一個美好見證

人與人之間既緣份真係好奇妙!  今日婚禮既新娘在教會長大, 後來做左傳道人, 佢實習既第一年我認識左佢, 佢好堅持要記住我個名, 唔叫我做小慈小明媽咪 ^^  之後係街度撞左幾次, 唔算太熟, 但佢真係好親切、好窩心, 所以知道佢結婚, 我即刻應承做婚禮詩班獻詩 :)

香港浸信會神學院在西沙, 禮拜堂好靚呀!!

獻唱「完全的愛」Barry 版, 佢重新編曲送俾嘉恩做結婚十周年既禮物, 超 sweet 架!!

我地成班弟兄姊妹大家都玩得好開心 ^^

城潮浸人強馬壯!!  由上任牧師林俊鴻為一對新人祝福, 林牧師睇住新娘大, 感觸良多

新婚張婷道出佢與 Martin 既愛情故事:
佢地原是中學同學, 但只得中一同班, 之後都冇再聯絡.  其後張婷讀神學, 與曹偉彤院長影左一張相放上網, 引起 Martin 既注意, 因為 Martin 都認識曹院長係替佢受浸既牧師, 就係咁打開話題, 冇見 20 年二人再次彼此認識

張婷係咁講既:「讀神學既時候, 我同天父講我想專心讀書, 所以唔想拍拖住, 但都有做準備功夫, 一直有為未來既『他』而祈禱, 因為我了解自己唔適合一個人生活, 希望將來既佢愛主、孝順, 仲要錫我.  到差不多畢業, 我又祈禱同天父講, 差唔多喇, 係時候喇, 於是 Martin 就出現左!  我係一個好穩陣既人, 我再祈禱祈左 3 個月想清楚知道 Martin 係唔係就係個一位....  到真係拍拖, 我同 Martin 講你唔可以嘴我, 免得受情慾既控制, 所以頭先揭頭紗你地見佢咁肉緊錫我, 因為係佢第一次錫我...... 」

現場掌聲如雷!!  何等既震撼!!  婚禮當日先係二人第一次初吻, 係呢個世代竟然有咁活生生既見證!!!  我知道外國有年青既基督徒立志將貞潔留到結婚當晚, 因為婚前性行為實在太普遍, 但身邊有人真係可以咁樣持守, 連 kiss 都冇, 張婷 Martin 你地係第一對!!  好感動, 好感動!  你地真係一對好好既見證,  天父既愛和恩典何其美 ^^

呢個就係佢地 Form 1 既班房!

我張你地既故事同小慈小明分享, 小慈既反應係：「梗係啦!  梗係要咁做啦!  點可以隨便俾其他人錫架!  梗係要老公先得啦!  我將來都會係咁~」

小慈, 立此為據!

祝福 Martin 張婷, 主內蒙福, 恩愛永遠!!!  恭喜!  恭喜!!