隨著疫情漸趨穩定, 公務員 5月4日復工, 今日都宣佈學校分階段復課添! 等到頸都長終於都復課了! DSE 一考完, 5月27日中三至中五復課, 小四至中二 6月8日, K3 至小三 6月15日, N1 至 K2 本學年不復課, 全世界返半日, 攪唔掂除口罩一齊食飯啦, 實在太危險了!
小慈小明由之前日日都想快 D 返學話掛住 D 同學, 到而家開始習慣網上教學, 聽到返學竟然唔興奮, 仲有 D 擔心, 好怕一返學就要考試喎! 傻既, 就算真係要考, 範圍都好少啦! 同埋佢地一直 keep 住補習, 又保持早睡早起既生活習慣, 冇問題噃!
5 月已經天氣非常炎熱, 日日都 30 度, 返到公司已經全個口罩濕晒 (我係 Tony Stark 汗型)! 好難想像佢地返學會唔會咁乖同你戴足咁多個鐘頭口罩, 所以半日都係好既安排!
咁有信心復課, 因為政府終於攪掂全民派口罩啦! 每人送一個可清洗重用 60 次既 CuMask, 6 月尾再每戶派 10 個即棄口罩.... 遲都好過冇, 如果有多其實可以送俾其他有需要既人添! 不過大家要有心理準備口罩要戴多半年至一年時間
銅心抗疫口罩有記者用過話因為厚身比較焗, 鼻樑冇鐵線容易跌, 女士要揀中碼先岩戴.... 至於外形, 大家都覺得佢似一條婆婆底底 @.@ 免費既野係咁上下......
限聚令放寬至可以 8 人聚餐, 但仍然要保持座位有 1.5 米距離, 好耐冇出街食飯, 今日要交自行選校申請表先出街, 平時真係好少出街好乖架我地. 今日幫襯見到茶餐廳自制圍板保持食客距離, 確保衛生真係非常欣賞 ^^
我最愛既沙爹牛通非常少通粉同茶走, 好好鼓勵自己減肥有少少成績, keep 住一日一餐, 仲有 5KG 要再努力!
要等食物黎到先可以除口罩, 亦要勤洗手, 大家千奇唔好鬆懈呀!!
只要一息尚存, 生命仍然有希望既! 叮噹都為大家打氣!
希望復工復課唔好又有大爆發同群組感染啦! 香港人, 加油!!!
P.S.
非常可惜去到 5 月 13日, 連續 23 日本地 0 確診之後, 斷左纜喇.....嗚嗚嗚~~~
仲要冇源頭, 一個家族 9 個人有 3 個感染左..... 又要由頭再計之餘, 希望快 D 搵到點解會本地感染啦!!!
沒有留言:
張貼留言