好開心呀!! 學校安排 K3 家長觀課, 我最鍾意觀課架勒, 有機會睇到弟弟平時上堂咩樣丫麻, 仲要今年係最後一年, 畢業上小學更加冇得睇, 於是幾大都出席啦! 最好笑係弟弟之前病左遲左收通告, 我千叮萬囑弟弟一定要補交番張觀課回條, 弟弟返黎話我知, 葉老師一見到我地張回條就話: "都知你一定會黎架啦" Yeah ^^
送郭恩明小朋友返學, 佢最鍾意就係媽媽送佢返學
原因係有薯餅食啦, 呢個口水佬會問我好多問題啦, 又會拉我呢度睇個度睇! 今日就發現牆上面好多蝸牛, 睇到依依不捨
家長觀課暨講座開始了! 社工 Bobby Sir 同大家講既題目係 " 幫助高班幼兒適應小學學校生活", 帶出我覺得最重要既兩點:
(1) 升小學要留意小朋友既身心靈健康, 作息要定時, 一定一定最低限度 11:00pm 前瞓著, 上小學通常 7:00am 要起身又冇得瞓晏覺佢地會好快頂唔順
(2) 體諒接受及關心小朋友升上小學既種種適應改變, 幼稚園老師呵護備致 vs 小學老師滿有威嚴, 對小朋友黎講都需要時間及正確心態去適應, 多 d 問佢: "今日返學點呀? 有冇開心唔開心既野分享呀? 點解你唔鍾意呢個老師呀? 同葉老師有咩唔同呀? 同學又點架?" 令小朋友感覺到你重視佢既感受, 同佢同一陣線, 一齊經歷
觀課了!
今日睇外籍英語老師 Mr Jack 上堂, 有 Song Time, 佢地識唱好多歌, eg: Good Morning to You, The Itsy Bitsy Spider, I'm a Little Tea Pot, The Wheels on the Bus, I am going Primary School, If you Happy and You Know it, 仲有一首 Snowman 我唔識, 好犀利呀!
跟住 Word Time, 今日教大家既字係 Ch, 小朋友真係超犀利, 佢地識得講 Cheese, Chocolate, Chess, Chicken, Chair, 弟弟都舉手出去畫公仔, 佢講既字係 Church, 好叻叻呀!
Mr Jack 仲羅左一大疊字咭出黎, 小朋友反應超快, 所有既 vocab 識晒!! 弟弟仲厲害, 一張字咭 Water, 一張字咭 Wet, 佢爆一句 "Water is Wet!" Mr Jack 即刻讚佢 "You are brilliant, Young Man!!" 佩服, 佩服!! 自己睇自己個仔梗係覺得佢醒 d 啦, 嘻嘻嘻 :p
葉老師補充話佢地對拼音已經好熟悉, 好似呢幾日寫既生字 "computer", 佢地都係拼出黎既, 非常好呀!
小一模擬已經進行左 3 日, 小朋友漸入佳境, 抄手冊情況有進步, 訓練佢地善用及管理好自己既自由時間, 在 15 分鐘小息內要食左生果先可以食自己食物盒既小食, 抄手冊起簿頭做得慢既就要犧牲自己珍貴既小息時間去做番, 所以佢地個個都好積極, 亦都越來越掌握到節奏, 情況良好 ^^
好叻叻呀! 加埋小慈家姐過來人既經驗, 相信弟弟上小一係冇問題既!
