大病初癒就到秋秋發燒!?! 咩事呀? 唔好呀! 好在我睇左 4 次醫生屋企總有一隻藥岩秋秋食, 一食就退燒喎! 感謝天父, 新年願望真係要身體健康呀!
小慈小明祝大家平安喜樂, 學業猛進!
年三十晚
本來一屋病菌嚇怕左姑媽, 好在秋秋及時退燒, 我地一家終於團圓! 不過今年冇力行年宵花市, 小慈小明好乖話唔駛去買野嘥錢, 舊年隻牛奶都仲係屋企脹卜卜 :DDD
大年初一
病左一輪所有野都遲晒, 初一先黎包利是, 好在我有兩個得力助手!
呢兩封利是係爸爸媽媽俾小慈小明既, 祝你地身體健康, 笑口常開, 人見人愛! 爸爸話呢兩封利是係真係俾佢地做零用錢唔駛收歸國有, 小慈小明開心到不得了!! 今年已經大個唔肯再著華服, 紅噹噹都好有新年氣氛, 出發拜年去!
郭氏家族人才濟濟, 今年仲有增添新成員呢!
就係佢喇, 承希 BB
只係 7 個月大但有 1 歲既身型, 好硬淨呀!
小朋友自娛一番, 已經當左自己屋企一樣
舊年仲見到既變色龍因為眼疾唔肯食野, 已經魂歸天國, 星表哥就將變色龍間屋變成金魚街, 好勁呀 ^^
藍色蝦仔, 金黃色蝦仔, 紅身白腳好似戴左手套出自印尼既蝦仔都有, 好得意呀!
我地今年既第一餐食元氣高速線, 正!
弟弟近期最愛三文魚, 飛魚子同三文魚子
我地每食一碟心型碟, 元氣就會捐錢架喇
紅色真係令人好精神, 好鍾意佢地著紅色衫 :)
年初二
食爺爺整既蘿蔔糕, 多蘿蔔到塊糕軟綿綿差 D 切唔到, 於是我煎到兩邊好香, 外脆內軟超好食呀!!
食飽飽我地就出發去睇戲, 戲院而家可以預售 5 日, 仲要去到 11:00 am 都係早場, 實在太令人感動!!
一定要買最大桶爆谷架, 因為小明鍾意食朱古力味, 小慈鍾意焦糖味, 我鍾意食咸咸地既牛油, 要咁大桶先夠分 :D
馴龍記 3 非常非常好睇!! 無牙仔終於搵到佢隻無牙女, 愛一個人要愛佢所愛, 俾佢自由, 真係好感動! 我同小慈都有流眼淚呢.....
周圍行街, 而家新年好多店舖都開門, 年終無休! 豬年見到咁多豬仔錢箱梗係要影相
媽媽成日都買小禮物氹小慈小明開心的
年初三
小明既同班好同學吳柏翹上黎玩, 今日超好天熱到可以著短袖!
我已經開工大吉 (感恩有工開!) 夜晚第一次同 Up to U 一齊食盆菜團拜, 好熱鬧呀!
派利是梗係唔少得啦 ^^
我地仲一齊睇番 80 周年會慶劇「過客」
小慈睇番自己發脾氣既一幕覺得自己未夠爆!
我終於睇到自己既演出, 呢一場係我真喊既一場, 佢地話我表情一流, 好入戲, 攝影師仲影我大頭, 好在我做得到, 感恩感恩!
如果想睇我同小慈既演出可以去以下網址, 遲下教會都會出 DVD 架:
睇過客就 click here 啦~~
Update 左既展板全部都係我地既劇照, 好榮幸呢 :D
初五
小慈小明連同撒母耳團既少年人去左主日學老師婷婷姐姐家 BBQ 團拜
高級 BBQ, 我睇見就流口水, 但少年人見唔到腸仔就扁晒嘴 :DDD
初六
新春第一場獻詩由希幔詩班獻唱「願我心頌揚」! 新的一年, 新的開始, 當高聲歌頌愛我地到永遠既天父!! 願大家身心靈健壯, 越事奉越喜樂 ^^
崇拜之後, 我地去左契女屋企玩, 跟手契女又去我地屋企同契爺拜年, 好耐好耐冇見, 但友誼不變!
跟住就輪到小慈小明初詩新年獻詩
獻唱 I Just Keep Trusting My Lord! 我全心信靠我主, 無論走何路!!
新年獻詩最開心係 Queenie 姨姨一定派利是 :D
熱熱鬧鬧既新年! 祝大家豬年諸事如意, 諸事吉祥, 肉體健康!!
麥希真牧師對大家既祝福, 非常有意思!! 轉載~
沒有留言:
張貼留言