今日放工返黎, 弟弟即刻話隻牙終於甩左!!! 係佢自己用手推甩既, 仲已經食晒成盒雪糕舒緩自己既痛楚同獎勵自己既勇敢 ^^
犀利喎!! 真係估你唔到下! 自己同自己剝牙真係其志可嘉!! 令我諗起 Cast Away, 當人去到非常痛苦既時候就會有不尋常既舉動, 痛左成個月終於要自己同自己剝牙, 真係陰公豬~
由 1月到而家已經甩左 4 隻牙, 總共甩左 12 隻架喇!! 家陣甩既牙好平均, 上面甩 6 隻, 下面甩 6 隻! 見你咁叻仔, 爸爸今日都有驚喜俾你呢! 話說小慈部手提電話原來已經到期, 仲已經到期左一年 @.@ 完全冇 sales 跟進續約問題就直接用完全冇優惠既價錢 -- $550 / 一個月交月費 @.@ $550 x 12 = $6600 出過部新機都得啦!! 爸爸嬲到不得了, 即時打去電訊公司交涉, 不果, 話冇責任提你續約喎, 鬧左好耐都只係免一個月月費, 嬲到翌日去門市投訴, 取消埋個戶口!
電話點都要用啦, 轉個個家庭 plan 加出埋出新電話仲平, 爸爸又知道弟弟個舊電話其實有問題, 叉唔到電又 hang 機, 好啦, 趁呢個機會買部新電話俾你啦! 因為弟弟事前完全唔知道, 佢個難以置信樣真係笑死我! 佢從來都係用我地既二手電話, 第一次有新機用真係超級難以置信!! 見到部新機盒直情成個人掛左係爸爸度, 講咩都話好, 咩都應承, 暗笑, 想開心又唔敢開心個樣勁趣緻 :D 又要 back up, 又要叉電攪左成晚開心到差 D 瞓唔著!
早兩日興趣班復課, 兩姐弟上完堂對腳好似斷左咁, 行步路都叫救命, 要搽按摩膏先可以瞓! 小慈已經身經百戰技巧純熟, 搽按摩膏已經自己黎唔駛靠我, 自己搽完仲同我講話橫掂隻手仲有按摩膏, 主動幫弟弟搽埋, 唔駛我又污漕埋一份, 真係超超超超超乖呀!!! 弟弟成個言若有撼, 心實喜之既樣真係好攪笑, 一邊狂笑話小慈家姐吱佢, 一邊又俾小慈按中死穴大叫痛, 典床典蓆, 笑死我喇!
弟弟, 全家都超級錫你呀, 你知道嗎?
沒有留言:
張貼留言