平時成日見到尖沙咀碼頭有大船停泊, 今日終於有機會登船 ^^
我地上船喇~~
「望道號」由德國的非牟利慈善機構「好書共享」協會 (GBA Ships) 所營運，目的是把知識、幫助和盼望帶到不同的國家
愛弟弟的小慈家姐抱起小明敲響船鐘
坐埋橙色櫈就會有船員播片報導望道號既情況
小明對揸船興趣大 D
船員既寢室
笑 :)
我地去海上書展喇, 星期六真係好多人, 睇書會俾人撞背脊!
因為望道號環遊世界, 船上 5000 本圖書全部以 Units 為單位咁就唔駛成日改價錢, 香港黎計 100 個 Units 就於 $20, 好聰明呀!
望道號已經到訪過 160 個國家和地區
我地報名參加導賞團, 呢位係我地既導遊姐姐 Twinky
我地會參觀廚房、餐廳、休息室、上甲板同埋入船長室, 呢本就係導覽手冊
呢條樓梯, 令我諗起鐵達尼號 Jack 同 Rose 跑來跑去逃命既情節 >.<
我地要參觀限制區域, 一定要有頸繩先入得架
當船航行到每個地方, 船員都會透過實務技能同埋船上既書, 將幫助帶到當地社群, 有時起屋維修, 有時幫手耕田, 有時探醫院孤兒院去服侍有需要既人..... 牆上面呢個水桶就係幫助落後地區過濾食水時用既! 小慈好受感動, 已經話大個都要上船服侍了! 非常好, 要夠 18 歲先得呀!
廚房 -- 每日煮 3 餐加埋上船參觀既訪客, 一日要準備 1500 人既餐點, 麵包都要焗 90 條, 真係大製作 @.@
望道廳 -- 舉行各式對外活動, 亦都係船員進行晨禱會、晚禱會、敬拜聚會同埋主日崇拜既地方
呢度好舒服呀
餐廳 -- 能夠容納全船 400 位船員一同用餐
入面就係船員既寢室, shuuuuuu~~~ 唔好阻住佢地休息呀
400 位船員來自 45 個國家, 佢地都係義工, 一起生活、一起工作、一起服侍, 從中彼此學習和互相尊重, 組成一個以基督為首既大家庭
小明發現香港特區旗零舍興奮
望道號總共有 9 層, 我地黎到 Deck 7
甲板呀!!!
你估下呢度門有咩咁特別?
有六分儀就梗係船長室啦!
船長靠地下呢隻窗仔睇水位泊船埋岸
究竟點樣睇架呢? 真係好犀利
嘻嘻~~ 扮船長
艦橋 -- 船長的指揮中心
船上面真係一個不一樣的世界
眨眼就參觀左 45 分鐘, 由秘密通道出黎就係「生命旅程展覽區」, 展版講述聖經入面兩個兒子的故事
小兒子敗晒爸爸成副身家之後終於返屋企, 爸爸日思夜想掛住個仔, 離遠見到係佢就即刻跑出去抱住佢, 前事不計, 只要個仔肯返屋企就得.... 真係要做左人地父母, 先會體察到天父爸爸個一份慈愛
準備去 Cafe 時遇見船員, 梗係埋去打聲招呼啦! 佢叫 Jon 係英國人, 負責全隻船既電力供應, 旁邊個副係 engine
Jon 已經係船上工作左 2 年, 去過 16 個國家, 最鍾意香港既山頂靚到不得了咁話 :) 大學畢業之後佢思想自己既前途, 祈禱既時候記念到望道號, 於是就上船服侍, 黎緊仲會做多 2 年! 加油, 加油呀!!
行到又攰又口乾, 媽媽非常偉大咁排隊換取導賞團送既雪糕爆谷, 小朋友就自己玩玩具
船長出沒注意 ^^
小食部食物既價錢都唔算貴
雪糕有冰粒架, 好正!
望道號既宗旨 -- 把知識、幫助和希望帶到人群
知識 -- 呢隻全世界最大既海上圖書館用好平既價錢售賣及捐贈圖書, 鼓勵大家多讀書, 相信知識、教育和基督的價值觀可以為人的生命帶來改變
幫助 -- 不論建築計劃、視力檢查、牙科或醫療服務, 望道號的船員都會透過實際行動讓人們感受上帝的愛
希望 -- 400 位船員生活在一個跨文化基督教社群裡面, 學習互相尊重, 彼此扶持, 實踐上帝的愛, 船員會跟世界各地的人分享自己的生命, 並鼓勵大家尋找人生的意義
能夠有機會參觀呢隻咁有意義既福音船, 我地真係覺得好難得同埋開心呀!
沒有留言:
張貼留言