9 歲半

自從佢地大個, 我已經好耐冇半歲半歲咁同佢地記住, 不過小明天生對數字好敏感, 自己幾大呀, 幾高呀, 爸爸媽媽幾時生日幾時結婚, 邊年邊月去過邊度做過 D 乜, 睇電視時甚至連個演員上次係邊套劇集做過, 當時個角色叫咩名, 佢全部都記得架 @.@  於是, 小明話我知, 佢今日 9 歲半呀!!

咁重要既日子梗係要攬住 D 心肝寶貝影張相 :)

隻草蜢呢, 就係上次 6 兄弟既唯一生還者; 隻螳螂呢, 就係無端端飛入我地廁所, 小慈沖涼時發現, 識飛既真係第一次見, 小明極度興奮, 兩雄相遇唔知會發生咩事呢?

面書真係好, 當年今日做過 D 咩都會提下你, 5 歲半既小明人生第一個冠軍!

6 歲半玩體操又有獎牌!  越細個鼓勵真係越多架!  睇番都開心 ^^

9 歲半獎佢食甜筒, 小明非常非常鍾意食朱古力味, 每次睇佢食都好好笑, 因為佢一定會食到生鬚 :DDDDDDDDD

我地全家都好鍾意同小明傾偈, 因為佢好多野講好好反應, 有時仲好爆笑添!  今日係巴士度發現有廣告叫人進修, 好奇之下問下小明如果係你會有興趣讀咩?

估都估唔到小明話會做「咖啡調製員」, 因為佢話佢好鍾意飲咖啡喎!

小明爆笑事件:

(1) 我在梳化睇緊電視, 小明在我面前行過,
我: 「過黎俾媽媽攬住!」
明:「好耐冇俾媽媽攬過喇......」
我:「痴線!  媽媽成日都攬你架啦, 亂講!」(氣頂中)
明:「媽媽你今日成日都冇攬過我呀, 好耐架!」(我即刻反白眼)

(2) 小明每日都會講下學校既趣聞
明: 「今日視藝老師要我地安靜, 唔好打擾到同學既創作靈感, 大家安靜左幾分鐘, 視藝老師突然大叫: 『大家留意呀下!  記住安靜唔好騷擾人呀!』全班即刻慘叫:『我做緊 D 咩呀?  我 D 創作靈感無晒喇!』」

(3)
明:「媽媽, 我 D 同學好低能呀! 人地叫佢係課室門口除褲, 佢真係除呀!  我見到 D 唔應該見到既野......」

(4) 小明咳左成個星期, 晚飯時, 佢咳到打圈
明:「媽媽, 我岩岩咳左一個圈呀」
我:「咁有冇覺得好 D 丫?」

(5) 爸爸幫小明溫習數學, 點知佢 sum 又唔知係咩, multiple 又一舊飯, factor 又一臉茫然, 真係加減乘除都未識分, 激到爸爸紮紮跳!!  過後, 我再問小明....
我: Sum 係咩呀?  唔係「心」呀, 數學題呀!
點知小明咁答我....
明 : 媽媽, 唔怕架, 份數學卷呢中英對照架, 我可以睇中文個邊......
我: 咁就可以唔記架喇嗱咩 #$#%$#%^@$!@$

(6) 小明在酒樓洗手間有發現.....

演繹:  如果你飲左尿... 千奇唔好揸車 :DDDDDD

(7) 「儘管我成績考得不理想, 媽媽還是十分疼愛我。」...... 永遠都係呀, 乖仔!  媽媽 love you ^8^

讓別人快樂, 你才有真正的快樂!  我家小明真係做得到, 氹得我地好開心 :D

非常可愛的 9 歲半小明 ^^