捐頭髮

睇過網上一段短片, 話有個 8 歲既美國男孩子, 2 年來完全唔肯剪頭髮, D 頭髮長到俾同學仔笑佢係女仔佢都唔理, 一直留長, 直至有一天佢終於肯剪!  原來佢 6 歲既時候, 睇到電視上面有 D 年紀細過佢既小朋友患癌症而要接受化療電療, 可惜因為副作用而甩晒頭髮, 就由那一刻開始佢決定送自己既頭髮俾呢一班有需要既小朋友 (俾我搵得番段 video ^^ click this ==> Why he grew his hair out )

睇完呢段 video 我覺得好感動, 因為我媽媽當年都係因為乳癌做化療時甩晒 D 頭髮, 佢自覺太醜怪而走去買左兩頂假髮!  我仲好記得佢個兩頂冬菇頭, 唔靚不特止仲要好貴下 @.@  送頭髮俾癌病人做假髮, 我真係覺得好有意義, 於是我都留長我既頭髮!!

小慈既男女觀念好強, 佢覺得女仔係要留長頭髮既, 為顧及佢既感受, 我就算捐髮都唔可以剪到 D 頭髮太短, 剪完仲要同原本差不多樣如果唔係佢應該接受唔到, 於是我唯有一直留長我既頭髮啦!  終於, 我覺得夠長可以剪....   Da La~~~~~

髮長過腰就黎掂到 pat pat, 真係留左好耐架喇

我應該留齊 D 頭髮, 10 寸長齊輯輯係最理想, 而家剪多少少方便佢地處理, 不過我 D 頭髮真係好少好薄, 希望都幫到佢地啦~

見到剪左頭髮既我, 兩姐弟當然依嘩怪叫啦!!  不過知道我點解要咁做時就好支持媽媽了 ^^

弟弟攞左我條馬尾去玩  VvV

香港有做假髮既慈善機構, 創辦人係已經攞左傑青既溫小蘋, 如果大家都想做善事, 可以去以下網址了解下

www.wonderfulknots.com

捐頭髮需知:
至少 10 寸長, 冇漂冇染冇電
洗左頭吹乾用橡筋扎住先剪
剪下既頭髮用雪梨紙 / 保鮮紙包住
放入密實袋, 再用大信箱寄去以下地址就成功架喇!

施比受更有福!