約左係遙遠的東涌集合, 有爸爸義載我地早到左好多, 兩位小朋友爭取時間玩 UNO
好耐冇見既地下噴泉, 早幾年黎呢度, 小慈小明係會不顧一切衝出去玩, 而家大個左就會知道衝動既後果, 觀察左好耐都唔敢輕舉妄動, 終於, 數左好幾次知道第幾下出最少水柱鼓起勇氣衝出去, 點知, 估計錯左下節出水柱既時間點都會快過人跑既速度, 於是, 有位小朋友衝衝下就被地下水柱由褲浪沖左上頭頂, 濕晒! 好在今日有太陽唔凍咋 >o<
人齊喇, 我地要去超市大量入貨, 要入 18 人 2 日 1 夜 3 餐既食物真係唔容易, 好在一人幫手拎 D 都冇咁傷, 超市呢座金莎山太經典, 忍唔住要影低佢
由上車望到落車, 終於俾小明遇見牛牛喇!!!!
落巴士之後要穿越牛屎陣, 步行唔駛 5 分鐘, 就到我地既營地 -- 塘福露營車, 非常方便呢!
有小小兒童遊樂場
Yeah!!! 呢架就係我地架露營車喇!! 好新淨好靚仔, 成個營地有 8 架車
車內設施齊備, 可以煮食可以沖熱水涼, 有被有枕頭有冷氣有電視, 真係好正呀! 睇外國電影成日都見到佢地揸住呢款車穿州過省咁周圍遊歷已經心生嚮往, 退休生活係咁都真係幾唔錯, 而家自己試住一晚先啦, 哈!
放低行李就即刻去沙灘, 又係穿越牛屎陣唔駛 5 分鐘就行到過去, 超正! 小慈小明出乎意料地年尾都有得去玩沙, 仲唔開心到跳起咩 :)
冇夾過, 但我地竟然一家人帶帳篷, 一家人帶地蓆, 一家人帶沙灘玩具, 一家人帶零食飲品, 裝備齊全咁俾寶貝們去沙灘玩
上個星期都仲講緊冷鋒襲港, 市區氣溫得 10 度, 大帽山最凍 1.7 度, 點估到一個星期後既今日天氣好得咁交關, 又有太陽, 玩到最後連外套都唔駛著
旺丁的七小福帶來全部細佬, 於是出現陽盛陰衰的畫面 :D
冬天天黑得好快, 太陽未落山就要返去預備營火晚會, 小慈小明幫手洗番茄
開餐喇~~ 小朋友非常一致地燒腸仔, 5 包腸仔都唔夠佢地食!
除夕夜梗係要食糖水做宵夜, 我地有大廚 Bessy 係度不停變出食物, 唔駛怕!
呢班小朋友玩住咁等倒數
10...9...8...7...6...5...4...3...2....1.... Happy New Year!!!
我呢兩位平時早睡早起既寶貝, 死頂到倒數完就極速瞓著
三位最早瞓亦最早起身既小朋友, 7:30 am 食完 breakfast in bed 又開檔玩 UNO, 眼鏡細佬們真係好攪笑 ^^
其他小朋友差不多 9:00 am 先起身, 個個都長大了, 可以幫手煎蛋炒蛋煎火腿, 好駛好用
忍唔住又去沙灘玩, 塘福 D 沙真係好滑好滑
小慈好想瞓低扮天使, 不嬲都乖既佢做咩都會同我講左先, 於是, 我好言相勸今日唔適合做天使啦, 平時沖涼洗頭佢至少要 20-30 分鐘, 我怕露營車唔夠熱水, 冷親臨尾香就唔抵麻 @.@
正值潮退, 唔岩季節咋, 真係好想去水口掘蜆
三個乾等的媽媽
去完沙灘特別肚餓, 食埋午餐先出 camp
一班好朋友就算一齊食公仔麵都係開心的, 辛苦 Bessy 煮足 3 餐!
我地班媽媽努力將露營車回復原狀, 呢班小朋友就玩住等
再穿越牛屎陣, 我地要走了
我認得呢度! 拍拖時都有同秋秋租渡假屋渡假, 真係已經十幾廿年前既事.... 但感覺既野, 一下子就返晒黎! 好快就到小慈大個囡同朋友仔去露營架喇 ^^
新一年, 祝大家都快快樂樂! 最重要身體健康!
沒有留言:
張貼留言