我非常想睇番小慈 4 日 1 夜做過 D 咩, 最有興趣當然係深水埗之夜啦, 又要拾荒, 又要午夜墟叫賣, 又要住板間房瞓紙皮! 睇完 D 相再聽埋導師分享, 真係好欣賞呢一班既小朋友! 有一組賣報紙鋁罐得 2 毫子, 原來佢地拾荒時遇到真正既拾荒者, 將所有紙皮俾晒佢所以成組只係得 2 毫子, 我聽到真係好感動! 知道賺錢唔容易之餘仲體恤有需要既人, very very good!
呢張證書, 實至名歸!
小慈整個 PTS 既表現都好好, Madam Julie 仲讚小慈係友誼小姐, 話問佢攞咩佢都有, 即刻攞出黎即俾, 非常樂意同人分享, 好肯同人傾偈! 評語亦非常中肯, 短短幾日已經好了解小慈:
「恩慈做事謹慎、服從性強，亦能跟從導師的指示完成任務，可見盡責的一面。唯面對挑戰和壓力時易產生緊張和焦慮，應多為自己打氣，不要太在意結果。」
跟住頒獎, 「飛躍進步獎」、「最踴躍參與獎」&「抗逆先鋒獎」
因為導師對小慈評語有讚有彈, 頭兩個獎小慈都冇份我仲估佢會食白果, 點知寶物沉歸底竟然攞到獎, 我同爸爸一齊 嘩~~~~~~ 左出黎! 好驚喜! 完全冇諗過呀!!! 小慈自己都估唔到! 有咩開心過自己親自領獎 ^^
小慈自己走去同導師 Madam Julie & 傑 sir 講多謝, 仲話估唔到自己會有獎, 好驚喜! 傑 sir 話今年組員實力好平均, 小慈之所以勝出就係佢個把「Minnie 傘」拎出去賣最後又拎番屋企因為賣唔出, 小慈好唔開心但忍住左冇喊, 就係呢幾滴冇流出黎既眼淚令到導師留下深刻印象!! 抗逆能力, 就係在逆境中如何自處, 小慈努力控制自己情緒, 令到導師加左唔少分俾佢, 最終得到「抗逆先鋒獎」!!!
抗逆先鋒獎 -- 4 日內均表現出色, 積極參與且有領導能力, 勇於面對各種困難, 不怕畏懼
好叻呀, 小慈! We are so proud of you!! 爸爸媽媽知道你好努力做好每件事, 好想自己叻, 好希望人讚, 你有一個慈心善心憐憫人既心係爸媽最欣賞既! 我地亦都好開心見到你努力付出有回報, 希望你享受當中既過程, 加油呀!
一門兩傑, 小慈小明兩個第一年參加 PTS, 兩個都得大獎, 爸爸媽媽真係開心到唔識形容 ^^
感謝神, 一直都需要天父賜下智慧去教養小慈小明, 勝不驕, 敗不餒! 好好加油!!
沒有留言:
張貼留言