黃牛山變石芽背

復活節最後一日公眾假期, 之前幾日都天陰陰又落雨, 今日竟然出太陽!  梗係要同陽光玩遊戲啦, 我決定行晒屋企附近既山, 挑戰黃牛山, 出發!!  低估左, 原來由屋企行上去黃泥頭巴士總站已經要大半個鐘, 未開始已經出汗

再由巴士站入花心坑村又 10 分鐘, 佢地已經開始見攰......

搵到黃牛山既指示牌

條路好靚, 暗暗斜上山, 黃牛山山頂最高 604 米

一直行一直行, 終於搵到地圖!  呢度係馬鞍山郊野公園一部份

往石芽背仲有 1.3 公里

今日座山唔係屬於我地既, 人龍唔算密未至於要貼臀股, 但不停有人上山落山, 兩姐弟好擔心完全唔敢除口罩

戴住個口罩呼吸困難, 加埋大大個太陽, 再加上爸爸今日返工冇黎到, 佢地嚴重缺乏動力

我就覺得行得幾開心, 雖然係要不停上樓梯, 但有樹蔭又有風, 唔錯喎

鼓勵佢地再行多陣先啦, 我都唔知幾時先到山頂

去到一個分岔路, 相信已經到左石芽背, 佢地決定休息夠就回程

呢個位特別平坦又整左張櫈係度, 擺到明係 check point 啦

見到大老山氣象站

遠挑大帽山及沙田全境, 呢個位睇唔晒, 上到黃牛山山頂應該靚好多!

到此一遊, 影完呢張相有得落山弟弟即刻笑晒

簡直係跑落山, 弟弟影都唔見埋!  我真係好想佢地自己返屋企我繼續上山架!

佢地狀態不佳, 唯有下次先去攻頂, 再參觀埋七兄弟石, 係天窗石度打咭啦

要再闖高鋒!!!

I will be back!