神蹟

我要講一個見證:

星期日搭的士返教會因為趕住早堂獻詩, 但得我一個搭好唔化算, 於是叫醒晒全家陪我  >v<

崇拜完返屋企就搭巴士, 上左車先發現唔見左小明張八達通!!  唔通留左係教會?!  即刻搵人幫手搵過又唔見......  好唔開心, 因為張八達通套好特別, 在新加坡動物園買既一個小小紀念品, 小明好鍾意, 仲要岩岩增值左 $100, 雙重打擊!!  我自己張卡都唔見過 2 次  x_x  我其實係一個好小心既人,  唔知點解同八達通過唔去, 今次仲老貓燒鬚係阿媽整唔見阿仔張八達通, 真係好 down..... 神呀, 俾我搵番佢啦  >.<'

當我返到屋企, 發現有人係我個 blog 度留言俾我, 留言者竟然係的士司機!!!!  @.@  原來有乘客執到小明張八達通交番俾佢, 的士司機黃生發現八達通入面有小慈小明張年曆卡, 上面有我 blog 既網址, 於是佢就去我 blog 度留言叫我聯絡佢!!!!  咁轉折咁麻煩既方法都俾佢諗到!!  超勁!!  超有心!!

我即刻聯絡黃生, 佢仲好人到話如果我唔趕住用, 經過開我屋企先車番俾我, 唔駛我專登出去羅添!  我真係感動到難以形容, 攬住弟弟大叫：「搵番喇~~  搵番喇~~」

事隔兩日, 黃生就真係轉程車番張八達通俾我, 俾要送到樓下!!  真係神蹟一樣!!  感謝神在我懷疑、自責、內疚既時候播下信心, 俾我地遇到好人好事, 真係好感恩!

弟弟都好開心!  佢話：「點解黃叔叔咁好人既?  上次媽媽唔見八達通俾人嘟晒 D 錢, 今次黃叔叔車番俾我地真係好好呀!」 講得一 D 都冇錯, 亦都感謝的士上路不拾遺既乘客, 全靠佢執到俾番張卡黃叔叔  :)

人間有愛, 願神祝福黃生!  神真美好 ^^