消防安全教育巴士

屋企樓下無端端出現左一架消防安全巴士, 吸引左大批小朋友圍觀, 我地都趁熱鬧入去玩下先 :)

排隊等上巴士, 小明弟弟幾時學識手插褲袋???!!!

火災既時候, 濃煙向上升, 記得踎低搵出口!  火災 9 成都唔係燒死而係焗死

安全巴士入面其實係一間屋, 有好多間房, 房入面有模擬電器漏電冒煙 (正確做法係拔除電源), 有廚房著火 (如果係金屬門柄千奇唔好直接用手摸, 要躲在門後開門慎防搶火).... 對我呢個安全大使黎講好多野都係溫故知新, 不過小慈小明就非常有興趣!  仲有親切既消防員同佢地合照, 加分!  加分!

最逼真係呢間房!  火燭既時候漆黑一遍, 記住帶 電話 & 鎖匙, 可以求救, 唔對路亦可以返屋企, 要踎底行向有光既地方, 如果周圍都冇光又唔熟路, 最好返番屋企報警, 唔好一路逃走一路報警, 因為 999 報案中心會問你好多野, 你需要時間坐定定答

參觀完有滅火筒玩

好逼真!!!  自己渣住條滅火喉真係射得出水

記住廚房有油 and 電器著火千奇唔好用水滅火

小慈小明大叫好好玩!

玩完仲有大量禮物派

弟弟好細粒

好姣既紫色環保袋

Bye Bye 喇~~ 消防安全教育巴士, 我地玩得好開心呀!

呢個宣傳方法好好!  記得定時再返黎呀, 我地會失憶唔記得點樣求生架!