我要媽媽陪我

小明投訴我暑假冇陪過佢, 淨係得補習, 仲要已經 8 月中好快就要返學, 唔開心...... 咩呀?  咩淨係得補習呀?!  暑假第一日睇左場戲, 仲有跳繩班呢?  參加婚禮呢?  暑期聖經班呢?  音樂班呢?  呢 D 唔係活動咩?!?  擁有三寸不爛之舌既小明淡淡然咁答我, 話呢 D 係唔算既, 因為唔係我陪佢去玩喎 @.@  之前又話體諒媽媽要做兩個部門既野, 我晚晚 OT, 攰到坐係度都瞓得著, 星期六要補眠, 星期日更加想休息下架麻.... 如是者, 小明忍左成個月終於都出聲咯, 講到咁攪到媽媽我又唔忍心好似好衰咁.....

好啦, 不過媽媽真係冇得請假住, 係得星期六日時間, 一拖二梗係要搵 D 近近地, 又我能力所及既地方去玩啦!  難得天氣好, 一於去馬鞍山泳池玩下啦!

下晝先開始游, 本來諗住玩到關門, 點知原來有小朋友嘔, 救生員發現外來污染物就立即要所有人上水關閉大池, 連帶嬉水池大滑梯全部冇得玩 @.@  好在我地已經玩左 3 個鐘夠晒皮手都縐晒, 如果早多一兩個鐘發生呢件事, 小明嘈到拆天都似!

一離開泳池就大叫肚餓, 從來未見過佢地咁快 KO 包薯條之餘仲話唔夠飽要整多杯雪糕!!

Crazy Car Cafe 之前話裝修原來係易手, 而家呢間叫 CrazyTail, 試業價, 9月前都仲係做緊 $52-$68 一個餐, 包你 2 個 token, 每個 token 可以玩 5 分鐘賽車!  餐牌顯示佢地係台式美食餐廳, 燥肉飯都幾好食, 我就食唔落叫左一杯正價飲品都有 1 個 token, 隨單附送 BB 機一部, 響機就代表輪到你賽車, 期間可以安心咁食住飯先

星期六日都係多人, 等 20 分鐘先有得玩, 影住相先啦

偶遇導盲犬, 佢就好啦, 訓練中有得影靚相 :DDD

5 個 token, 小慈二話不說就俾弟弟先玩一次

跟住剩番 4 個 token 就一齊玩 10 分鐘, 小慈由做家姐開始已經好錫好錫好錫弟弟 (好重要所以講三次!)  弟弟, 你真係好幸福架!

逢車過車仲識飄移, 踩單車同揸車都一樣, 學左一世都記得

10 分鐘眨下眼就玩完!  意猶未盡唯有行下呢個商場, 發現呢兩款肥版變色刺蝟, 自編自導自演左一套介紹人物劇, 要我拍片, 睇完又睇, 笑到癲左 :DDDD

路過見到咩都玩一餐, 弟弟連 3 歲 up 既拼圖都唔放過, 仲問我點解佢細時冇得玩呢 D?!  仲好意思問, 你細個淨係有興趣食之麻!!  那邊箱, 小慈好似等男朋友既女朋友咁坐埋一邊安安靜靜, 難得!

唔好再投訴喇, 衰仔!