之所以揀去食壽司因為位於大型商場, 我地應承左俾小慈自己揀生日禮物, budget 係 $200. 好難揀, 因為 D 野貴左好多好多, 稍為似樣 D 既禮物都即刻超支! 呢隻搖控機械甲蟲價值 $199.9 佢恨左好耐, 但 $129.5 既 Twister 又好想要喎, 點算好呢? 見小慈非常辛苦地考慮, 手掌又係肉手背又係肉.... 終於佢放低左隻甲蟲揀 Twister 因為想一家人一齊玩! 嘩~~ 乖得咁緊要, 咁重視屋企人寧願犧牲自己既心頭好, 我地梗係兩份都買俾佢啦 :)
呢位路人甲見小慈家姐揀機械甲蟲, 就話先前搬屋踩爛左一隻, 爸爸話冇辦法維修應承遲 D 買番俾佢, 「遲 D」就係今日要爸爸守諾言. 爸爸當然係失憶啦, 於是呢位小朋友成個人騎左上爸爸度又抱腳又攬又爬又氹, 係都話爸爸有咁講過..... 見到佢地係咁拉鋸, 真係笑死我喇 :D
皆大歡喜返屋企, 小慈即刻開新玩具玩啦 ^^
生日之前其實都買左禮物俾小慈, 所以 budget 先限佢 $200! 就係呢棵水蜜桃樹, 係花園街見到時已經雙眼發晒光, 話自己超級鍾意食水蜜桃, 好想自己種! 乖囡一講, 我呢個阿媽幾辛苦都抬棵樹返屋企.... 水蜜桃, 你要多結果子啊~~
多謝姑媽送既禮物
生日點可以冇蛋糕?! 我地熄晒燈拎個蛋糕出黎, 小慈完全冇估到我地有預備, 點會有時間買既? 我地梗係有辦法啦 ^^
壽星囡話要食 buffet 我地不敢怠慢! 連去邊間 buffet 食都指定埋, 可惜小慈冇講清楚原來佢想食生蠔.... Ooooops! Lunch buffet 係冇生蠔提供的 v____v
不過 buffet 送 signature blueberry cheesecake 俾 birthday girl 都令小慈非常驚喜!
11 歲大個囡, 要在生日後一個月內申請身份證, 我地梗係趁仲係學校假期嗱嗱聲去申請唔駛請假啦! 記住早 D 預約呀! 小慈張身份證相影得幾靚啊, 人人都讚佢越大越靚女 ^^
小慈囡, 爸爸媽媽弟弟都非常非常愛你! 祝你生日快樂, 日日都快樂, 身體健康, 呈分試順順利利, 聰明伶俐悟性日增! We love you!
Happy Birthday Sweet Heart ^8^
