以準時去 interview

上帝聽禱告, 老闆 lunch 後影都唔見, 只有二老闆見我交代工作, 我一返埋位, 有個陌生電話打俾我, 原來想提前面試時間, 我當然即刻到達現場, 5分鐘就 in 完, 但過程非常愉快, 對自己非常有信心! 姊妹教我面試完要寫 Thank you for interview email 俾對方, 見一次工我真係學識好多野! 翌日就收到電話, 話雖然大家都好鍾意我, 但我係 reserved list... 我很失望呢!

之後, 學術部門的同事也有介紹我去見工, 仲係面試前約我面談了解工作性質, 因為我完全沒有 academic 經驗, 呢個職位係一年 program, 由招生到學期尾都要一手負責, 聽完之後我真係好怕自己冇經驗做唔黎, 不過唔顧慮得咁多, 人地請我先算啦! 今次面試正是我復活節放大假之時, 所以沒有臨時請假的問題, 但原來面試前要做 written test! 我完全沒有準備啊 @.@ 有張 question sheet, 要我半小時內 draft 兩封 email, 一封求公司俾 internship 機會學生, 另一封就要邀請學生外出參觀及聽公司簡介, 要用方法鼓勵學生參加. 我真係唔熟, 自問寫得唔好冇乜內容, 好冇信心 @.@ 跟住 interview, 負責的教授也有同一擔心, 主要係佢冇時間教我做野, 而呢個係 ongoing program, 冇時間俾我慢慢學最好我埋位就識做! 教授非常欣賞我極強的 Admin 經驗, 我亦表示自己係一個 fast learner, 係呢個部門我亦認識好多人佢地會幫我等等, 點知教授答我話我做左廿年唔會懷疑我冇朋友喎~ 真係只可以笑下就算, 唔知俾咩反應佢好, 自知都係五五波, 佢請我我都未必真係做得黎, 怕令佢失望.... 之後等左一個星期, 教授親自打電話俾我, 話我屬於 substantial staff, 佢地係 self funded program 出唔起錢請我, 亦冇理由要我犧牲咁多野過檔, 再加上而家 fight 一個位都好難上頭揸得好緊, 真係好可惜云云..... 收線之後我就搵人問下我究竟要犠牲 D 咩? 原來主要係起薪點不同、大假少左同埋公積金供款比例既分別

好唔開心呢!! 我究竟係唔係要轉工? 神係咪幫我離開而家呢個環境? 如果係, 點解次次都係差少少? 好似由底線帶波, 去到起腳射籠點知中門楣既感覺一樣!! 冇錢請我呢個問題, 亦代表我之後都唔駛再申請學術部門?? 出面 D job Ad 全部都寫合約制, 再加上我又真係唔識做 academic program, 咁我仲可以申請咩工? 有本事轉工咩? 學歷又唔夠...... 好 down, 好 down.... down 左成個 5 月..... 公司好忙, 小慈小明又考試都冇時間諗咁多......

直至 6 月, 竟然收到 internal horizontal transfer email, 係學術部門請秘書, serve Dept Head and Deputy Head, 所有同 rank 的人都可申請! 嘩! 幾耐冇收到 horizontal transfer 既 job Ad 呀!! 工作性質同我而家都類似, 都係 serve 老闆、約開會、打會議文件記錄、攪 event 等, 唯一我係唔識 faculty recruitment,..... 好啦, 試埋呢次啦, 難得份 Ad 係 permanent 位唔係兩年合約

我星期三 submit application, 跟住星期一人事部就打電話俾我約 interview, 日期係同一個星期既星期四下午.... 下? 咁快? 我呢個星期係公司最忙既時間, 星期三有兩個會在中環開, 星期五上下午有個大大會 + 黃昏大型典禮 + 晚宴, 全星期都好忙, 星期四肯定要 set up 會場, 全城戒備點請假呢? 人事部感應到我有猶豫問我係咪有問題? 我梗係話冇, 姊妹教過我一定唔可以改面試日期, 因為俾對方感覺唔好、太麻煩, no la~

禱告! 禱告!! 如果天父係要安排呢份工俾我, 求祢為我開路開到底! 真係勁, 臨收工收到風, 因為逃犯條例修訂問題引發香港百萬人上街 (6.9 6.12 6.16), 由於政局不穩, 某位主席議員唔方便接受榮譽, 成個典禮要延後, 暫時取消!! @.@ 咁, 即是我星期四不用 set up ?!? 嘩~~~~~~ 真係一個超大超大既神蹟!!!! 於是, 我星期二即刻同上司講急事要請假, 班高層商量完就話始終星期五個大大會怕人手唔夠, 想我一係早 D lunch 出去辦事再返黎, 一係就下午放早, 於是我選擇早 D 出去再返公司做野, 請到假已經好感恩! 神既安排真係太巧妙, 完全超乎想像!!! 讚美主, 真係為我開路開到底!!

話咁快到星期四, 雖然同上司申請左早 D 出去再返黎, 但我都要做到 1:20 pm 先走得! 好在我預鬆左時間, 但我一定要離開個位, 因為工作係唔會做得完既..... 不過我今日心情起伏不定, 近來公司超忙, 已經連續 OT 左 8 晚, 我好攰, 精神唔集中, 坐係度都想瞓, 大穫! 祈禱祈禱祈禱!! 求天父與我同在, 加我力量賜我平安!!!

我習慣早到, 接待我既新部門同事叫我坐住先, 但唔夠兩分鐘就帶我去另一間房, 一開門原來已經要 interview, 我一入房, 兩位 Heads 就話 I recognize you! 係 ^^ 因為工作關係我同所有 Heads 都熟, 要成日 call 佢地開會麻 :) 開場白當然叫我介紹自己啦, 佢地對我既工作好有興趣, , 又問我識唔識 outlook calendar, excel spreadsheet, eClaim system 等, 識! 咩都識! 當然都有問我做左咁多年點解想轉工? 我初時答 standard answer 不過佢地追問, 於是我就好老實咁答.... 點晒頭咁, 之後再問我介唔介意轉過黎人工條件一樣? 我就話我梗係唔介意你加俾我啦! Head 又問我要幾耐先可以過到黎? 我話要一個月通知, 佢問可否早D? 我話 you have to fight for me then! Head 答: I won’t fight, I talk :)

面試完就過隔離房做 written test, 又係問題紙, 限時 40 分鐘一中一英兩題必答. 英文題要我 draft email 約人開會, 已經約左幾輪都約唔到又快放暑假 D 人走哂要我諗辦法. 中文題就話部門將舉行為期兩日既研討會, 要我打封邀請函讓國內的學者可以申請通行證來港..... 我望住條問題好耐都諗唔到野, 好似入唔到腦咁..... 十分鐘過去, 再唔落手做就唔夠時間啦!! 點都撩 D 野但自問寫得麻麻, 就係呢個 moment 竟然電話響 (靜音震機), 係舊公司 call 我返去 @.@ 夠鐘交卷就飛番公司, 當日係要 OT 既, 仲要 OT 到 8:00 pm...... 舊老闆話順路車我返屋企, 在車上我問多佢一次會唔會升我職? 因我被同部門的同事譏笑我不爭氣, 留低是庸才云云.... 舊老闆竟然答我佢「自身難保」@.@ 咩答案??? 復活節假前又應承我會為我做 D 野? 已經兩個月原來咩都冇做過嗎? 之前又係你自己主動問我係咪做得唔開心, 我已經同你講我覺得部門冇希望冇前景, 你當我講廢話? Fine, 打消埋我對佢既最後一絲希望, 佢根本唔會為我爭取, 亦唔會理人手少左工作會唔會應付得來..... 人面全非, 我 D 好朋友食晒雞餐走晒, 我仲有咩原因要留低呢......

星期五, 因著我 interview 後 send Thank you email 俾 Head, 佢覆我 email:

Hi Joanne,
Thanks for the message. I am pleased to let you know that we have decided to offer you the position.
Look forward to your joining us.

我真係好開心! 感謝神! 我終於走得甩!! 今次個 interview 我自問準備得唔夠好, 但就成功了! 即時諗起聖經 -- 非勢力, 非才能, 主說乃靠我的靈成事!! 神的恩典真的超乎所求所想, 由我竟然可以攞正牌請假已經係一大個神蹟證明係神為我開路, 成件事好順利好奇妙! 之後辭職都有小小波折, 不過, 我終於都由一個部門過檔去另一個部門, 當然都要經歷一番煎熬啦!

首先係新部門等人用, 於是 Head 向我舊老闆提出將我斬開一半, 上午係呢邊, 下午去另一邊幫手, 我舊老闆當然應承, 但佢非常均真, 如果一人一半, 就要延長我既 last day @.@ 於是有兩個星期既時間我要同時做兩個部門既工作之餘, 舊老闆仲要我寫 year plan, 記低我平時每個月會做咩工作, 1 月寫到 12 月, 又要我將 7 月至 12 月既工作做定先, 仲要我將 email 抄低俾新同事 for reference, 我呢 D 老海鮮, mail box 入面有過千隻 email, 點抄呀? 好有壓力, 晚晚 OT 都做唔晒, 返到屋企又瞓得唔好, 好早醒又瞓唔番.... 但我同自己講, 做得幾多得幾多, 終點在望, 就黎上岸, 只係兩個星期, 捱得過既, 加油加油加油!

今日, 弟弟報左暑假既小小科學家, 要等佢 3 個鐘落堂再湊佢返屋企, 我靈機一閃, 不如趁呢個空檔重金禮聘秋秋幫我攪攪部電腦啦, 新部門用新機 Window 10 我有好多疑問既呢, 又訂左塊螢幕保護貼可以幫我貼埋添噃, 一舉幾得! 我駛出我對閃令令既眼睛, 秋秋當然一口答應啦!

小明已經係第 3 次參加, 識得揀有興趣既題目先報名, 經驗豐富 ^^