初時諗住日日住同一間酒店免卻執行李之苦, 冇估到日日都食一樣既早餐係會生厭的..... 不過都有爆笑事件: 話說我食奄烈, 呢間酒店叫西洋卷蛋, 落單既時候都溝通左一輪先食到我心目中既奄烈, 當笑話咁同佢地講. 之後小慈話想食炒蛋, 前車可鑑, 同佢練習左一次先放佢出去點餐, 咁複雜既 order 唔知佢會叫左 D 咩. 冇幾耐佢返黎俾左呢碟野我睇, 小慈話佢講左好耐個姨姨廚師都唔明, 係都要將隻蛋煎完, 切碎, 再炒幾下就話係炒蛋, 真係好無奈........
我因為聽小慈講野聽得太入神, 竟然將個番石榴當作西瓜咁食, 食淨層皮, 佢地梗係笑到肚攣啦, 仲影相留念添! 媽媽都好少咁失威 >v<
爺爺既大哥同細妹專程由廈門搭車來漳州見我地一面, long time no see 呀!
傾完一輪我地就去二姨婆屋企探訪, 大表哥同大表嫂第一次見面
大表嫂知道我鍾意食釘螺, 竟然為我煮左一碟, 好感動啊~~~~~
大表哥同表姐阿謹姨姨仲請我地食大餐, 呢間「蒸尚好」將生猛海鮮分類清蒸, 最後仲煲出海鮮粥底, 超好味, 環境仲好靚, 每間房都有大魚缸一邊食飯一邊賞魚, 太高興呀!!!
食飽飽, 阿謹姨姨用專車車我地去游溪水, 呢度環境非常優美舒閒
雖然呢度叫溪其實大過個湖, 水非常深, 連游泳高手都要圈住水泡以防萬一. 小慈小明昊昊溪中暢泳, 真係難忘既經驗呢!
附近農村養左好多雞鴨, 見到佢地在草地上漫步, 小慈小明開心到不得了學人趕鴨, 成功趕左一隻鴨入籠勁有成功感
今晚輪到我地請客, 大家一齊食呢間新開既牛肉館, 碟碟牛肉都好好味 :P
多謝大家賞面, 見到你地真係好開心 ^^
沒有留言:
張貼留言