遠近慈明

2018年1月17日星期三

連環甩牙

差不多朝朝都食麵包做早餐, 小明近期最愛糧友既芝士棒包, 鍾意佢條條包都有粒粒車打芝士, 超級好味!

今朝食食下早餐, 弟弟入黎搵我, 話個包入面有粒芝士特別硬, 咬唔到, 吐出黎先知道原來係佢隻牙!!!!! 食食下包甩左隻牙!!?!! 笑死我!

好在冇吞左落肚, 係佢既上側門牙 (右邊) 黎架! 甩牙都甩到咁好笑, 弟弟真係好可愛~

事隔一日, 弟弟放學打電話俾我, 話今日上上下 Net 堂, 覺得個口好痕, 於是捽下, 點知一捽, 左邊既上側門牙都甩埋!!!! 有冇咁化學呀! 捽下就甩, 仲要連環兩日甩牙 @.@ 好在完全冇血, 不過都嚇親班同學仔, 優待左弟弟有得上堂時間去廁所 ^^

對上一次甩牙, 已經係 2016 年暑假既事, 一年零 4 個月先甩多兩隻, 而家 total 甩左 8 隻牙, 同齡既小慈都係甩面呢 8 隻, 不過當年因為小慈口仔太細 D 牙又大隻唔夠位出, 先去牙醫度剝左 4 隻 BB 大牙俾位恆齒出世期望唔駛箍牙, 所以當年 8 歲半既小慈係冇左 12 隻牙架 >.< 不過當年明智既決定先造就小慈而家有美麗動人既笑容 ^^ 一日未出齊 D 牙, 一日都未知要唔要箍, 弟弟就肯定唔駛箍, 因為佢個口夠大 :DDDDDD

2018年1月13日星期六

小四小六家長日

小慈小六家長日, 心情好緊張, 雖然派晒卷都知道分數, 但其他閒科就唔知佢考成點, 操行又唔知有冇 A, 成績屬於 band 幾, 成張成績表靚唔靚等等.... 於是, 全家一齊 8:00 am 返學見老師啦!

學校人頭湧湧, 遇見朋友仔張卓諾, 原先小明小一時, 連同諾諾家姐恩恩 4 年級 3 年級 2 年級 1 年級一級級咁排, 眨眼間, 恩恩已經畢左業升讀曾肇添, 小慈 6 年級到佢揀中學, 諾諾 5 年級下學期呈分, 小明 4 年級榮升高小.... 時間真係過得好快啊~~

每年都係課室門口影張相

仲要同難得出現既爸爸影相留念添 ^^

同學仔陳鈞燾, 小明話全班都叫佢做陳雞頭 :DDDD

叫佢地擺 pose 影張相就攪成咁

小明今次考試其實考得好好, 總平均分 79.96, 名次 50/129, Science、聖經、常識、中英文既 Oral & Listening 都係 A, 出年可以試下參加朗誦節 ^0^ 最叻係科 Science, 唔係串錯 toilet 的話, 100 分呀!! 要注意英文, grammar & comprehension 都弱, 要多閱讀英文書慢慢改善, 克服障礙唔好怕英文, 學校出名考試份卷長 14 pages, 如果因為唔識 D 字做得慢就好蝕底, 數學就要小心, 唔好望一眼就求其答! 班主任李老師話小明成績算唔錯, 但絕對有進步空間可以再上讀精英班! 人非常聰明, 轉數快, 直接, 會善意既搏嘴, 多嘴得黎有專心上堂, 人煩少少, 成日俾班主任話佢似「師奶」但攪笑得意既. 紀律禮貌都 ok, 有 B, 唔會刻意犯規, 責任感就差丁丁, 得 B-, 主要係佢功課多改正, 漏改又褶角, 已經係俾老師捉改正既常客, 仲有佢話自己做領袖生好忙, 返到班房就唔係好願意服務同學, 老師都知所以唔係好叫佢..... 真係聽到我同爸爸一時驕傲自豪, 一時又面紅耳赤.... 我地知道弟弟係讀書既材料, 溫習時好輕鬆好快就記得晒但就態度差成日懶懶閒唔想溫習, 我地對佢都有期望架, 希望幫佢更上一層樓, 學班主任話齋唔好「徙」左佢麻! Well done my Boy :)

到小慈喇~~

原來小慈班相既同學仔都係呢 D pose, 可能呢期小學興扮朦面超人.....

小慈的好同學 -- 李念恩、李蒨枬、林穎彤

已經轉左去有直屬中學讀國際學校既世界冠軍, 同小慈係好好既朋友, 呢張欣賞咭, 小慈非常非常珍惜

小慈全級排名 80-90, 計埋呈一呈二分而家屬於 Band 2, 班主任龔老師話小慈有進步, 會緊張自己, 無論上堂定做功課都會緊張, 有盡力做好, 好乖! 我同爸爸最開心既係小慈數學終於合格!! 成張成績表終於冇紅色, overall 成績有 B!!! 我地真係好開心, 操行全部都 B+, 閒科全部都 A-, 排名由上年跌出 100 外, 終於入番個圈, 距離 Band 3 都好遠, 班主任話就算呈三失手都冇事, 仲有空間上番 Band 2 頭添! 而家自行選校可以進取 D, 揀晒 Band 2 頭既學校都冇問題! 加油! 呢張小六上學期成績表用黎報學校都見得下人嘞 ^^ 真係好, 可以放心搏下, 而家小慈中英數都係 BCC, 報直資學校唔係 all B 又唔係 Band 1 生係好蝕底..... 盡力做好吧! We do our best, God will do the rest! 天父一定會為小慈預備最適合佢既學校! 要對天父有信心!!

小慈帶我同爸爸參觀學校, 每逢有佢個名出現既地方都帶我地睇一睇

制服團隊劉老師請小慈訴心聲, 原來會貼出黎咁大件事, 好在小慈都寫得唔錯

制服團隊心聲

另外一塊展板仲有小慈個樣添!

係佢地午息時在 Pooi Kei Got Talent 上表演, 幾個妹妹要寫劇本做一個廣告出黎, 題材係書包, 為同學仔介紹轆轆書包, 用左自己同弟弟個書包做示範, 最後由觀眾投票贏左冠軍!!

最可惜冇錄影, 我都好想睇呀!

小慈寫見證呀!!!!

最好笑係佢話寫得好匆忙, 仲要唔知道俾人貼左堂! 早知寫靚 D 啦 :DDD

陶瓷班既作品做展覽, 弟弟有份呀!

佢隻龜曉戴帽真係好得意! 點估到呢隻小明 B 鍾意玩陶瓷

今次家長日爸爸媽媽好安慰, 希望你地繼續努力呀!! 付出有收穫, 爸爸媽媽替你地好開心! Well done! Good Job!

2017年12月31日星期日

除夕倒數@塘福露營車

我地班好朋友, 趁聖誕長假約出黎玩, 講下講下就話不如露營, 講下講下又話不如露營露得豪華 D, 於是就 book 露營車, 又俾我地 book 到喎 ^^ 期待左成個假期, 我地入 camp 喇!

約左係遙遠的東涌集合, 有爸爸義載我地早到左好多, 兩位小朋友爭取時間玩 UNO

好耐冇見既地下噴泉, 早幾年黎呢度, 小慈小明係會不顧一切衝出去玩, 而家大個左就會知道衝動既後果, 觀察左好耐都唔敢輕舉妄動, 終於, 數左好幾次知道第幾下出最少水柱鼓起勇氣衝出去, 點知, 估計錯左下節出水柱既時間點都會快過人跑既速度, 於是, 有位小朋友衝衝下就被地下水柱由褲浪沖左上頭頂, 濕晒! 好在今日有太陽唔凍咋 >o<