升左一間中學

為期連續十個工作天既中一英文銜接班終於上完喇!!  今日係中一家長迎新茶聚, 加埋之前要返學校買書、買校服, 所以未到 9 月開學已經對呢間中學非常熟悉了 ^^

佔用成個禮堂黎買書都咪話唔誇張

今日小慈要上堂至 3:00 pm, 認識校規、學校環境、認識同學同埋老師, 而家長們就可以見下班主任同埋參觀學校, 我同秋秋即刻請假參加啦!

小慈分左班, 史無前例變左 3 號!  估唔到會分開男仔同女仔排 Alpha

校長同主任講完開場白之後由社工主講, 小慈小學已經行 cycle 制, 升上中學之後應該問題不大, 但唔可以著住運動衫返學要帶番去換就難適應 D

原來小朋友最憎屋企人咁樣講野

說話的技巧

受軟唔受硬幾多歲都岩用!

家長智慧錦囊

Prefect 帶我地一班家長參觀學校, 呢度係天台飯堂, Form 1 & 2 強制留係學校食飯, 小慈已經表明唔再訂飯, 寧願左一袋右一袋咁帶飯返學校食

基督教學校既好處, 連宗教室都有, 周五學生團契會在裡面舉行

家政室, 小慈好期待, 好想快 D 入去煮飯 :D

熟悉的走廊, 學校以藍色為主小慈好開心, 佢最鍾意藍色

Yeah!!  終於游到小慈間課室喇!!

張書枱比小學時高左

每個櫃筒都有鎖, 可以存放書本, 等書包唔駛咁重

仲有 locker

爸爸試坐... 好似去左小人國 :DDD

Who's on duty?

同小學一樣依然有家課冊

行去參觀小食部時咁岩撞到小慈放小息, 梗係要影番張相留念啦!

排隊買小食的小慈, 原來係買蝦條

世界真細小小小, 教會既好朋友李心蕎竟然會同校, 可惜唔同班, 不過小慈都話會搵佢一齊玩啦 ^^

小慈要集隊了, 家長都可以解散了~

整體感覺真係幾唔錯呀!  學校好有誠意, 願意分享好多經驗俾中一既家長知道

一浪接一浪

今年真係一個非常精彩既暑假, 完晒三場話劇一場舞蹈表演之後, 小慈仲參加左一個鋼琴比賽、兩個日營、升左一間中學、去健康院驗眼、在教會獻詩、每個星期返團契.... 忙碌而又充實啦 :D

政府排期一排就半年, 差 D 唔記得要去驗眼, 好在請到假陪小慈去藍田咋

唔駛等, 一去到就見視光師

..... 唔好意思, 影完先見到隻請勿拍攝 XoX

小慈擲界, 可以又可以唔駛戴眼鏡!  視光師話開左學睇下望唔望到黑板, 有冇抄錯晒手冊先決定配唔配眼鏡都得

初詩獻詩, 媽媽最開心見到佢兩姐弟攬頭叉頸 :DDD

今年有 D 小朋友岩岩升級上黎, 2 年級生得仲高過小明!

今日獻唱我的救贖者活著, 我地希幔詩班都有唱過, 非常好聽又感動既一首詩歌

左右分飛

今日竟然有姨姨叔叔無情情送部相機俾小慈, 開心驚喜到佢不得了!!  小慈恨左好耐好耐架喇!!!  抵錫既小朋友係會有好多人錫既 :)

今日輪到提摩太團去鳳德社區中心服侍, 平時小慈小明一定會跟住我去幫手, 今年我想佢地返團契多 D!  仲要機會難逢地去家訪, 梗係唔好錯過啦!

多謝希希晉晉熱情招待, 小明直情唔想走

我今日既鳳德好拍檔!  我繼續負責兒童領詩, 唱神真美好 & 我在這裡讚美, 小朋友反應好好呀!

Keynes & Gienna 帶領小朋友玩挪亞 Bingo, 小朋友原來識寫好多字

返團契學中文, 學英文, 正!

大人同小朋友都好開心

任務完成!

暑假幾時都係咁精彩 ^^

賞 味

馬不停蹄, 那邊箱剛剛完成 3 場話劇, 呢邊箱小慈又要表演一場跳舞喇!  所以有段時間佢又要排劇又要排舞, 真係攰到佢死死下架!

今晚就係演出既日子!  因為人數眾多, 表演者需要自行化妝 @.@  真係難為了媽媽, 買假眼睫毛都走左幾轉, 屋企又零化妝品, 好在遇到好多好心人又有家長幫手, 小慈叫做化左個妝頂住先啦!

中午已經要到高山劇場綵排

小慈影化妝間俾我睇

有獨立廁所環境唔錯, 晚餐仲有吉野家食添!

我地都早食晚餐, 未夠 7:00 p.m. 已經黎到喇

我以前成日同同學仔黎高山玩, 弟弟第一次黎呢度

冇去錯地方

小慈隻舞呀

入場了!  我地坐得好前呀, yeah!

呢間舞蹈室小慈由 K3 跳到而家, 3 級跳到而家 8 級

表演共有四幕: 甜酸苦辣

小慈係第二幕 [酸] 8 級 《一片太陽花》

官方照片要遲 D 先有, 表演好精彩, 好好睇呀!!!

小慈出黎喇

好靚女呀 ^^

化小小妝已經咁靚 (心心眼)

有貼假眼睫毛, 係咪唔覺呢?

小慈最開心就係成家人一齊

表演者仲有證書添, 開心!

小慈終於可以休息, 可以有時間做暑期作業了 :DDDD