等左足足 4 個月, 終於都等到政府放寬宗教聚會的人數限制, 我地可以返教會喇!!!!
不過都只係俾不超過場地可容納的 30% 既人聚會! 條例 4月1日生效, 所以原定既受難節晨更祈禱會繼續網上舉行, 我地都一早起身參加! 夜晚亦有紀念救主受難感恩崇拜, 往年既呢一晚會擘餅祝酒仿傚主耶穌同門徒既最後晚餐, 為安全計, 我地教會主餐依然暫停直至另行通知
4 月 4 日星期日, 兒童節 暨 清明節 暨 復活主日, 我地既現場崇拜都復活~ 小明話好耐冇搭過巴士, 好耐冇行過呢條斜路返教會, 於是行得特別起勁! 彈下彈下, 拋離我同小慈半條街
教會呀!!! 我地超級掛住你!!! 今日講得最多既係: 早晨! 好耐冇見!!
實體場刊好靚~ 主耶穌復活了!!
主日學依然維持網課, 如果唔係今日我同秋都有事奉在身, 我地應該都會留係屋企崇拜或者返早堂減低教會壓力
教會地方大, 如果禮堂夠 30% 就會上 2/F, 跟住落副堂, 馬可樓等... 疏導人流
好守規矩, 一家人都會分開坐, 千奇唔好掂到 D 交叉
弟弟第一次跟爸爸入音響室
嘩~ 好多制呀!
要準時, 要夾現場音效, 出 PowerPoint 要精準, 仲要睇埋網上直播效果, 一眼關七, 要好多對手協助, 小明學得黎岩架喇
小小音響室身負重任! 呢一年疫情全靠音響部既弟兄, 我地先可以舒舒服服安坐家中參與崇拜聚會! 辛苦晒!!!
返教會就順道去九龍城街市買餸煮飯, 諗住滾啖湯飲, 好順口去豬肉檔講: "要 $20 煲湯瘦肉!" 佢砌左左手邊舊肉仔俾我..... 我真係..... 呆左 @.@ 食飯唔知米貴, 豬肉已經唔知加左幾多次價, 呢度既煲湯瘦肉要 $50, 切開都係得幾片, 你地同我食晒佢呀!
冇船返, 羔蟹都係得番一隻, 小慈小明亳不客氣一人食半邊蟹蓋, 我同爸爸食得少少, 實在太好味!
感謝主耶穌由出生已經預備死亡! 因著袮既犧牲我地得著救恩既福份!!
那空墳墓就是我得救的記號!!
因祂活著 我能面對明天
因祂活著 不再懼怕
我深知道祂掌管明天
生命充滿了希望 只因祂活著!!!
沒有留言:
張貼留言