長假期後第一日返學, 小明見到我地拎 d 書包校服出黎, 即刻意識到唔係出街, 仲聽到小慈話:
"返學搵連老師, 馬老師喇!"
弟弟即刻爆喊仲唔肯換校服, 係咁話要媽媽抱, 抱住都係咁喊話唔返學要同媽媽去街 @.@ 都預左長假期後返學又要重新適應架喇~ 小慈尋日都有喊架, 自己係梳化度飲泣....
小慈: "我好唔捨得放假呀...."
我: "係唔係好鍾意放假媽媽帶你去街呀?"
小慈: "係!"
於是我氹佢好快就放農曆新年假啦!
小慈: "即係幾時呀? 你點知放假既?"
我咪帶佢去睇月曆, 話佢知月曆上面紅色既日子就係假期, 小慈同弟弟唔駛返學, 爸爸媽媽唔駛返工咁囉! 小慈先破涕為笑咋! 之後我俾個任務佢, 叫佢帶 2 本靚相簿返學校俾老師睇 studio 相, 小慈當堂笑晒好得戚! 小明就由屋企喊到返學校, 係見到有個小朋友喊得大聲過佢就停左一陣, 不過同我 bye bye 時又喊過, 我趕住返工都冇時間理佢, 交俾老師抱住佢我就走
下晝同老師通電話, 小明情況又唔係咁惡劣喎, 排隊洗手, 食早餐, 水果, 午餐全部自己黎唔駛人幫之餘仲食晒!! 玩大肌肉又開心, 分組上堂又 ok, 老師都話佢適應左學校生活, 知道跟住做咩都好合作, 心情好就咩都得, 只係有時會小小扭計要搵小慈, 不過都好易氹, 老師好滿意, 仲話星期三可以留係學校瞓埋晏覺先走, 今朝已經話左俾小明聽邊張床仔係佢既, 問佢肯唔肯同小朋友一齊瞓覺? 佢應承左話 "好" 咁呀! 有 D 咁既事?!! 突然間進步神速真係估佢唔到! 唔通佢同小慈一樣係屋企喊左返學校就唔喊? 真係要拭目以待!
星期一係見到套校服喊, 星期二係老師開門喊, 星期三係拍卡先喊, 有進步架喇! 連老師覺得小明 ok 於是嘗試係學校瞓覺, 呢個係一個大挑戰! 就試下佢得唔得! 結果係......
小明完全冇瞓過 @.@
12:15 pm - 2:50 pm 係瞓覺時間, 小明每次一埋去床仔就大喊話唔要瞓覺!! 為免佢喊醒其他小朋友, 老師就拖佢行黎行去, 又呢入教員室, 總之小明要離開 D 床既範圍先收聲!! 1 分鐘都唔肯瞓低, 係咁擰頭!! 老師氹佢就扮打電話俾我, 點知弟弟要求打電話俾工人姐姐, 幾醒呀, 一定係知道打電話俾我冇用, 因為我唔會接佢放學, 反而打俾工人姐姐先有機會可以返屋企 >.<
老師都話弟弟好聰明, 知道自己喊咩野, 知道自己想要咩, 好識表達自己, 同佢講條件講道理佢又明, 會答 "好" "ok" "知道" 得 2 歲人仔真係好叻! 老師好有信心佢好快會適應, 融入到學校生活, 俾 d 時間就 ok!
媽媽知你得架, 返學都未夠一個月已經做得好好, 慢慢黎啦! 當年小慈都攪左好耐先肯係學校瞓覺, 到而家都仲係要有枕頭陪住先肯瞓, 我都有同老師提過小明好細個就要自己瞓覺唔駛人抱住, 冇指定既攬枕 / 公仔 / 被, 有時只要大人拖住一陣 or 陪佢一陣就會自己瞓著, 老師話冇野依賴就仲好, 唔駛專登俾佢! 弟弟, 你已經比小慈叻叻, 加油~~
假期節目太過豐富真係出事, 對得佢地多就會發現佢地一日叻過一日! 2 歲既弟弟而家已經識
- 雙腳離地跳
- 用匙食飯, 用叉食生果, 用杯飲水唔會倒瀉
- 自己除鞋除襪, 梳頭
- 經常唱 London Bridge is Falling down, 最後一句係 my fair 弟弟
- 識玩 iPhone, 最鍾意玩 safari
講野非常叻, 會講既野包括:
- 早晨 Good Morning
- 冇禮貌! (問佢邊個冇禮貌佢會答 "弟弟")
- 我係泰山 (一把抓起鯊魚舉高過頭!)
- 我係 butterfly 呀 (除到件衫跌晒膊咁扮對翼)
- 真係好犀利, 好攪笑呀!
- 唔該借借, 唔該晒~~
- 我渣車! 唔推我!
- 我跑得好快呀
- 我要白兔, 唔要黑豬!
- 我個波波係邊呀? 呢個係我, 唔係你既!
- 我想睇風景
- 呢度真係好高, 我會跌, 跟住呢就喊喊, 要媽媽抱囉
- 咩黎架? 做咩事呀你地?
- what are you doing?
- STOP! 差 d 就車到我地喇 (過緊馬路)
- 唔 open 到, 我 open 左 (識自己開包 Oreo 食)
- 我想要筷子呀, 唔該
- 程尋磨較叉燒包 (識出包)-
鎖匙開門呀, 媽媽! Ding Dong.... 有冇人呀?
- 小慈你做咩喊呀? 做咩事呀你? (會攞紙巾俾小慈)
- 吞左未呀你? 快 d 啦! (催小慈食飯)
- 小慈唔乖, 我係 good boy!
- 我唔飲奶奶, 唔擦牙, 我要瞓覺!
- 我要奶奶擺係呢度, 擺呢邊
- 我頭先有喊喊呀! 媽媽抹 (眼淚) 唔該
- 我有飲晒奶奶, 而家要飲湯湯!
- I want carry! 唔該媽媽抱抱
- 我要打電話! 俾我俾我! 我先呀! 我要喂喂喂咁丫麻!
今晚仲扮魔術師娛賓, 去片~~~
沒有留言:
張貼留言