PTS

只不過係相差一個星期, 天氣由陽光充沛變成日日大風大雨雷暴警告不絕, 小慈等左好耐既 PTS 活動, 原先連續 4 日既活動 -- Day 1 扒龍舟 & Day 2 行夜山都因為天氣影響而要改期, 好在之後既活動在室內舉行同埋天氣好轉少少, Day 3 射箭射槍、Day 4 拾荒板間房可以如期舉行, 有得玩喇 ^^

同校既兩位師兄, 佢地都參加過 PTS, 小慈就第一次

Day 3 節目, 第二組 C.A.M.P 集合

34 位小朋友分成 4 組

小慈既導師 Kit Sir & Madam Julie

Day 4 節目睇驗拾荒生涯, 小慈要伸手入垃圾桶執汽水罐、間間舖頭問人攞紙皮、攞報紙鋁罐去變賣, 成架手推車咁重既貨都只係賣得 $18.5, 全組 10 人只得 $120 要買晚餐, 揀左一個餸既車仔麵每人 $12, 小慈食魚旦公仔麵、去午夜墟擺賣, 家居小電器最受歡迎, 雨傘玩具賣唔出賺唔到錢, 零晨 12:00 返去大本營瞓紙皮, 自己用污漕衫包膠袋做枕頭, 用外套做被, 瞓得 4 個鐘就起身梳洗仲要掃地執拾大本營, 絕對係捱苦既體驗, 呢個就係小慈既出營 look

小慈既心聲:

「賺錢真係好辛苦, 伸手入垃圾桶件衫掂到條邊仲要同烏蠅搏鬥先攞到一個啤酒罐!  賣晒成車既報紙推都推唔郁咁重咁多, 都係得 $18.5  v_v  收買佬見我地細個已經俾多左錢我地!  媽媽, 原來賺錢真係好唔容易 (攬我)!  腳瞓紙皮, 頭塞入紙箱原來係細到伸唔到懶腰, 瞓得 4 個鐘, 紙皮又好硬, 仲要掃地倒垃圾, 我尋晚冇沖涼, 而家好眼瞓, 屋企真係最舒服架!!  不過雖然係辛苦, 但我出年都仲想要參加, 嘻嘻, 真係好好玩!」

補堂 Day 1 節目扒龍舟

PTS 真係好有經驗, 一早預備萬一天氣唔好即刻有後備日子補堂, 延期一星期, 終於天朗氣清可以去西貢賽馬會野外鍛鍊中心扒龍舟喇!!

不過陽光普照小朋友又唔好好做防曬既後果就係咁....

補堂 Day 2 行夜山 @ 大埔滘 -- 天氣好到不得了, 見到咸蛋黃又見埋 full moon, 咁樣行山一定好精彩!

恩慈房呀 ^^

活動總結中

著住螢光外套個位就係小慈喇

想影小慈在恩慈房不過影唔切  >.<

最後集隊 .... Dismiss

小慈同班同學黃濼亦係 C.A.M.P. 組隊員

行夜山見到蝙蝠同馬騮一家人, 對腳痛到想喊再加夜深, 小慈攰到講唔到野, 0 秒瞓著!