要預備既野都算多, 4 套運動服裝、內衣褲、梳洗用品、波鞋拖鞋... 要用大人背包先裝得晒!
多謝冬晴柏苗爸媽義載, 話咁快就到烏溪沙營地喇~~
報到, 點名, 換營衣
小慈同弟弟唔同組
名副其實槍王, 一早擺晒 D 槍係度曬冷
好型呀!!
3 個家姐同組, 連柏苗都同一隊, 原來成個槍王得 5 個女仔咋
小明同 Bernard 一組
簡介會之後就入 camp site 放低行李, 呢度係細佬們既 5 號屋
千叮萬囑要弟弟瞓下格床, 好怕佢半夜急得滯去廁所落樓梯跌瓜佢 >.<
三個家姐當然一間房啦! 基本上所有女孩子連女導師 8 個住埋一齊
小慈揀左瞓上格, 地方乾淨冷氣又新, 小慈話好好住呀!
3 日兩夜宿營開始喇~~
先玩破冰遊戲
佢地 D 動作好攪笑呀 ^^
IPSC 短槍訓練
話咁快已經第二日, 導師講解 IPSC 短槍比賽規則
個人計時比賽正式開始
早著先機! 小慈小明舊年學過 IPSC 應該會有幫助
姿態唔錯
比賽時間最快頭 5 名仲係唯一一個女仔! 小慈, well done !! 禮物就係佢地手上既大槍, 開心到不得了 :)
開飯喇~~~
軟膠子彈室內對戰準備開始
隊制, 小明好勇猛呀!
一班導師們, 辛苦晒!
有一位小朋友生日, 成班同佢一齊慶祝
BBQ 晚會可惜遇著黃色暴雨行雷閃電, 非常難忘
話咁快黎到第三日, 導師們非常努力入子彈
小朋友全副武裝, 戴晒面罩
戶外 War Game 對戰一觸即發
雖然唔同組, 但小慈無時無刻都照顧住弟弟, 仲無意中俾人影相, 媽媽見到好窩心啊 ^^
衝呀!! 殺呀!!
輪到家姐組了
表現淡定
小慈的英姿 :)
3 日兩夜過得好快, 結業禮派證書仲有把槍仔做紀念
小慈話唔係人人有槍, 佢把大槍係比賽贏既, 另外把細槍係日日起身有摺被就有 ^^ 而弟弟把細槍係軟膠子彈室內對戰第 3 名得來既, 真係唔容易喎, 叻叻!!
3 位家姐感情深厚左
朋友仔大合照
專登影張入 camp 前後, 係小慈頭髮亂左 D 之外都好 OK!
其實我真係覺得你地好叻, 好識自己照顧自己, 執齊所有野仲贏埋獎番黎真係唔簡單!! 初初我真係好擔心弟弟, 夜晚要叫先識起身去廁所, 而家自己瞓半夜尿床點算呢? 嚇到我走去買床墊俾佢, 又吩咐佢夜晚過左 7:00 就唔好飲水只可以濕口, 再加埋佢地 10:30pm 先瞓覺, 臨瞓前咩都屙清所以呢兩晚冇癩尿, 安樂晒 :D
出去先知屋企好, 小慈好掛住屋企張床, 又好掛住我, 晚晚有打電話報平安話一聽到我把聲就想喊... 弟弟就比我想像中獨立, 係入 camp 時拜拜我眼圈紅左, 攪到我不敢久留, 之後仲有搗蛋掉晒床單枕袋落地, 唔肯影相, 爬床叫唔停, 要導師 mark 住佢 @.@ 可能就係有導師貼身照顧, 適應左就變番正常!
最難忘既經歷係黃色暴雨 BBQ, 小慈凍到又著褸又著便利雨衣咁燒野食, 但都係太凍食左兩條腸咋! 小明燒完兩條腸就學人燒雞翼, 點知燒左成晚隻雞翼都唔熟就冇食到, 兩姐弟 9:00pm 報平安時話好肚餓問我可唔可以買杯麵, 因為兩條腸仔實在唔夠飽怕瞓唔著! 好在我有俾錢佢地擇袋買左個 $9 杯麵兩個分, 真係好 funny! 而家知呢, 平時爸爸燒埋雞翼俾你地食到 lam lam 脷, 知難燒啦! 下次要醒目燒麵包、魚旦同腸仔先嘞, 呢 D 笨既經歷都係學習既一種啦!
兩個不約而同話出年再參加令我非常安慰 ^^
沒有留言:
張貼留言