元荃古道

繼 2018 年 7 月去菠蘿園, 2019 年 9 月東壩半日遊之後, 提摩太團已經好耐冇郊遊遊了!  難得 4 月天氣不太熱, 確診數字回落, 行山又唔駛戴口罩, 我地決定動起來!!

今日約埋大家一齊返早堂, 返埋主日學, 再食個 early lunch, 我地就搭的士去港安醫院, 往元荃古道出發!!

元荃古道是昔日香港新界村民往返荃灣及元朗的古老山徑, 現時元荃古道位於大欖郊野公園內, 我地已經有晒心理準備入場要先行二百幾級樓梯

平時都行慣樓梯, 頂得住!

原來有人數左有幾多級樓梯仲 mark 低左添架!!  唔係 200 級, 係 500 都未見終點 @.@

最終行左 577 級樓梯, 索晒氣....

而呢個只係熱身, 元荃古道郊遊徑, 現在正式開始!!!

嘩!  呢棵樹好高仲多結果子

毛絨絨勁大枝, 唔知係咩果子呢?

本來天陰陰而家出晒太陽, 教會今朝派毛巾, 岩晒

第一個 check point, 身後有荃灣美境

飲啖水又再行過

行左差不多50 分鐘到達下花山

知道仲要行埋身後既閃電先到山頂, 牧師喊喊了

藍藍天空, 青青綠草真係心曠神怡

飽覽荃灣青衣靚景

閣下在此, 下花山邊界

慢行一小時, 唔知係幾多公里呢?

呢棵樹仔好可愛, 好襯小明呀

登上石龍拱真係一條無限上斜既路, 我地休息左好幾次, 頂住呀爸爸! 

小慈身後係大帽山, 呢段路用不同石頭舖砌, 有人叫佢做豪華山徑

大家努力攻頂

見到青馬大橋喇~

兩父子竟然鍾意行泥路多過豪華山徑

山頂涼亭就在不遠處, 加油!!  加油!!

YEAH!  到達石龍拱!

 

見到標高柱, 我都嘗試跟埋嘉麗同阿平上去, 山路泥黃色, 有碎石, 有少少斜, 我邊上邊擔心一陣點落山 :P   望上去好似好近, 由山頂望番落黎石龍拱涼亭好細粒, 唔知佢地見唔見到我地呢?  呢度景觀真係好開揚, 好舒服呀!

人生第一次同標高柱合照, 石龍拱山頂 474.4 米

辛苦爬上黎梗係要影番幾張靚相

擺番個型媽 pose, 遠遠地朦朦地, 靚呢?!

山頂仲有個民航處障礙物燈標 & 地政總署測繪處既二等三角網測站

馬灣海峽盡入眼簾

小慈等左我好耐, 我要手腳並用先落到山, 幾怕又整親條腰骨 @.@  

好, 向深井進發!

浩浩蕩蕩下山去

呢棵樹起格仔好攪笑呀

行行下發現如果沿清快塘行要 2 個鐘兜大圈先到深井, 我地決定爆路行捷徑

有絲帶標記證明有行山先峰行過, 唔驚!

好斜呀!  高難度挑戰呀!

開始腳震, 抖抖先~

叫得捷徑當然迂迴 D, 小慈小明大叫刺激, 話咁先係行山喎!  行磚路冇意思咁話~

有 google map 冇事!  我地出番黎喇!

我地爆路只係行左半個鐘, 比原定時間快左好多!  而家距離深井只有 1.5 公里, 仲有半小時就行完

聽到車聲, 又見得番條路, 探險完畢!

呢個亭叫半山亭, 手寫架

冇電了.....

出番市區, 見番高樓大廈

馬路就係隔離

我們的背影

深入民居

最先見到既就係裕記, 即刻好肚餓 XDDD

不過我地今晚幫襯陳記, 真係好耐冇黎過深井了!   

深井燒鵝係真係燒鵝唔係燒鴨, 好肥, 不過 D 皮真係好好食 :P

一坐低就發覺對腳完全唔屬於自己, 全家曬到面紅紅, 食完餐飯先回到氣

今日行左 20000 步!!!

遠足時間為 3 小時 17 分鐘 9.95 公里!!!  超晒標!  今日條山路難度原來有 3 星, 實在係太勇喇我地!

運動量嚴重不足, 肌肉冇力, 攰到趴街!!  返到屋企小明有少少頭痛, 小慈要搽按摩膏, 爸爸出按摩槍, 我要食肌肉放鬆藥先瞓到!  救命呀!  聽日仲要返工返學 OMG!!!