400 次咖啡

網上大熱韓國新興手造 400 次咖啡, 睇完 YouTube 覺得自己都做到於是今日膽粗粗試下

搵均全屋都冇咖啡粉同埋打蛋器, 唯有借住姐姐包三合一頂住先, 又用打邊爐個篩當住打蛋器

將咖啡粉 + 砂糖 + 水 1:1:1 份量攪均再打至起泡

冇合適既器材真係攪唔掂!  我地用篩, 用筷子, 再集合三個人輪流發左大半個鐘都起唔到泡 (點止 400 次!!!), 終於要打蛋白落去先勉強成形.... 真係手都跛!!  不過佢地話超級好味, 極速飲完!!!

唔服氣, 於是今日出去 IKEA 買打蛋器.  個設計係咁既, 要行晒成層傢俬玩具先到廚房用品, 不過佢地自幼經過嚴格培訓唔會扭計買野既

呢隻野唔知點解真係有爸爸 feel, 太佬樣所以滯銷 :DDDD

平靚正既電動打蛋器係買唔到既, 冇貨!  反而就買左其他野 :P  呢個 5L 既玻璃水壺正呀, 百零元, 佢地成日嫌膠樽水有怪味唔肯飲, 而家放正係個廳度唔該大家飲多 D 水!

P.S. 自動打蛋器未有但買左個手動既都再試多次!  宜家既咖啡粉有粒粒打極都水流流, 都係要靠蛋白先有泡泡感, 尚未成功, 仍需努力!!

P.P.S.  秋秋終於幫我淘左個自動打蛋器返黎, 形勢簡直扭轉, 成件事當堂靚晒呀!!!

我地仲落重本買 UCC 咖啡粉, 117 竟然會比 114 好味!  秒速變成奶茶色

工欲善其事必先利其器, 只係攪左分零鐘就成功了!

2 匙咖啡粉可以做到 3 杯, 快靚正!

衷心佩服用手打得起既人!!!