第一次返學唔喊 & 派手冊

小明星期日無端端起咳, 咳到好似肺癆咁勁多痰聲, 半夜喊醒幾次因為有綠色既鼻涕塞住抖唔到氣, 抱起佢探熱仲發埋燒添!!  即刻餵藥滴鼻仲要攬住佢係梳化坐天光, 已經有藥食緊都攪成咁, 唯有再去睇醫生轉藥, 怕且都要食抗生素先鎮得住 @.@

發燒一定唔可以返學, 仲要退左燒兩日先返得, 不過因為時間問題弟弟每日都仲要出去接小慈家姐放學, 老師都有把握機會叮囑小明聽日返學, 話老師同埋同學仔都好掛住佢叫佢快 d 返黎!  小明又識聽喎, 答老師 "知道" "好!"

可能有晒心理準備, 縱然今日係六年來最凍既 1 月, 新界得 3-4 度仲要落雨, 都無礙弟弟返學既熱情~

我: "換衫返學喇, 返學唔喊架!"

弟弟: "我唔喊!"

我: "返學搵邊個呀?"

弟弟: "搵馬老師"

我: "要係學校要瞓晏覺呀!"

弟弟: "知!  我有史迪仔被被, 姐姐接我囉!"

叻仔!!  結果係, 佢今日 bye bye 我真係冇喊, 第一次返學唔喊!! 今日仲係佢第一次返足全日, 同小慈家姐一齊放學 ^^

老師都話小明今日全日都好乖, 係去到食飯時間可能眼瞓就有少少扭計, 非常有進步!!   亦肯坐係自己張床仔, 同老師傾傾下計依住老師手臂瞓左半個鐘, 老師都讚佢叻仔!!  

由初初 1 分鐘都唔肯瞓一定要離開床仔範圍, 到老師攬住佢瞓, 又趴係課室枱面瞓 20 分鐘 (老師一放佢落床仔就醒)  直到而家肯坐係床仔上面瞓半個鐘, 其實都只係 4 日既事, 真係好大進步!! 弟弟既適應力同接受程度其實好強, 叻仔!!

今日仲第一次派手冊

體重  11.5KG   身高  87CM 

高左又瘦左

總結 12 月既表現, 得 1 個 "良好" 就係....

- 在飯前及便後有洗手習慣

都估到弟弟係學校淨係鍾意玩洗手!

帶左兩張相返學做秘密武器, 等小明扭計搵我地時老師先攞出黎, 老師都話有幫助, 成功分散左小明既注意力, 又記得我地吩咐佢唔好喊, 會自己講出黎氹自己! 

老師話弟弟喊既時候真係好 BB, 擘大個口出盡力咁喊, 但一講野就好過癮好好笑, 令人好開心好鍾意同佢傾計, 連 d 嬸嬸姐姐都好錫佢, 一見到佢喊就會爭住成個抱走, 帶佢食餅, 食糖, 睇風景, 出盡百寶引佢笑.....  

有 D 咁既事?!!  咁多人錫佢氹佢真係估唔到呢!  我仲以為小明日日咁喊法好乞人憎添~