適應

不經不覺開學已經三個星期, 有著小慈家姐既照顧, 個個小息陪弟弟一齊食小食盒, 午息帶弟弟去圖書館借書, 去小食部參觀, 去校務處交表格, 去操場玩跳飛機, 去搵老師買乘車劵等等.... 小明適應得尚算可以, 表現得喜愛校園生活, 上堂積極舉手答問題, 又主動幫老師手做班務, 最遠試過幫老師去圖書館搵第二位老師取報紙, 飲恨自己做唔到班長只得做第 4 組組長  :)

最唔習慣咁早起身同冇得瞓晏覺, 朝早起身會扭計, 會碌入我間房要我攬住佢瞓多陣.  放學好攰, 做功課做做下會趴係度瞓左 ZzzzZZZzzzz  寫中文生字一見老師話要寫 4 個詞語以上會寫到喊, 自己抹眼淚好可憐咁既樣 V_V   英文數學都掌握到, 但未認得晒 D 字要讀題目俾佢聽先識做.  中文普通話最屎, 完全聽唔明老師講咩野, 呢方面要惡補下, 其餘都適應得唔錯!  爸爸提議小明參加武術興趣班, 希望佢強身健體唔好咁輪盡之餘亦都學下有紀律跟指示, 小明性格太 carefree 太即慶要管教下, 於是上左兩星期之後, 小明反應極之開心, 話每耍一招要 hold 住仲要大叫一聲, 非常攪笑令佢次次都忍唔住笑跟住郁左喎, 唔知佢幾時先學識耍晒成套拳俾我地睇呢  :D

科技發達, 家長之間互相幫助, whats app 群組每日幫大家一齊傾功課, 家長義工午飯時幫忙照顧小朋友之餘更加幫手影當日黑板手冊, 真係令到要返工既媽媽十分感動!

小明抄手冊麻麻地, 我睇得明佢亦抄岩晒, 但格式未岩老師規矩, 不過呢 D 係小問題我知佢已經好努力!  暫時最鍾意體育堂同音樂堂, 日日返黎唱校歌話好好聽  ^^  亦都鍾意視藝堂因為有得畫圖畫油顏色, 非常俾心機, 老師都有俾隻 A 佢作鼓勵

視藝堂自由創作, 估唔到小明畫咁多野喎

小慈家姐讚弟弟叻仔, 話視藝羅 B+ 係好難架!  老師仲有俾貼紙添 ^^

第一次默書, 佢所有字都識, 唯獨是聽唔明老師講普通話「圈」起來, 就咁寫係隔離, 於是成 part 冇分  @.@  係我心目中係 100 分啦, 下次學精 D 就得

不過交齊功課, 老師送左第一張獎勵劵俾弟弟, 開心到佢笑咪咪 ^^

無端端某日 8 號風球意外地全日唔駛返學, 開心到兩姐弟癲左, 大叫: "終於有得玩玩具喇!!!"  玩足全日, 爸爸話由佢地喎 ^^  到我放工返黎, 突然發現弟弟將所有最惡既恐龍圍住 Jimmy  @.@

恐龍們仲圍攻一隻恐龍添??!!!  好暴力下喎小明 B!  暗暗留意下係咪反抗壓力既表現先

要學咁多野, 適應咁多新事物, 每日都攰到佢 C C 下隨時瞓著, 8 號風球既呢一日都唔例外

知你辛苦喇, 仔!  加油呀!!!