爺爺生日好「鍋」心

爺爺正月廿五生日, 今年咁岩係平日於是我地提早慶祝.  姑媽話爺爺鍾意食海鮮不如去太子食 buffet, 有鑒於 buffet 巧貴我地一家四口又食唔多好蝕喎!  同等價錢我寧願去食鯉魚門, 但姑媽又怕海鮮價變水魚..... 呀!  咁不如去鍋心粥底火鍋用粥底打邊爐啦!  佢地個餐勁多海鮮又平又抵, 每人都係 $200 包你食到飽!  終於一致贊成 ^^

計埋呢次我地一家人已經食第 3 次了, 第一次係弟弟 8 歲生日, 第 2 次係我生日, 姑媽就一次都未食過, 對於湯底係粥好有保留, 爺爺仲講到明唔喜歡食粥添!  不過, 當大家見到成枱都係海鮮就好興奮, 有埋指引教你煮幾耐添架

弟弟今日好胃口, 咩都肯食, 鮑魚仲食左一隻半

第一次見原隻北寄具, 好鮮甜啊

粥底吸收晒所有海鮮既精華, 再加入芋頭南瓜菜甫豬油渣莞茜去煮, 真係好好味, 我偷偷望到話唔鍾意食粥既爺爺食左兩碗 :DDDDD

一家人圍埋一齊食飯就係開心啦!  祝爺爺生日快樂, 身體健康, 行山有力!