Poor Jimmy

記得 Jimmy 嗎?  我地上個月買番黎既草龜仔!  佢呢個月真係多災多難, 超級可憐差 d 龜命不保 V_V

事源係咁既, 之前方便兩姐弟近距離觀察 Jimmy, 我地將佢放左係電視機旁邊, 買左返黎咁多日 Jimmy 都唔肯食野我地已經好擔心

3月15日 (Tue) 晚上, 爸爸去左沖涼, 我同小慈係飯枱做緊功課, 工人姐姐洗緊碗, 弟弟自己玩緊玩具相安無事, 點知爸爸沖完涼出黎發現 Jimmy 唔見左 @.@  有咩理由無端端龜間蒸發得架?  即刻搵!!  弟弟就企係梳化, 周圍都係 cusion, 搬開 cusion 就見到 Jimmy!!!  一攞起 Jimmy, 梳化成灘血 @.@  Jimmy 左腳 4 隻腳趾甲斷晒, 左手指甲都斷左 3 隻!!!  Oh No~~~~~~~  我地推斷應該係弟弟擅自係魚缸攞左 Jimmy 出黎放係梳化玩, 唔覺意整到佢斷左 d 趾甲!?  

當下我同爸爸都好嬲好嬲, 之前警告左弟弟好多次唔可以伸手入魚缸摸 Jimmy, 而家仲大膽到靜雞雞攞佢出黎玩??!!  平時通常一係我鬧, 一係爸爸鬧, 我地好少兩個一齊鬧弟弟, 於是佢嚇到大喊左半個鐘頭我地都唔理佢, 真係好嬲!!!!  我仲要唔識同 Jimmy 止血, 睇住佢 d 血一滴一滴咁流出黎我個心就碎左..... 小慈都好傷心但佢冇怪弟弟, 只係好擔心 Jimmy!  情況太唔樂觀, 我同小慈講 Jimmy 可能會死, 當初我唔應承佢養小動物, 就係因為弟弟太細個唔識照顧!  小慈竟然同我講: 

"媽媽, 我地一齊為 Jimmy 祈禱, 求天父醫番好 Jimmy 唔好再流血啦, 我真係唔想佢死呀!"  

跟住就拖住我一齊合埋眼祈禱, 小慈第一次自己開口祈禱, 聽住佢既禱告真係心都實晒鼻又酸, 我死忍住唔喊, 因為我地要堅強, 要對神有信心, Jimmy 會好番既!!  

流左一晚血終於都停左, 放工即刻帶 Jimmy 去金魚舖求救, 店主一聽到 Jimmy 既情形就話佢 "自殘!!"  下??!!   話佢唔適應新環境係梳化專登扯甩自己 d 指甲腳甲自虐???!!!  我真係未聽過!!  龜唔係冷血既咩???  點解會識自殘身體???  住係我地屋企有咁唔開心咩???  話說回來, 如果唔係弟弟靜靜雞攞 Jimmy 出黎都唔會俾到機會 Jimmy.... 唉....  店主俾左支藥水我地, 叫我地放暖水浸下 Jimmy, 會令佢心情好 d 肯食野, 斷指甲好少事, 係怕佢發炎就長手尾!  返屋企即刻處理, 見唔見到 Jimmy 隻左腳光脫脫呀?  眼神仲好怨恨...... 

滴左幾日藥水, Jimmy 真係發炎呀!  手仔腳仔甩晒皮, 真係好擔心!

3月19日 (Sat) 晚, Jimmy 突然間擘大口食左 3 粒龜糧, 我好開心, 不過真係只係一啖, 係我歡呼完抱小慈小明睇佢開口之際, Jimmy 又唔郁 lu....  3 粒龜糧, 不足以有便便啦!

4月2日 (Sat) 中午忽然放晴, 拿拿聲放 Jimmy 去曬太陽!!  發炎, 即是有細菌, 曬一曬快 d 好番!  Jimmy 個樣都好享受, 不過依然唔肯食野......

4月8日 (Fri), 今晚弟弟錯手放左大量龜糧俾 Jimmy, 本來只係覺得徙料, 點知洗缸時覺得 d 龜糧好似少左 D, 明明弟弟頭先放左至少 30 粒, 而家好似得番一半!!  依?  唔通呢幾日暖番 Jimmy 心情都好番肯食野?

4月9日 (Sat), 我地帶埋小慈返路加團契, 工人姐姐同弟弟係屋企, 姐姐笑微微話 Jimmy eats every single piece of turtle food!  抱住弟弟睇住佢食晒!!  小慈仲 dum 心口話睇唔到好唔開心添!  冇所謂啦, 最緊要佢肯食野阿女!  感謝主, 小慈第一次開聲祈禱, 神就垂聽!!

4月10日 (Sun) 今晚, Jimmy 表演鯨吞龜糧!!!  仲要我地俾幾多, 佢就食幾多, 一粒都冇剩呀~~~~~~~~  Yeah!!!

原來佢一直都知飄浮緊既係龜糧

Jimmy 變番活潑好奇, 平時我部相機 Zoom 埋 d 佢都龜縮架!  今日俾我影到咁大頭 ^^  而家仲有少少甩皮未完全好番, 不過佢終於肯食野我地就放下心頭大石!  努力呀, Jimmy!!

Jimmy 鯨吞龜糧實錄, 去片!!   Click 

https://youtu.be/PvG7IH2VsMQ