剝牙

小慈既恆齒好大隻, 而瓜子口面既佢顎骨太細令 D 牙唔可以正常生長, 於是經常低燒又牙痛!  後來牙醫建議早 D 剝上顎既小臼齒, 令恆齒有位出, 或者可以幫到 D 牙有機會排整齊

於是就去剝牙啦!  製造一個輕鬆既環境, 姑娘俾小慈載黑超又整古佢將墊頭既枕頭放係佢下巴, 小慈好勇敢不過好緊張, 係都要拖實我

因為要剝晒左右上顎既小臼齒, 為免小慈辛苦同埋要用麻醉藥會導致一邊面冇感覺, 於是一個星期剝一隻啦!  點知連牙醫都錯估形勢, 原來小慈 D 牙太逼已經導致發炎, 於是當牙醫剝前面隻小臼齒點知連後面個隻都扯埋出黎!!!!  牙醫仲要由頭到尾預自己剝一隻, 所以後面個隻牙得半隻牙搽止痛藥, 剝既時候後面個隻牙係感覺到痛既, 小慈隻手揸得我好緊, 真係冇陰公, 我見到都痛到飛起, 小慈咁痛都冇叫出聲, 我真係肉都赤晒!!!  好在 BB 牙冇牙腳一扯就甩,  我明知佢痛, 但如若我表現肉赤小慈應該即刻爆喊, 於是我故作輕鬆話: " Buy 1 Get 1 Free 喎!  剝一隻牙仲送多隻, 真係抵呀!  BB 牙遲早甩, OK 啦!  而家個牙洞咁大, 恆齒實夠位生, 靚靚呀......" 先令到小慈女笑, 真係呀媽難做呀......  v_v

一個星期之後又去剝埋另一邊, 今次牙醫醒左, 前前後後都同小慈搽大量止痛藥膏, 怕小慈好似上次咁, D 牙逼到剝一隻扯埋隔離個隻.... 點知, 真係呀!!!  又 buy one get one free  @.@

今次做足功夫就唔同, 不過小慈而家上顎左右兩邊都有個大洞, 又痛, 根本用唔到力咬野!  煮左兩日粥俾佢食, 太硬既野佢又食唔到, 肉又要撕碎 D 俾佢, 已經瘦成咁仲食唔到野, 真係聞者傷心..... 希望佢個牙洞快 D 埋口食番野, 剝左既牙令後面生得靚, 將來唔駛箍太多啦

希望一切值得, 求天父保守看顧~