大舅父

真係好耐冇見, 大舅父係我讀小學 6 年級既時候移左民, 之後我出黎做野賺到錢, 去過一次美國探佢, 事隔咁多年, 我地又再見面喇!!  我同細佬係家族中第一、二粒孫, 萬千寵愛, 個個舅父都好錫我地兩個

小慈小明第一次見大舅公, 係咁話大舅公好好人

大舅父今次返黎竟然係參加小學同學聚會, 40 年同學啊!!  咁都仲 keep 到, 真係勁勁勁

我同舅父食飯, 小慈小明亦都同舅父食飯, 感覺好得意呀 ^^

Happy gathering!  希望再有機會, 我可以帶小慈小明去美國見佢地既阿白、姨婆、舅公s 啦 ^^

雷達山

今日我地返教會跟連姑娘行雷達山, 點知返教會途中突然傾盆大雨, 下身全部濕晒, 咁點行山呀??  小慈小明好失望, 但都對天父有信心, 返得教會一定有安排既, 就算唔出去留係教會都有大把野玩啦!

過左一陣, 天氣由暴雨變成微雨, 我地憑信心出發, 登山搵寶藏 ^^

要搵 27 幅圖既實物再影相真係唔容易, 仲要係左手撐傘, 右手寫字影相真係唔簡單

不過我地呢隊攪笑組成績都唔錯, 搵到 15 幅

返到教會有茶點招待, 小慈好乖咁服侍大家

連姑娘話下次好天我地再登山, 因為有好多幅圖都要上山頂先搵到

呢個遊戲好好玩, 擇日再戰!

考完試 鬆一鬆 跳一跳

今次既考試係史無前例咁辛苦.... 我指既係佢地呀媽我 v_v  日日要 OT, 之前話左想放假陪太子讀書, 實際上係完全冇機會, 只可以遙遠控制小慈小明溫習, 最後考成點真係睇佢地自己!

今日考完試, 我本來想請一日假同佢地去玩輕鬆下, 到最後只可以放半日返到屋企已經 3:00pm, 都好過冇得放啦!  當我返到屋企見弟弟咁既樣真係笑左出黎, 腳趾叉晒出黎舉目向天, 蹺晒腳成個少爺仔嘆世界咁款   >v<

小慈就開晒檔想我同佢玩.... 實質我攰到 CC 下, 於是我同佢地講, 不如今日留係屋企休息啦, 爸爸又唔舒服, 天氣又唔好..... 小慈小明竟然應承!  好孝順喎!!  我老懷安慰  :)

點知孝順得一個鐘頭就身痕想出街, 爸爸話帶佢地出街都好, 可以俾佢安安靜靜係屋企休息下!  好啦, 我攞假都係想同佢地出去玩既, 出發啦!

竟然叫肚餓!  一杯雪糕兩份分, 冬天食雪糕唔知點解真係特別開心 ^^

諗左好耐去邊度好....  狂跳放電, 仲唔係考完試發洩既最好選擇?!!

Bounce, 無錯, 我地去跳彈床呀!  位於九龍灣 E-Max 交通方便

跳垃圾膠袋?!

男兒當入樽!  不過真係太高, 連框都掂唔到呢  ;p

呢度雖然大過北角既 Ryze, 不過小慈小明話花款冇咁多, 佢地好想跳入海綿

咁都撞到朋友仔!

兩 pair 姐弟一齊玩閃避球

又跳又叫一個鐘, 成身濕晒

完全虛脫

平時唔飲汽水既弟弟都忍唔住要飲番杯順番條氣

周圍都係 Snoopy 呀!

佢倆個愈來愈有演戲細胞

白兵呀!  型!

岩岩 Science 考完 Skull and skeleton 既小慈對呢棚骨特別有感覺

盡慶而返, 呢位小朋友係架車度已經暈左

考完試就輕鬆晒咯!!

初級詩班開 Party

原來初級詩班一年先會開一次 party!  舊年錯過左, 今年當然勿失良機啦!  史無前例有 21 位小朋友!!

多謝 Queenie 姐姐請食 cup cakes

口味既野係隨住年齡而改變, 小慈呢期鍾意食 vanilla

訂多左, 益埋鍾意食朱古力既弟弟

今日 party 好開心, 仲有禮物收添!

一班小朋友一個星期見兩次, 同用歌聲讚美神, 希望長大後可以共行天路成為好朋友, 同路人!