漳州 Day 5 浸溫泉放煙花

住得溫泉酒店梗係要浸下溫泉架啦!  我地計過最平係去「晨泡」, 11:30 am 前入場 $128 半價, 一個大人又可以免費帶 2 個 150 cm 以下既小朋友, 小明又當 120 cm 以下免費, 於是我地一行 4 大 3 小只係 RMB $320 :D

溫泉地圖, 呢度好大呀!

最高興既係我地一家人包場 ^^

有室內按摩溫泉又有得焗桑拿, 環境非常乾淨衛生, 職員叫我地玩左室內先, 11:30 am 之後先去室外因為戶外未放好溫泉水

踏正 11:30 am 我地就衝出去室外溫泉, 新鮮泡既泉水特別梳乎!  今日仲要天陰落雨, 橫掂浸溫泉都全身濕晒, 浸暖個身再淋冷雨, 玩埋冰火岩晒呀!

2:00 pm 先開始多人, 我地都已經浸到皺晒皮要上水了, 非常滿足

今晚係我地留係漳州既最後一晚, 四姨婆一家入黎酒店同我地食飯餞行

小朋友聚在一起共通語言一定係打機

上次仲留有大量存貨, 約定最後一晚放多次煙花, 點知今日全日落雨, 打定輸數落雨就冇得放, 點知天父真係好恩待小朋友, 食完晚飯就停雨, 有得放喇!!!  小明非常大膽, 有左第一次經驗又買多左個打火機, 自己煙花自己點火 @.@

一點著煙花就玩 You raise me up, 隨住煙花噴高噴低對手就跟住升降, 笑死人喇!

UP 晒!!

今晚係小慈 10 歲既最後一晚, 佢既生日願望就係可以返鄉下玩煙花 ^^  Your wish is granted!

今次返鄉下, 阿姨們個個望住小慈瞇瞇笑, 因為覺得呢個孫女好似嫲嫲呢!  似嫲嫲咁靚女, 心地又好, 實在係小慈既榮幸!

呢張相小慈實在太靚, post 多一次 ^^

好唔捨得漳州~~