愛錫弟弟既小慈

我仲好記得小慈 2 歲之前個個都估佢係仔, 就算全身粉紅色都仲有人估錯 @.@  不過隨住小慈頭髮增長已經越來越靚女, 髮型真係好影響一個人既外表!

自己生既小朋友, 咩樣都咁得意, 咁窩心架啦 ^^

最令我欣慰既係小慈真係好錫弟弟!  

明明係教會天台玩緊賽跑, 小慈係會無端端截停弟弟 kiss  ^8^

天氣實在太好, 忍唔住去公園玩

玩都要手拖手

小慈跑, 弟弟又跟住跑, 點知跌親!  弟弟唔郁又唔喊, 係咁望住小慈

終於等到小慈返黎拖番佢起身.....

係呢一刻, 我好慶幸生左 2 個小朋友, 更加慶幸, 小慈咁愛錫弟弟!!  抵我地買架單車俾你既!  乖女

公主車就順利過渡俾小明.... sorry 呀仔!  用得唔好徙麻 :P  2 歲 4 個月既小明未識踏單車, 辛苦爸爸要推車

小明近來唔知發生咩事朝早又攬大脾唔俾我返工 @.@ 

我唔理佢照 bye bye 佢就大叫  "未得! 未得!"

咩未得呀?  

原來佢話 "Big Hug"!!  因為激動得滯走左音我聽唔清楚....

Big Hug 完就 bye bye 啦, 佢又想喊話 

"你未 kiss 我呀~~" 

非常痴纏攪好耐都未出到門口 @.@

放工返屋企, 未入屋已經聽到佢把聲: 

"媽媽返黎喇!!  我好掛住媽媽, 我好鍾意你架媽媽!!"

我去到邊度都尾隨我 

"同我玩丫媽媽!  一齊坐啦, 媽媽"

連我話去沖涼佢都想喊, 聲震震咁叫我快 d 出番黎 !!! 

仔呀仔, 爸爸極唔歡喜你做裙腳仔 / 黐媽 B 架, 快 d 堅強 d 唔好咁易喊!

雖然你阿媽我見到你咁既表現霖到爆炸!!!  但都要勸勉你唔可以小小事就喊, 知唔知?

成屋人都錫.... 受寵的小孩!!