講起小慈既牙仔真係好坎坷! 由頭到尾都係因為顎骨太細, BB 牙時話佢唔夠位生於是提前剝大牙令恆齒有位出, 點知 D BB 牙太緊扣, 一剝就兩隻大牙一齊甩! 明明只係剝一隻大牙, 止痛藥都係預一隻大牙, 連剝兩隻小慈痛到爆喊, 冇打人都偷笑! 不過呢個決定係正確既, 冇左兩隻大牙位恆齒夠位出之餘, 成棚牙縮番向後仲唔駛箍牙添!!
好景不常, 每半年一次既牙齒檢查, 牙醫姨姨今次終於俾左個惡耗我地 -- 等左 3 年既 12 歲齒冇出到, 照細既 X 光片見到佢地係打橫生, 怕佢頂爛前面隻大牙, 穩陣起見照張大既 X 光片再睇清楚
真係呀!! 下顎最後個隻係智慧齒, 未有牙腳, 已經被打橫個兩隻 12 歲齒影響左都開始打橫!
如果唔處理, 有可能會頂爛前面隻大牙, 而家小慈下顎得兩隻大牙, 與其冇四隻牙 (打橫既 12 歲齒出唔到, 智慧齒打橫出都咬唔到野) 不如剝左兩隻 12 歲齒, 搏一搏未有牙腳既智慧齒有機會因為前面有位而生番正
剝呢兩隻 12 歲齒, 處理方法等同智慧齒啊
剝牙手術我已經好人性地安排去完 camp 開心晒先做, 今日仲預約埋小慈小明爺爺一齊打針!! 第一針輕省 D 抖兩日應該可以做手術, 獎勵佢地打完針食牛扒慶祝!
點知小慈既反應好快, 打完針未夠一個鐘已經舉唔起隻手話針口痛, 單手切唔到牛扒
食花園餐廳最 happy 既時刻 -- 煙霧迷漫
食飽飽有晒心理準備再加埋勁祈禱, 天父必看顧!!
手術準備開始~ 唔好話小慈, 我都好緊張架!
手術一小時, 我唔敢走一直坐係出面等小慈! 到姑娘請我入房就見到小慈咬住紗布仲瞓緊
要等佢既監察麻醉慢慢醒, 我望住呢部機淨係諗到 "醫生, 病人咇咇聲呀...."
麻醉藥效已過小慈開始清醒, 痛楚亦都即刻湧現, 開始痛到標眼水
已經食左粒必理痛先離開診所, 但都仲係好痛!! 嘴唇又麻痺, 食雪糕都冇晒感覺, 搭車回家仲痛到喊足全程, 我真係愛莫能助不停為小慈禱告....
手術後既副作用 -- 小慈肥左! NO 啦, 其實係傷口腫晒形成小慈有包包面
小慈你今次真係好勇敢, 好勇敢!! 問番其他做過手術既人, 個個都話最攞命係麻醉藥過既個下, 真係痛到癲架!!! 我都真係好耐好耐冇見過小慈喊咁耐 (最後一次應該係 2 歲半), 佢喊足成程車個幾鐘呀!!! 好凄涼, 心痛死媽媽了!!!
兩個星期後拆線, 希望今次既決定能為小慈帶來好處, 兩隻智慧齒生生性性打直出黎啦! 不過呢個結果要好多年後, 可能小慈 18 22 歲時先知道!
感謝天父每天施恩看顧!!
