遠近慈明: 2月 2017

2017年2月25日星期六

天寒地凍 9 度去賣旗

學校每兩年就會賣旗籌款, 一年級、三年級同五年級, 填回條既時候小慈話:「媽媽, 今次係我小學階段最後一次賣旗喇, 我好想去呀! 求下你啦! 求下你啦! 求下你啦!」聲淚俱下咁滯, 連弟弟都話: 「要! 一定要!」見你地咁熱心就報名參加啦 ^^

竟然遇著寒冷天氣, 仲要係堅凍, 市區得 10.7 度, 新界得 8, 9 度咋!! 當然點都會出發啦, 著左兩條褲又著埋 super warm 仲有暖包手套頸巾, 頂得住!! 今年終於一人一個旗袋, 醒醒目目賣旗去!

學校規定要 14 歲先可以攞旗袋, 我一個人點能夠攞兩個? 於是請爸爸出山, 全家人一齊賣旗!

一路行一路賣

非常積極主動既弟弟連巴士站既途人都問下

周圍都駐滿重兵, 俾我地發現呢個後門無人看守, 小慈小明好似左右門神咁係度駐紮

一出門口就被截停, 好位黎呀呢個!

不過真係好凍, 呢度又落雨又大風, 唔怪得人流雖多但冇人駐守! 連 D 街坊見到我地都心痛, 叫我地呢入天橋底賣旗, 但弟弟唔捨得呢個好生意既後門, 唔肯走

凍到暖包都硬晒, 要跑步、拉筋熱身黎保持溫暖! 小慈後來連手套都除埋, 因為佢話 D 手指冇左感覺, 又撕唔到支旗 >.<

「唔該幫我買支旗丫!」弟弟呢個超級可愛既模樣成功令佢賣晒所有旗仔!!

小慈呢個樣俾人叫佢「阿 Dee」、「乖仔」.... 攪到佢好唔開心, 怪我唔俾佢將條粉紅色頸巾戴係出面俾人見到喎, 咁戴係出面落雨淋濕丫麻....... :D 唔好理, 片面之緣俾人叫乜有咩所謂??!!

兩個都要賣晒所有旗仔先罷休, 小慈個旗袋輕過弟弟, 因為佢有大量 $10 $20 紙, 連 $50 同人民幣 $100 都有!!! 太經典忍唔住要影相留念 ^^

戰績彪炳, 將旗袋交俾老師們就功成身退了! 好叻叻呀!!

企足咁耐, 又攰又凍又餓, 茶餐廳係最好既選擇

咁乖咁落力, 任揀餐牌上既食物以作獎勵, 小慈小明既心頭好原來係化皮脆爆乳豬飯 :)

真係兩年先好攪一次, 成家散晒!!

2017年2月19日星期日

食生蠔

爺爺生日飯我地今次齊齊食西餐, 姑媽話呢間餐廳堂食生蠔 $10 / 隻, 咁抵?? 唔理咁多, 叫一打試下先~~

小慈見我地食得咁滋味細細聲問我佢食唔食得? 南非既生蠔細細隻好鮮甜, 連我唔係咁迷戀生蠔都覺得好食, 就俾小慈試下, 第一印象好緊要架!

又檸檬又茄醬連埋海水, 跣入喉嚨「骨碌」一聲就吞左, 好好味!

小明都忍唔住試, 佢就話冇咩味道要試多幾隻試清楚 D 喎, 你就想!

今晚叫左好多好野食, 小朋友當然最開心係食香蕉船啦!

好野大家分享 ^^

我真係好鍾意食西餐 :D

GMC Workshop

由二年級開始每年都有參加校際音樂節, 初初參加係想幫小慈壯下膽, 因為佢細個實在太易喊太膽小. 到四年級, 小慈竟然同我講想試下攞獎, 季軍都得架! 我聽到好開心, 因為我個女終於有鬥心而唔係咩都同我講「我唔得、未輪到我、點會係我姐」..... 所以我真係好感動架! 不過最後當然攞唔到獎啦, 彈岩晒成首歌同彈得好唔好聽, 好聽到有獎攞係兩回事黎架麻!

我隱隱約約都覺得小慈係技巧上同琴音上有問題, 左手永恆地太大聲, 跳脫連貫等技巧好似改唔到咁既? 爭 D 咩我又唔識教佢, 同琴老師反映過都冇咩改善..... 而同一時間, 我見到朋友仔校際連續兩年攞冠軍, 膽粗粗問佢跟邊個老師? 原來都好近我地屋企, 於是我毅然同小慈轉琴老師, 無論上課環境、師資同教法都好好多!

為左校際音樂節, 琴行有 workshop 俾大家參加, 除左有專責老師負責教授技巧, 仲會俾你多聽多睇其他人點彈, 有分享會有試奏會俾你踏台板, 透過交流、觀摩、學習, 提升小朋友對音樂的欣賞力, 我覺得小慈有好大進步