My Sweet Birthday

嘻嘻~  人到中年, 當然刻意忘記自己幾多歲啦!  不過我兩個小寶貝記到實一實  @.@  一大早竟然換好晒校服坐係梳化度等我, 簡直係奇景!!!  平時三催四請都仲賴係個梳化度生菇咁架麻 ^^  見到我即刻彈起身, 攬到實晒錫晒面珠咁唱生日歌俾我聽, 一人送我一份手稿, 仲話今日會超乖唔會要我勞氣咁話 :D

好 sweet~  你地既心意媽媽收到晒!  兩個都祝我工作順利, 因為我近來返工真係好唔開心, 又要 OT 佢地最唔鍾意, 所以祝我工作順利就可以準時放工返屋企 @.@  苦中作樂氹自己, 我依然有工返, 高薪糧準福利好, 天父對我係非常好既, 知道我既忍受程度所以都一定冇事 :D

睇番面書既當年今日, 原來我過往十年來都可以生日放假去玩, 今日就破左呢個氣勢, 因為我要返工!!  唔緊要, 有工返係好事, 不過祈禱希望天父憐憫我, 老細今日唔好捉我錯處找我痛腳, 我今日「唔話得」 ;p

好野!!  天父聽禱告!!  今日準時順利收工去同我既至愛食生日飯!  今晚由老公一手包辦, 佢話上次既粥底火鍋又平又好味, 今晚 encore!

食飽最好去行下街幫助消化!  呢間執笠店貨品種類琳瑯滿目, 賣既野仲好奇怪同攪笑!  呢隻雞笑到小慈小明 C C 下 ^^

我讀書既時候興儲明星閃咭, 而家呢個世代就興明星八達通貼, 仲清一色韓國明星添!

食完晚餐我地史無前例地去食甜品, 皆因乖囡話要食雪糕飲 D 野喎!  我地試呢間甜品店新開張, 出名食 waffle 我地幾飽都要試下!  又真係幾好味喎~

返到屋企入房換衫, 小慈竟然入黎攔住我唔俾我出房!  咩事?  係咁攬住我咁古惑?  之後仲大聲問弟弟得未?  呵呵~~  原來買左個生日蛋糕俾我, 熄晒燈點晒蠟燭先放我出去!  Hey!  有蛋糕頭先就唔好去食甜品啦!

最終個蛋糕係影完相放番落雪櫃既!  不過今次生日真係好驚喜, 老公送左部新電話俾我, 又有 idea 去邊度食飯 (平時係問我想食咩我自己提議自己去邊度食生日飯咁架麻), 點知今次連生日蛋糕都買埋!!  知我返工辛苦假都冇得放又唔開心, 一次過氹到我高高興興!!  收到晒, 老公!!  多謝你既心意!  Love you~~~

生日快樂遍佈面書、Whats App、電話.... 仲食左好多餐生日飯!  多謝咁多位好朋友!!  多謝你地愛錫我!

仲要多謝老爺俾既簽名大利是 ^^

生日快樂!  天天都快樂!  我看我所有的為寶貴, 多謝天父!!