今日係連續兩日 Sports Day 既第一日, 因為去沙田運動場好近, 我地又成日搭車經過, 於是小慈好叻地自己搭車去, 唔駛我送到門口, 仲同同學報名參加 4x100 接力賽, 自己就報左女子 200 米跑同埋跳遠, 佢話阿 Sir 叫佢地報多 D 比賽項目架, 因為全日留係運動場, 唔比賽冇野做係好悶的 :D
午膳可以同同學出街食飯, 但呢位小朋友竟然選擇繼續帶飯, 話唔知出街食咩, 又唔想咁趕喎, 都係一個聰明既做法, 附近最多咪去麥當當, 果然 D 同學仔係買外賣返去陪佢食既 :DD
放學小慈打俾我, 佢話中學既陸運會真係好開心, 大家為左自己個社嗌破喉嚨咁滯, 氣氛好好, 師兄師姐又好勁, 好精彩! 隨口問佢有冇獎牌? 小慈竟然答:「有 !」嘩~~ 真係估唔到呀! 佢地社際 4 x 100 接力攞左個季軍, 佢自己報既 200 米就入左決賽! 好叻叻呀!
小慈屬於 Green House, 每位組員 (不論男女) 都派左個鱷魚襟章、一棵草形髮夾同三眼仔橡筋, 佢話 D 男同學即刻戴晒上頭, 勁得意, 笑死了 :DDDD
仲有件 House Tee.... 唔知幾時可以著呢?
Sports Day Day 2, 一早小慈話佢肚瀉 @.@ 咁點算呀? 返唔返到學呀? 小慈又話得, 不過完全冇胃口食早餐, 午餐都只係食左少少菜同生果..... 唉, 已經咁瘦仲要病冇胃口, 擔心死媽媽了....
放學又打俾我, 小慈問我:「媽媽, 你聽唔聽到 D 聲呀?」咩聲呀? 原來係小慈一路行一路打電話俾我, D 獎牌就隨住佢行路時互相觸碰既聲音 :DDDD 一個唔會響架喎..... 果然小慈嬴左兩個牌 -- 200 米亞軍! 4 x 400 米季軍!!!! 200 米如果唔係佢肚痛, 應該可以攞冠軍添呀! 佢同冠軍差少少架咋 ^^ 至於 4 x 400 就係前舍長師姐搵佢一齊跑既, 真係慧眼識英雄呀!!
點解呢位小朋友可以咁犀利, 平時冇練跑參加陸運會比賽都可以攞獎牌!! 小慈雖然讀書平平, 但運動真係好有天份, 絕對係一個小女飛人!!
Proud of you!!
